San Lukas 18:14-43

¹⁴’Chaymi noqaqa niykillapa, chay kuntribusyunda kubrakuqqam uchangunamanda pirdunaduna, kutirqan wasinmanqa. Piru Tayta Dyusmi chay farisiyutaqa mana pirdunarqanchu. Chaqa Dyusqam chay palanganutaqa ultimupi rin ruraq penqakunambaq. Piru chay umildi kaqkunataqam ancha kamachikuqpaq rin ruraq.

¹⁵Wambritukunatam apamurqanllapa Jisusman, sawanllapapi makinda rurashpa, Dyusman mañakunambaq. Piru yach'akuqninguna chayta rikashpa, anyarqanllapa chay wambritukuna apamuqkunata (Jisusta ama piñachinanllapa).

¹⁶Piru Jisusqa chay wambritukunata qayashpa, yach'akuqningunata nirqan: —Ama arkayllapachu. Dijayllapa chay wambritukunata, noqaman shamunambaq. Chaqa Tayta Dyus shumaqta kamachikuptinqam, kay wambritushina kaqkuna paywan rinllapa kawsaq.

¹⁷Alliptam niykillapa, kay umildi wambritushina kaqkunallam Dyusta kasushpa, rin kawsaq paywanqa. Piru palanganukunaqam mana Dyuswan rinllapachu kawsaq.

¹⁸Suq kamachikuq runam Jisusta kayshina tapurqan: —Allin yach'achikuq Taytitu, ¿imatam atini rurayta, Dyuswan tukuy tyimpu kawsanaypaqqa? nishpa.

¹⁹Chaymi Jisusqa nirqan: —¿Imaraykutaq niwangi: “Allin” nishpaqa? Tayta Dyusllam allinqa. Manam masqa kanchu.

²⁰Qamqam yach'angi Dyuspa Santu Librumbi kamachikushqambaq: “Warmiyuq kashpaqa, ama suq warmiwanqa puñuychu. Ama wanchikuychu. Ama suwakuychu. Ama yanqaqa pipaqpis llullakuychu. Taytaykita, mamaykita rrispitay”, nishpa.

²¹Chayshina Jisus niptinqam, chay runaqa nirqan: —Tukuy kaykunatam wambraymandapacha kasushqa kani, nishpa.

²²Chayta uyashpaqam, Jisusqa nirqan: —Kaysitullam faltashungi ruranaykipaqqa. Tukuy ima kaqnikita randikushpa, chay mana nimayuqkunata qoy. Chayshina qoshpaqam, syilupi tukuy imayuq ringi kaq. Chaymandaqam shamuy, noqawan purinayki, nishpa.

²³Chayta niptinqam, chay runaqa limpu malaganayarqan, ancha kapuq kashqanrayku.

²⁴Chaymi Jisusqa, ancha malaganayaqta rikashpaqa nirqan: —Ancha trabajusraq, kapuq runakuna Dyusta kasunanllapa, paywan kawsananllapa.

²⁵Ancha trabajusraq kanman, chay atun animal kamillu awjap rinrinda pasanambaq. Piru mas trabajusmi kanman, suq kapuq runa Dyuswan kawsanambaqqa, nishpa.

²⁶Chaymi chayta niptinqa, chay uyaqkunaqa tapurqan: —Chayshina kaptinqa, ¿pitaq atinman washakayta? nishpa.

²⁷Chaymi paykunataqa nirqan: —Runakunallaqam mana nimatapis atinmanllapachu washakayta. Piru Taytanchiq Dyusmi atin washaytaqa, nishpa.

²⁸Chaymandaqam Pidruqa nirqan: —Taytitu, noqaykunaqam tukuy imayllapata dijashqallapana kani, qamwanna purinaypaqllapa, nishpa.

²⁹Chaymi Jisusqa nirqan: —Alliptam niykillapa, mayqan runa dijaq wasinda, taytanda, mamanda, masangunata, warminda, wambrangunata, Dyusta kasunambaq,

³⁰chay dijashqambaq mas achkata rin ch'askiq kay mundupiqa. Piru manam chaytallachu rin ch'askiqqa. Ashwanmi syilupi tukuy tyimpu rin kawsaq Dyuswan, nishpa.

³¹Jisusmi yach'akuqningunatalla suq laduman apashpa, nirqan: —Kananqam anaq Jirusalinmanna rinchiq riq. Chaqa Dyuspaq rimaqkuna noqapaq yumbay nishqangunaqam Jirusalimbi rin kumpliq.

³²Chaypiqam furastiru runakunamanna rinllapa intrigakuwaq. Kanan mana baliqkunata niwashpam, rinllapa asipawaq. Suq lastima rurawashpam, rinllapa tuqapawaq.

³³Asutiwashpam, rinllapa wanchiwaq. Piru kimsa diyamandam rini kawsamuq, nishpa.

³⁴Piru chayshina Jisus niptinqam, chay yach'akuqningunaqa mana intyindirqanchu: ¿Imapaqraq chayshinaqa nirqan? nishpa. Chaqa yuyayninllapa tutayaqpishina karqan. Chaymi mana atirqanllapachu intyindiyta.

³⁵Jisus ch'ayaykaptinna Jiriku llaqtamanmi, suq sarku runa ñambi tiyashpa, limush'nata mañakuykarqan.

³⁶Chaymi ancha achka runakuna chayta pasaykaqta uyashpaqa, tapurqan: —¿Imataq kashqa? nishpa.

³⁷Chaymi paytaqa nirqanllapa: —Jisus Nasaritmanda kaqmi kayta pasaykan, nishpa.

³⁸Chaymi payqa ancha jwirtita qayakurqan: —¡Unay Dabidpa Karu Willkan Jisus, llakipawayri! nishpa.

³⁹Chaymi Jisuspa ñawpanda riqkunaqa chay sarkutaqa anyarqanllapa uyaranambaq. Piru payqam ashwamba mas jwirtita qayakurqan: —¡Unay Dabidpa Karu Willkan, llakipawayri! nishpa. Nuta: “Unay Dabidpa Karu Willkanmi” munan niyta: “Dyus Akrashqan Washadur”, nishpa.

⁴⁰Chaymi Jisusqa riykashqanmanda shayashpa, kamachirqan: —Riyllapa apamuy waq runata, nishpa. Ch'ayachiptinqam, Jisusqa tapurqan:

⁴¹—¿Imatam munangi ruranaypaq qambaqqa? nishpa. Chaymi chay runaqa nirqan: —Taytitu, munanim ñawiykunata kach'akachinayki chapakunaypaq, nishpa.

⁴²Chaymi Jisusqa nirqan: —Noqapi allita kriyishqaykiraykum niyki, chapakuy, nishpa.

⁴³Chayta niptinllam, chay runaqa chay uras atirqanna rikakuyta. Chaymi Tayta Dyusta ancha alabashpa, Jisuspa ikindana rirqan. Kanan yumbay rikaqkunapismi Taytanchiq Dyusta ancha alabarqanllapa.