Lukas 2:29-46

²⁹“Koa-kio Manetualain! Manetualain tao tungga Ndia hehelu-bartaan neu au ena. Dadi hatematak ia Manetualain bisa nakamboꞌik au, mita fo au bisa mate no mole-damek,

³⁰huu au mete-ita Hatahori fo Manetualain nadenun mai ena, fo tao nasoi-nasoda ai numa ai sala-singgon nara mai!

³¹Manetualain nae pake Kakanak ia fo tao nasoi-nasoda basa hatahori nusa-nusak kara.

³²Neu ko Ana sama leo saꞌak, fo neni hada-horomatak soa-neu Manetualain hatahorin Israꞌel asa. Ana oo sama leo manggaledok boe, fo natudu Manetualain eno-dalan soa-neu basa hatahori nusa-nusak laen nara.”

³³Yusuf no Maria ramanene rala naa, boe ma ara heran bali-bali neu hata fo baꞌi Simeon kokolak laꞌe-neu sira Anan.

³⁴Basa naa Simeon fee babaꞌe-babatik neu sara. Boe ma nafada Maria nae, “Yesus inan, ee! Neu ko hatahori noꞌuk ka rai Israꞌel timba-ndundu heni ina Anan ia. Tehuu sira tatao-nonoꞌin neun naa, neu ko natuda falik kasa. Ina Anan ia oo tao nala hatahori noꞌuk ka dalen mbena sau-sau boe.

³⁵No dalak naa, neu ko Manetualain buka nakambela hatahorir dalen. Tehuu Maria, neu ko o hambu susa-sona moꞌok, nok bali mbau dombe tafak neu o tende boam.”

³⁶Numa Uma Huhule-haradoi Ina-huuk oo hambu ina lasik esa boe, nade Hanaa. Teun nara falu hulu haa. Aman, nade Fanuel, numa leo Aser mai. Ana nauma-loo teuk hitu, boe ma saon mate laꞌo elan. Beꞌa Hanaa ia, Manetualain mana toꞌu dedeꞌan. Ue-tataon soa hule-haradoi ma puasa nai Uma Huhule-haradoi Ina-huuk, fo nakaluku-nakatele neu Manetualain hatu-leledon.

³⁸Neu Simeon kola-kola no Yusuf ma Maria, ina lasik naa mai deka-deka. De ana namanene sara, boe ma ana koa-kio Manetualain. De ana kokolak laꞌe-neu Yesus soa-neu basa hatahori mana rahani Manek fo Manetualain helu-bartaa ena nae, nau nadenun mai fo nakamboꞌik hatahori Israꞌel asa.

³⁹Neu Yusuf no Maria tao tungga basa baꞌi Musa hohoro-lalanen lalaꞌen numa kota Yerusalem ena, boe ma ara fali reni profensi Galilea reu, nai sira nggoron Nasaret.

⁴⁰Yesus oo namoꞌo mamais a boe, Ana tamba nakadere, tamba nalela ma Ana bubuluk dalak noꞌuk ka. Manetualain oo natudu dale susuen neun boe.

⁴¹Tungga teuk, Yusuf no Maria reni kota Yerusalem reu, fo raꞌa feta Paska numa naa.

⁴²Laꞌe esa, neu Yesus teun nara salahunu dua, ara oo laꞌok sama-sama reni Yerusalem reu fo tungga feta naa leo biasa boe.

⁴³Fai Paska nateꞌe, boe ma Yusuf no Maria laꞌok fali reni Nasaret reu rambalololok ro hatahori noꞌuk ka, fo fali reni Galilea reu. Tehuu ara ta bubuluk laꞌo ela Yesus numa Yerusalem. Ara duꞌa rae, fama te Yesus nambalololok no nonoon nara. Tehuu losa bobok, ara ta mete-rita sana. Boe ma ara mulai sangga reu-mai, ndule basa bobonggin nara ma nonoon nara.

⁴⁵Huu ara ta ratonggo roon, de ara lenggu fali reni Yerusalem reu, fo rae sanggan nai naa.

⁴⁶Losa naa, ara sanggan losa faik telu dalen, dei de ratonggo roon numa Uma Huhule-haradoi Ina-huuk dale. Ana nanggatuuk nakaseseluk dedeꞌak no meser anggama Yahudir.