Lukas 2:29-46

²⁹“Io-oa Manetualain! Manetualain tao tuka hehelu Na neuꞌ au so. De besaꞌ ia, Ana bisa poꞌi na au so, fo ela au mate no tesatei-tamadaleꞌ,

³⁰nana huu au ita Lahenda fo Manetualain feen mai so, ela soi-tefa na ami meme sala-sikoꞌ a mai!

³¹Manetualain nau pake Anaꞌ ia fo fee basa nusaꞌ a sodaꞌ.

³²Ria neuꞌ ko sama leoꞌ makaledoꞌ a, fo neni hada-horomata fee Manetualain lahenda Israel nara. Ria sama leoꞌ makaledoꞌ a boe, fo natudu Manetualain eno na fee basa nusa fekeꞌ ara.”

³³Yusuf no Maria, ramanene tou lasi Simeon a dedea nae leoꞌ na laꞌeneuꞌ sira Ana na, boe ma roi ramakokoaꞌ a.

³⁴Basa boe ma, Simeon dedea fee si ua-naleꞌ. Ana nafada Maria nae, “Yesus maman, ee! Neuꞌ ko lahenda dodouꞌ rai Israel tipa heni Anam ia. Tehuu sira nonoi-tatao nara neuꞌ Ana, neuꞌ ko natuda seluꞌ asa. Anam ia, boe tao na lahenda dodouꞌ dale nara ramahoꞌo-ratadale.

³⁵No ria na, neuꞌ ko Manetualain buka lahenda ra dale nara reu loan. Tehuu Maria, o neuꞌ ko hapu doidoso mabera a, sama leoꞌ tafaꞌ a pau losa ate-baa mi.”

³⁶Nai Uma Mamaso Ina a boe hapu ina lasiꞌ esa, nade Hana. Teu ni falu hulu haa so. Papa na nade Fanuel, neme Aser leo na mai. Ana sao teuꞌ hitu, boe ma saotou na mate ni de mesaꞌ ana. Besaꞌ Hana nana Manetualain mana nesi matan. Nonoi na, riꞌ hule-haradoi ma puasa nai Uma Mamaso Ina a, fo hatu-leledon doꞌo-tabe neuꞌ Manetualain.

³⁸Fai fo Simeon dedea no Yusuf ma Maria, besaꞌ Hana naneneaꞌ leo mata neu, de namanene si. Boe ma ana io-oa neuꞌ Manetualain. Ana nafada neuꞌ lahenda kadodouꞌ fo rahani Kristus mamai Na. Ana nae, Ana ria nana Kristus, Maneꞌ fo riꞌ Manetualain helu basa neuꞌ ko poꞌi-tata na lahenda Israel ara.

³⁹Tepoꞌ fo Yusuf no Maria tao ratetu baꞌi Musa atoran ara katemaꞌ nai kota Yerusalem, boe ma ara fali leo sira koro Nasaret na reu, nai propinsi Galilea.

⁴⁰Yesus nambau-ina, boe ma Ana tamba mapii-baraꞌaiꞌ, malelaꞌ, ma bubuluꞌ hihii-nanauꞌ dodouꞌ. Huu fo Manetualain natudu dale malole Na neuꞌ Ana.

⁴¹Tuka-tuka teuꞌ, Yusuf no Maria leo kota Yerusalem reu, fo raa feta Paska nai na.

⁴²Tepoꞌ fo Yesus teun sanahulu dua, faiꞌ esa boe ma ara leo Yerusalem reu belaꞌ a, fo raa feta sama leoꞌ bale-bale.

⁴³Fai Paska a basa ni, boe ma Yusuf no Maria fali Nasaret reu sama-sama ro lahenda kadodou inaꞌ fo nau fali leo Galilea reu a. Tehuu ara ta bubuluꞌ, rae foa ela Yesus nai Yerusalem. Ara raendobuko Ana laꞌo sama-sama no tia-lai nara. Tehuu losa ledo leodae na, ara ta rita Ni fa. Boe ma ara mulai saka Ni reu-mai nai kileoboboki a ma tia-lai nara.

⁴⁵Huu no ta raneta roon fa, boe ma ara ratafali reu saka Ni nai Yerusalem.

⁴⁶Ara saka Ni nai na losa faiꞌ telu, besaꞌ ko raneta roon nai Uma Mamaso Ina daleꞌ. Ana natuuꞌ natatane aoꞌ no mesen agama Yahudi ra.