San Lucas 18:14-43

¹⁴Nare rniia laat dec cobrador xte impuestqui abaany Dios perdón laab chi biecquibɨ lizbɨ, per fariseuqui quɨt baantiny perdón laab. Te pur elquɨ ni rzubyaa lagac laani quɨt xi sactib nez lo Dios. Per elquɨ ni runbichiin, laabɨy mazru sacbɨ nez lo Dios.

¹⁵Ziyza güené de bniety de bniniin rut zuguaa Jesús par iguaaldny laadeby. Per chi guná de xpɨnny ziy, guzulo rdildnédeb de bniety ni güené laadeby.

¹⁶Per Jesús gurɨdxny laadeb, raipny laadeb: —Gulsaan guedná de bniniin nare, quɨtru rcuat. Te pur guelrnabee xte Dios ná par de bniety ni ná zec laadeby.

¹⁷Te nare rniia laat dec elquɨ ni quɨt reldilaaz guelrnabee xte Dios zec tuby bniniinré, quɨt chaleeti yiiub lo guelrnabee xte Dios.

¹⁸Tuby bɨny ni rnabee gunabdiidxbɨ Jesús: —Güen Maistrɨ, ¿Xi riáld gúna par gapa guelnabány par chazy?

¹⁹Jesús raipny laab: —¿Xínii rniiu dec güen naa? Quɨtru tu náti güen, quesoltisy Dios ná güen.

²⁰Liú nánnu de mandamient: “Quɨt náti par gapu stuby gunaa. Quɨt quinxútiu bniety. Quɨt gactiu gubaan. Quɨt güeetiu dixú pur de bniety. Gúp didxdoo xtadu cun xnanu.”

²¹Bnietqui raipbɨ Jesús: —Irate de cosquɨ cayuna desdɨ chi naa bichiin.

²²Chi bindiag Jesús ziy ax raipny laab: —Per rieedx gúnu stuby cos: güetóo irate de ni rápu ax bdeed mɨlyqui de prob, te ziy xquel gapu guelnazaac llayabaa. Chi abtóo de xixtenu, ax quedanald nare.

²³Per chi bindiag bnietqui ziy, quesentiand nalas biianbɨ, te pur la ricu náb.

²⁴Chi guná Jesús dec laab nalas nuub, ax guniiny: —¡Quesentiandquɨza nagán par yiiu de ricu lo guelrnabee xte Dios!

²⁵Mazru senciy teed tuby camey guɨɨdy xte tuby guɨchgull, que par yiiu tuby ricu lo guelrnabee xte Dios.

²⁶Per de ni bindiag ni gunii Jesús ax guniideb: —¿Túlesa chalee gac perdón lo Dios pur de xtuldni?

²⁷Chiyru cuaby Jesús lodeb: —Nuu ni nagán par bniety guɨchliu, per par Dios xíteete nagánti.

²⁸Chiy raipy Bed laany: —Dad, dunnɨ absáannɨ irate ni rdxapnɨ par izanaldnɨ laabiu.

²⁹Jesús ax cuaibny: —Nare rguixtiia lot, dec tutix bniety ni rsáan lizni, chialni, de betsni, o xtadni, o xnanni, o de lliinni, pur guelrnabee xte Dios,

³⁰laab mazru zieny ni icáab lo guɨchliuré. Ne zapbɨ guelnabány par chazy llayabaa.

³¹Jesús gurɨdxny tsɨbtiop xpɨnny tuby lad, ax raipny laadeb: —Anre choon Jerusalén rut gac zec ni bcuaa de profet lo guiits pur nare Bniety ni bxiaald Dios.

³²Zundeb entriagu nare lo de bɨnzít, ax zundeb burlɨ nare, iralozy ni iniideb naa ne stiuxɨ́ndeb luaa.

³³Staazdeb nare, chiyru quinxúdeb naa. Per ni rion dxi ni agutia, sbíi ibánia stuby.

³⁴Laadeb xíteete gucbeetideb ni guniiny, niclɨ quɨt gándeb tú pur rniiny, te pur zec ni guniiny quɨt releeti gacbeedeb xi zelo ni guniiny.

³⁵Chi zedzɨngax Jesús guɨdx Jericó, tuby bniety nguiu ni ná ciagu zubbɨ cuee nez rguiinbɨ gun.

³⁶Chi gucbeeb cadeed zieny bniety, ax gunabdiidxbɨ xi cosqui cayac.

³⁷Ax raipdeb laab dec Jesús de Nazaret cadeed nezqui.

³⁸Chiy desde rut zubbɨ gurɨxtiab: —¡Jesús, llingaan David, blaslaazbiu nare!

³⁹De bniety ni zanɨɨdy rdildnédeb laab par quɨtru cuxtiab, per laab mazru gurɨxtiab: —¡Llingaan David, blaslaazbiu nare!

⁴⁰Chiyru guzudxí Jesús ax gunabeeny laadeb chacáadeb bnietqui. Chi bdzɨnbɨ gax ax gunabdiidxny laab:

⁴¹—¿Xi rcaazu gúna pur liú? Bniety ciaguqui cuaibbɨ: —Dad, nare rcaaza ibíi yianluaa stuby.

⁴²Jesús raipny laab: —¡Azelee yianloo! Abiacu te güeldilaazu nare.

⁴³Hóracqui agüelee gubíi bianlo bnietqui, ax güenaldbɨ Jesús rniib de diidx zaac par Dios. Ne irate de ni guná xa guc, guniizadeb de diidx zaac par Dios.