Lukas 2:29-46

²⁹“Koa-kiok neu Lamatuak! Lamatuak tao natetu Ndia hehelun neu au so. De, hatematak ia, Lamatuak bisa nakamboꞌik au so, fo ela au bisa mate no ndoo-ndoo,

³⁰huu au ita Hataholi fo Lamatuak haituan mai so, fo Ana tao nasoda ai mima ai sala nala mai!

³¹Lamatuak nau pake kakanak ia, fo tao nasoda basa hataholi nusa kala.

³²Dei fo Ndia sama leo masaꞌak, fo neni hada-holomata neu Lamatuak hataholi nusa Israel asa. Ndia boe oo, sama leo manggaledok, fo natudu Lamatuak dalan neu basa hataholi nusa feꞌe kala.”

³³Lamanene leo ndia, boe ma Yusuf no Maria heran lalan seli, no hata fo tou lasi Simeon kokolan laꞌeneu sila anan.

³⁴Basa ndia, boe ma Simeon kokolak babaꞌe-babatik fee sala. Boe ma ana nafada Maria, nae, “Yesus inan aa! Dei fo hataholi luma lai Israel, timba heni ina Anan ia. Tehuu sila tataon neu Ndia ndia, dei fo natuda nasafali sala. Ina Anan ia boe oo tao namahoko hataholi luma dale nala.

³⁵No leo ndiak, na, dei fo Lamatuak tao nakaholak hataholi la dale nala. Tehuu o Maria, dei fo o hambu doidosok belak, sama leo tafa nana mbauk neu o mboꞌom.”

³⁶Nai Uma Ina Huhule-haladoik, hambu ina lasik esa nade Hana. Ndia teun teuk falu hulu haa ia so. Ndia aman, nade Fanuel, neme leo Aser mai. Ana sao teuk hitu, boe ma saon mate laꞌo elan. Bei Hana ndia, na, Manetualain mana kokolan. Ndia uen, ndia hule-haladoi, ma puasa nai Uma Ina Huhule-haladoik, fo nakaluku-nakatele neu Manetualain nai leledo-leꞌodaen.

³⁸Ledoeik Simeon bei nakokola no Yusuf ma Maria, tehuu ina lasik ndia neu deka-deka so. Boe ma, ana namanene neu sala, de ana soꞌuk koa-kiok neu Manetualain. Basa de, ana kokolak laꞌeneu Yesus neu basa hataholi la, fo lahahanik Manek fo Manetualain heluk ndia so, fo haituan mai, suek nakamboꞌik hataholi nusa Israel.

³⁹Ledoeik Yusuf no Maria tao tungga basa baꞌi Musa heti-heun, nai kota Yerusalem, boe ma, ala fali leni propinsi Galelea fo sila nggolon, Nasaret leu.

⁴⁰Yesus inahuu mai, de Ana boe balakai, nalelak, ma bubuluk dedeꞌak noꞌu kala. Manetualain boe oo, natudu dale malolen neu Ndia.

⁴¹Tungga-tungga teuk, na, Yusuf ma Maria laꞌo leni kota Yerusalem leu, fo laꞌa feta Paska nai ndia.

⁴²Laꞌi esa, faik fo Yesus teun sanahulu dua, boe ma ala laꞌo noꞌu leni Yerusalem leu, fo ala tungga laꞌa feta sama leo natetemek.

⁴³Ledoeik fai-fai Paska basan so, boe ma Yusuf no Maria mulai laꞌo fali leni Nasaret leu, lo hataholi noꞌu kala mana sangga fali leni Galelea leu boe. Tehuu tala bubuluk, tehuu Yesus nana laꞌo elak nai Yerusalem. Laehetuk Ana laꞌo noꞌu no Ndia nonoo nala. Losa bobok, tehuu ta lita sana. Boe ma, ala laꞌo lafeok, leu sanggan nai sila bobonggi nala ma nonoo nala.

⁴⁵Huu ta latonggo lo Ndia, de ala fali leni Yerusalem leu seluk, fo ala nau sanggan nai ele.

⁴⁶Losa ele, boe ma ala sanggan losa faik telu, bei fo latonggo lo Ndia nai Uma Ina Huhule-haladoik dalek. Ana nanggatuuk natane-nataak no mese anggama Yahudi la.