Lukas 18:14-43

¹⁴I indai ong komail, ol men et kodila deu a pungala mon me teio. Pwe me kin kasapwilada pein i, pan kasapwilidi, a me kin kasapwilidi pein i pan kasapwilada,

¹⁵Irail ap wa dong i kisin seri kai, pwen kotin sair ir. A sapwilim a tounpadak kan lao kilanger, re ap kapoui irail.

¹⁶A Iesus kotin molipe ir masani: Mueid ong kisin seri kan, en kodo re i! Der kalik irail edi! Pwe irail me udan wein Kot.

¹⁷Melel I indai ong komail, meamen, me sota ale wein Kot rasong kisin seri men, a sota pan pedelong ong lole.

¹⁸A monsap amen idok re a masani: Saunpadak mau, da me i en wiada, pwen sosoki maur soutuk?

¹⁹Iesus ari kotin masani ong i: Da me koe indaki, me I me mau? Sota me mau men, Kot eta.

²⁰Koe kin asa kusoned akan: Koe der kamal; koe der kamela aramas; koe der pirap, koe der kinekine mal, kakaki sam om o in om!

²¹I ari indada: Nan mepukat karos i kin wiawia sang ni ai tikitik kokodo.

²²Iesus lao mangi mepukat, ap masani ong i: Me ta kis me lua, netikila om kapwa karos, o nene ong me samama kan, a om pai pan mi nanlang, ap kodo idauen ia do.

²³A lao rongadar met, ap insensuede kila melel, pwe a kapwapwa kaualap.

²⁴A Iesus lao kotin masani, me a insensuedela, ap masani: Nan me apwal ong me kapwapwa kan, en pedelong ong nan wein Kot.

²⁵Pwe me mangai, kamel en tilong nan por en dikok, sang ol kapwapwa men pedelong ong nan wein Kot.

²⁶Irail me rongerong indada: Ari, is me kak ong maur?

²⁷A kotin masani: Me aramas akan so kak ong, Kot me pan kak ong.

²⁸Petrus ap potoan ong: Re kotin mangi, kit me likid maliela meakaros ap idauen la ir.

²⁹A kotin masani ong irail: Melel I indai ong komail, nan sota me likidmaliela im a, de sam, de in a, de ri a ol akan, de a paud, de na seri kan pweki wein Kot,

³⁰Me so pan id aneki me lapalap ni ansau wet o ni muei kokodo maur soutuk.

³¹A kotin ukala ekriamen ko masani ong irail: Kilang, kitail kin kodalang Ierusalem, o karos pan pwaida, me intingidier ren saukop akan duen Nain aramas.

³²Pwe a pan pangala ren men liki kan, pwe re pan kapikapiti i o ki sang wau i, o kondipi ong i.

³³O re pan woki i o kamela, a ni kasilu en ran a pan maureda.

³⁴Irail ari sota man weweki mepukat, O masan pot et me rir sang irail. Re pil sasa, me a kotin masani.

³⁵A kadekadeo ni a koren iong Ieriko, ol maskun amen momod pon kailan al, poekipoeki.

³⁶I lao rongadar pokon o me daudaulul, ap idok due.

³⁷Irail ari indang i, me Iesus men Nasaret kotin daulul.

³⁸I ari ngil laudeda potoan ong: Iesus, sapwilim en Dawid, kotin kupura ia!

³⁹A me tiong moa kidekidaue i, en nenenla: A i ap kalaudela a poekipoeki: Sapwilim en Dawid, kotin kupura ia!

⁴⁰Iesus ap kotin udi ong wasa o, masani, ol o en wisike dong i. A lao koren iong imp a, ap kotin kainoma re a.

⁴¹Masani: Da me koe men, I en wiai ong uk? A potoan ong: Maing, i men potoan ngarada wasa.

⁴²A Iesus kotin masani ong i: Kilang wasa, om poson me kakel uk ada!

⁴³Ap pitipit kilangada wasa, o idauenla i, o kapinga Kot, o aramas karos, me udial met, ap kapikapinga Kot.