Lucas 18:14-43

¹⁴Y cꞌani inwareox era que e ajmorojseyaj tumin tuaꞌ gobierno era sutpa ixin tama uyotot corpesbꞌir umen e Dios. Pero majax bꞌan chena taca e fariseo porque tin e uche ubꞌa que jax inteꞌ nuxi winic cꞌani amanxujresna, pero tin e axin umanxujres ubꞌa cꞌani achꞌijsena tuaꞌ aquetpa nuxi winic, che e Jesús.

¹⁵Pues ayan tin e cay utares cora maxtac tut e Jesús tuaꞌ upacbꞌu ucꞌabꞌ tama ujorobꞌ, pero conda uyajcanuarobꞌ uwirobꞌ tunor era cay chenobꞌ que: “Ira itares imaxtac tut Cawinquirar.”

¹⁶Pero e Jesús upejca e maxtac y che: —Actanic tuaꞌ ayopobꞌ taniut tunor e chuchu maxtac, y ira iquete iwabꞌuobꞌ, porque tunor tin e axin acꞌupseyanobꞌ tama e Dios bꞌan cocha war uchiobꞌ e chuchu maxtacobꞌ era cꞌani oꞌchoyobꞌ tama uchinam e Dios.

¹⁷Y cꞌani inwareox coner que tin e machi uchꞌami uchinam e Dios bꞌan cocha inteꞌ chuchu maxtac machi tuaꞌ oꞌchoy tamar, che e Jesús.

¹⁸Pues entonces cꞌotoy inteꞌ nuxi winic tut e Jesús y cay uyubꞌi tuaꞌ y che: —Niwajcanseyajet xeꞌ erachet, ¿tucꞌa tuaꞌ inche nen tuaꞌ inchꞌami e cuxtar xeꞌ machi tuaꞌ acꞌapa? che e nuxi winic era.

¹⁹Y che e Jesús: —Net war awaren que nen erachen. Pero jax taca e Dios xeꞌ erach. Y tamar era war awaren que Diosen nen ubꞌan.

²⁰Pero net anata lo que arobꞌna umen e Dios, que ira iꞌxin taca inteꞌ ajnajtir ixic, ira ichamsan, ira ixujchꞌian, ira imajresian, y cꞌupsen atata y atuꞌ, che e Jesús.

²¹Y che e winic: —Tunor era inchix desde chuchuento, che e winic.

²²Pero conda e Jesús uyubꞌi e ojroner era, sutpa ojron y che: —Ayanto lo que ucꞌanto tuaꞌ ache, quiqui chono tunor lo que ayan tabꞌa y ajcꞌun tin e tzajtaca ut. Y tamar era cꞌani aquetpa meyra atuanibꞌir tuaꞌ achꞌami conda iꞌxin tut e qꞌuin. Y conda acꞌapa achoni tunor lo que tabꞌa, lar incoꞌ tacaren, che e Jesús.

²³Pero conda e winic uyubꞌi e ojroner era quetpa tzajtaca ut cocha ayan meyra utumin y machi cꞌani uchoni lo que ayan tuaꞌ.

²⁴Pero conda e Jesús uwira que tzajtaca ut uwirnar, ojron otronyajr y che: —Intran tuaꞌ oꞌchoy tama uchinam e Dios tin e ayan meyra utumin.

²⁵Y intran tuaꞌ anumuy inteꞌ nuxi arac xeꞌ ucꞌabꞌa camello tama uchꞌenar inteꞌ aguja, pero más intran tuaꞌ oꞌchoy tama uchinam e Dios inteꞌ xeꞌ war ucojco tama utumin xeꞌ meyra ayan tuaꞌ, che e Jesús.

²⁶Entonces tin e war uyubꞌiobꞌ lo que ojron chenobꞌ: —Y jay inteꞌ xeꞌ meyra ayan utumin cocha era machi uyubꞌi acorpesna, ¿chi tuaꞌ acorpesna? chenobꞌ.

²⁷Y che e Jesús: —Pues mamajchi tuaꞌ acorpesna tamar taca utumin, pero tunor era intran tut e winicobꞌ. Pero Cadiosir erer uche tunor cocha jaxir ayan ucꞌotorer, che e Jesús.

²⁸Y che e Pedro: —Pero Niwinquiraret, non era cawactix tunor lo que ayan ticabꞌa tuaꞌ caxin tacaret, che e Pedro.

²⁹Entonces ojron e Jesús y che: —Cꞌani inwareox era que tunor tin e axin uyacta uyotot o utuꞌ y utata o usacunobꞌ y uwijtzꞌinobꞌ o uwixcar o umaxtac tuaꞌ taca ucꞌupse e Dios,

³⁰cꞌani uchꞌami más tuaꞌ e Dios tara tor e rum y nacpat era cꞌani uchꞌami e cuxtar xeꞌ machi tuaꞌ acꞌapa conda axin tichan tut e qꞌuin, che e Jesús.

³¹Entonces e Jesús upejca e doce uyajcanuarobꞌ tuaꞌ alocꞌoyobꞌ cora najtir, y de allí cay ojron tacarobꞌ y che: —Coner era cꞌani caxin esto tama e chinam Jerusalem tuaꞌ acꞌapa achempa tunor lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo tamaren nen xeꞌ Uyunenen e winic.

³²Porque yajaꞌ tama e chinam Jerusalem cꞌani anjcꞌuna tama ucꞌabꞌobꞌ e gente xeꞌ majax tuobꞌ e Israel, y cꞌani atzeniobꞌ nipater, y cꞌani ucꞌayenobꞌ bꞌan taca cocha ubꞌijnu uchiobꞌ, y axin utujbꞌienobꞌ.

³³Y de allí axin uwatzꞌienobꞌ y axin uchamsenobꞌ. Pero tama e uxteꞌ día cꞌani insujta imbꞌixqꞌuesna tujam e chamenobꞌ, che e Jesús.

³⁴Pero uyajcanuarobꞌ machi unatobꞌ tucꞌa tamar war oꞌjron era, y machi unatobꞌ tucꞌa war che e ojroner era, y tamar era quetpa mucur tunor era tutobꞌ.

³⁵Entonces conda e Jesús cꞌanix acꞌotoy tama e chinam Jericó, turu inteꞌ winic xeꞌ tajpem unacꞌut tutiꞌ e bꞌir xeꞌ war ucꞌajti e tumin taca e gente.

³⁶Pero conda cꞌotoy unata que war anumuy meyra gente tut e bꞌir tiaꞌ turu cay uyubꞌi tuaꞌ e gente tuaꞌ unata chi war anumuy era.

³⁷Y arobꞌna que jax e Jesús xeꞌ tuaꞌ e chinam Nazaret xeꞌ war anumuy.

³⁸Entonces jaxir cay aru taca inteꞌ nuxi nuc y che: —Jesús Oo, sitzbꞌiret tuaꞌ e David, yajtan niut tara, che e winic xeꞌ tajpem unacꞌut.

³⁹Entonces tin e war axanobꞌ tut e bꞌir cay chenobꞌ tuaꞌ machi aꞌru. Pero jaxir más cay aru y che: —Sitzbꞌiret tuaꞌ e David, yajtan niut, inwaret, che e winic.

⁴⁰Entonces quetpa wawan e Jesús y uyare tuaꞌ ataresna. Y conda qꞌuejcha cꞌotoy e winic tuyejtzꞌer cay uyubꞌi tuaꞌ y che:

⁴¹—¿Tucꞌa acꞌani tuaꞌ inche tacaret? che e Jesús. Y e winic xeꞌ tajpem unacꞌut che: —Niwinquiraret, incꞌani tuaꞌ awajqꞌuen unacniut tuaꞌ enron, che e winic.

⁴²Y e Jesús che: —Chꞌama unacꞌoit, tzꞌacpesbꞌiret umen que war icꞌupseyan tamaren, che e Jesús.

⁴³Y wacchetaca uchꞌami unacꞌut tuaꞌ uyubꞌi eꞌron. Y ixin tupat e Jesús, war utattzꞌi ucꞌabꞌa e Dios. Y tunor e gente xeꞌ uwirobꞌ lo que numuy era cay utattzꞌiobꞌ ucꞌabꞌa e Dios ubꞌan.