LUK 18:14-43

¹⁴“Kale niyo ibo weng maak bogobelan-temi ko. God iyo tebe-nala e, takis mani kwaamin tinum imi fengmin uyo takan kebe, ‘Tol tinum kelap o,’ agelata, ilami am iinata minte, Falosi ita God iyo dupkalata, yagal bisop ilami am iina ko. Kale tam tinum ilami win kufolan-tema uyo, God iyo bogobe-nala, ‘Nimi tiin diim uyo kanupmin tinum kabo kubaganap win binim o,’ agelan-tema kale minte, tinum dogap ita ipkumal imi afak tem iinom ilami win uyo kufumin binim kema umdii, God iyo kanupmin tinum bemi win uyo kufu-e-bom bogobe-nala, ‘Nimi tiin diim uyo kabo kwiin kiim o,’ agelan-tema o,” agela ko.

¹⁵Tam unang tinum mafak ilin ita kup kulep tal Yesus imi finang talanbaalip kale, man kangkang sino kulep Yesus imi finang talan-bilip kale, ogenal imi aget fugunin uyo, Yesus tebe sagaal kwep yak man kangkang imi dubom diim daabe dong dogobelata, tambaliim kup fitolin o age-nilipta, man kangkang iyo kulep tilip kuta, Yesus imi okumop man iyo utam-nilip e, ogenal iyo fot tebelup daaginin o age yan-togon-kalip e,

¹⁶Yesus iyo ogenal iyo bogobe-nala e, “Man kangkang iyo kulep nimi finang tilipta o,” age-nala e minte, imi okumop man imi bogobe-nala e, “Unang tinum utamipta, God beyo nuyo dong dogobelan-tema kalaa age-nilip mitam God imi daam tem telebip iyo man kangkang ilitap kale, ibo man kangkang bilip iyo fot tebemin ba kale, imkalip nimi finang tilin o ageta kale,

¹⁷niyo tol kup weng uyo bogobelan-temi kale, tele tinangku-silipta. Man bilip iyo kangkang albip uta, aalabal iyo, mufekmufek umaak kobelum o agelan-temip kota, man bilip iyo maagalo yak aalabal imi sagaal diim mufekmufek uyo kulan-temip kale, ulutap unang tinum waantap ita, God imi daam tem uyo tam unum o agelip uyo, dupkalipta, God yagal dong dogobelata, God imi daam tem uyo mitam tolon-temip kale minte, unang tinum waantap ita, ilimi aget fugun-bom kuguup mafak kanumum o agelip uyo, ilimi san kale, mitam God imi daam tem mitam tolon-temaalip o,” agela ko.

¹⁸Tam Juda kasel imi kamok maak Yesus imi daga-nala e, “God imi weng kafalemin kabaa. Kabo tinum tambal kale, nimi dagagamin maak kopkelan-temi boyo yan kepnelapta, utaman. Niyo mitam suun nin tinum kelan o agan-bii kale, bota dogobe-nilita, mitam suun nin tinum kelan-temi o?” agela e,

¹⁹Yesus iyo bogobela, “Kabo intaben o ageta bogopne-nalap, ‘Kabo tinum tambal o,’ nagelap a? Tinum tambal iyo maak albaala kale ki, God maagup ita kup tinum tambal kale, kapmi weng ko bogopnelap boyo, beyo waanta kalaa nage-nalapta, bogopnelap a?

²⁰Kabo God imi ulo kwep daasa uyo utamsap kale, bogo-nulu e, ‘Kapmi kalel uyo kupkaa yang kapkum imi kalel uyo takamo tiinemin ba e minte, kabo unang tinum iyo inolap kaanamin ba, kabo yuguut unan-kalin ba, kapkum iyo fenga kolin-tem uyo, kabo bisop bogo kiyap iyo baga-emin ba, kabo kapmi kogen kaalap imi weng uyo tinangku waafuna-bom, minte kuguup tambal kup kupka-e-bom no kemin o,’ agesu o,” agela e,

²¹kota tinum kamok beyo bogola, “Niyo sugayok man katip kutop ilota kwep tal tinum kiim ke kaa diibeli uyo, God imi ulo boyo waafuu kwep tebesi o,” agela e,

²²Yesus iyo tinum kamok bemi weng uyo tinangku-nala e, bogobela ko. “Bole kanum-nuubup kuta, kabo kuguup maagup maak bota kup kanum-nuubaalap kale, kabo no-nalap kapmi mufekmufek uyo kapkumal imi kobelapta, ita molipta, mani uyo kulu-nalapta, iip kulin man imi kobelan-temap uta, no God imi abiip kal suun kup tambaliim nan-temap ko. Kale kabo nisino tiine-bomta, God imi ogok uyo kemum o,” agela e minte,

²³tinum kamok beyo mufekmufek soyaap kale, Yesus imi weng bogola boyo tolong do-nalata, imi aget uyo fuguno-nala e, “Atin suun nin tinum kelan o agan-bii kuta, nimi mufekmufek boyo fen iip kulin man iyo kopman-temaali o,” age-nalata, aget iluum kup tebepmu ko.

²⁴Kale Yesus iyo utamata e, tinum mufekmufek soyaap beyo aget iluum tebema kalaa age-nala e, ilami okumop man imi bogobela ko. “Kwiin. Mufekmufek soyaap unang tinum iyo bong faga-bom-nilipta, (imi mufekmufek baan fagagan unsip uyo kupkalan-temip kale, iip maak maak ita kup God imi aget kobe-nilipta,) mitam God imi daam tem uyo mitam tolon-temip ko.

²⁵Kale utamsup kale, kong kiim ko age kamel boyo, tam men sok sil imi magat kun tem ilep tam iinon o agelu uyo, bong fagan-bii-nuluta, tam iinon-temu kale, ulutap kale, tinum mufekmufek soyaap yagal mungkup atin bong kup fagan-bii-nalata, mitam God imi daam tem uyo mitam tolon-tema o,” agan-kala ko.

²⁶Kale unang tinum Yesus imi weng bogola uyo tinangku-nilip e, Yesus imi daga-nilip e, “Kanube tinum mufekmufek soyaap iyo bong faga-bom-nala tam God imi daam tem uyo una umdii, win binim unang tinum nule dogobe-nulupta, tam God imi daam tem uyo unon-temup a? Boyo fen bagang-kale tam unomup binim o,” agelip e,

²⁷Yesus iyo bogobela, “God ita tii alugum mufekmufek uyo kanube-nama kuta, tinum ilasinon uyo, bagang-kale-nalata, mitam God imi daam tem uyo mitam tolon-temaala kale, God yagal dong dogopman-tema uta, mitam God imi daam tem uyo mitam tolon-tema o,” agela e,

²⁸Fita isiik bogobe-nala e, “Kamogim kabaa. Tolong do-salapta. Ninggil nuyo numi abiip sino numi mufekmufek sino uyo kupka-nulupta, kapmi ogok uta kem kapsino tiinan-bulup kole o?” agela e,

²⁹kota Yesus iyo ilami okumop man ninggil imi bogobe-nala e, “Bole dam kuta minte, nimi bogopman-temi koyo dam no ko. Waantap ita aget fuguno-nilip, ‘Nuyo God imi weng uyo kwep yang unang tinum iyo baga-e-bulupta, tam God imi daam tem uyo tam unin o,’ age-nilip e minte, imi am sino, kalel sino, man sino, fik sino, ibinang sino, ogen aalap sino iyo abiip kugol imka-nilipta, tal God imi ogok uta waafulip umdii,

³⁰kamano kafin diim kaa albip kota, kanupmin mufekmufek umi kupkaa tisip uyo kwiin tagang kota kululan-temip kale, aaltam kaanan-temip uyo, no tamip God so suun kup nan-temip o,” agan-kala ko.

³¹Yesus iyo ilami okumop man iyo afeta ko kulep yang-nala e, bogobela ko. “Ibaa. Siin uyo Mo Tibil imi Man nimi sang uyo God imi profet ko age weng kem baga-emin tinum imi bogobelata, ita God imi suuk kon tem kal dola-silip kale, kamano kota nuyo, Jerusalam kamet iinum o age talan-bulup kale, no kugol bom-bulupta, weng boyo alugum mitam tebe abulan-temu ko.

³²Kale no Jerusalam tamupta, Juda kasel imi kamogimal ita tebe-nilipta, nimdalip yak Rom kasel imi sagaal diim abelita, ita tebe-nilipta, titul weng bagane-bom-nilip e, weng mafak uyo bagane-bom-nilip e, mok uyo nimi kaal diim uyo tagaa kone-bom-nilip e,

³³sok ifet ku saal daga-bom ke-bii-nilip e, nangkolip kaani namalip bii, am alop ke-nilita, am asuno diim kota asok fen tigi molan-temi o,” agela ko.

³⁴Kuta imi okumop man iyo Yesus imi weng bagan-be bomi magam uyo tele utamin-tem kelip ko. Kale Yesus ilami okumop man iyo imi weng bagan-be bomi aget uyo tele fugunolin-tem ke-nilipta, weng bomi magam uyo dagaa kulin-tem kelip ko.

³⁵Kale Yesus sino ilami okumop man sino iyo no abiip Jeriko mep so so abe-silip e, tinum tiin mafak maak beyo ilep magaang tem kal ton-bom-nala e, unang tinum tiinan-bilip imi mani sang dagaga-bom-nala e, nen-bom bomta,

³⁶tolong dolata e, unang tinum kwiin tagang iyo tiinan-bilip kalaa age-nala e, dagala ko. “Boyo intaben nu-bilip o?” agela e,

³⁷unang tinum iyo bogobelip ko. “Abiip Nasaret kayaak Yesus ita talan-be o,” agelip e,

³⁸tinum tiin mafak beyo Yesus imi olabe-nala e, “Kamogim Yesus kabaa. Kabo kalapmi afalik King Devit ilatap kale, niyo ni-filin daa kapmi titil uyo ku-nalap dong dogopne o,” agan-kala e,

³⁹tam unang tinum Yesus imi bon tem unan-bilip iyo agan-bom bogobe-nilip e, “Sining agelal o,” agan-bilip kuta, tinum tiin mafak beyo Yesus imi fomtuup ole-bom-nala e, “King Devit man ilop Kamogim kabaa. Kabo ni-filin daa dong dogopnelal o,” agela e,

⁴⁰Yesus iyo ilep unan-be uyo kupkaa kugol mo-nala e, kek kek imi bogobela ko. “Ibaa. Tinum tiin mafak beyo nimi finang dep tilin o,” agela e, tinum tiin mafak iyo dep tal Yesus imi miit tem daalip e, Yesus iyo tinum tiin mafak imi bogobe-nala e,

⁴¹“Kabo, niyo intaben nupnelak o ageta olne-balap o?” agela e, tinum tiin mafak iyo bogola, “Kamogim kabaa. Nimi tiin koyo telela kopnelap tambalanepneluta, mufekmufek uyo utamaman o ageta olan-bii o,” agela e,

⁴²kota Yesus iyo bogobela, “Niyo utamita, kabo, beyo fen telela namolan-tema kalaa nagelap kalaa age-nilita, kamano kaa telela kamoli asok tambalanap kale, fen-nalap tiin baa mufekmufek uyo tele utamal o,” agela ko.

⁴³Kota maak fagaa tinum tiin mafak imi tiin uyo tambalanebelu e bole, Yesus isino tiine-bom-nala e, God iyo, “Misam o,” agan-kala ko. Kale unang tinum iyo alugum utamipta e, Yesus tebe tinum tiin mafak iyo telela dola kalaa age-nilip e, God imi win uyo kufu-e-bom deng tebemip ko.