Lukas 2:29-46

²⁹“Naka Ama Lamtua! Ta Ama Lamtua daek muid asa man Un in hid au ka son. Tiata Ama Lamtua bisa sao auk tia, le halin nam auk mateng nol babanan,

³⁰ta auk net Atuling man Ama Lamtua tunang maa, le bel boa-blingin kaim deng kaim in kula-sala ngias sa son!

³¹Ama Lamtua pake Tana-ana nia, le bel boa-blingin bangsa-bangsa lias totoang.

³²Mam Un banansila el langa in kaloeꞌ, man kil in todan bel Ama Lamtua bangsan Israel las. Un kon banansila el langa, man tulu Ama Lamtua lalan na bel totoang bangsa didang ngas sa.”

³³Ming ela kon, Yusuf nol Maria herang isi nol asa man ama Simeon in aa deng oen Anan na ka.

³⁴Hidi nam, Simeon aa le bel oen hangun. Un kon tek Maria noan, “Yesus mama! Mam atuli hut mamo se Israel hutun soleng maam Ana kia. Mo oen in tao saol Una ka, mam tom bali one. Maam Ana ki kon, tao atuli hut mamo dalen kolo.

³⁵Nini ela lam, mam Ama Lamtua tek tulu-balang totoang atuli li dalen in banan-daat ta. Mo ku, Maria, mam haup in susa-daat ngele, banansila el suli in hai tama lako se ku hupum ma ka.”

³⁶Se Um in Kohe-kanas Tene ka kon muik blalan bihatang mesa, ngala Hanaa. Un umur buk palu beas aat son. Un ama ka, ngala Fanuel deng ngaal Aser. Un saap hidi taun iut kon, un sapa-bikloben na mate nang una. Upung Hanaa nam mo, Ama Lamtua Allah mee-baha. Un in daek lelo-duman na, kohe-kanas nol telang se Um in Kohe-kanas Tene ka, le todan-lahing Ama Lamtua Allah.

³⁸Dedeng Simeon in aa nol Yusuf duas Maria ka, blalan bihatang na maa dadani le hii one, kon un naka-naka Ama Lamtua Allah. Hidi nam, un aa deng Yesus apa ka, bel totoang atuil in nata-natang Lahing man Ama Lamtua hid son, le tunang maa halin sao puting bangsa Israel las sa.

³⁹Daek muid upung Musa atorang ngas totoang hidi se kota Yerusalem kon, Yusuf nol Maria pait lakos propinsi Galilea, se oen ingu la, iung Nasaret.

⁴⁰Kon oen Anan Yesus tene maa, Un apa ka kuat-tes, hidim Un taan taplaeng, nol Un kon nangan taan dasi mamo. Ama Lamtua Allah kon tulu dalen banan na bel Una.

⁴¹Taun-taun nam, Yusuf nol Maria lakos kota Yerusalem, le muid fesat Paska se las.

⁴²Oe mesan na, dedeng Yesus umur taun hngul dua kon, oen leo-leo lakos se Yerusalem le muid fesat Paska el in biasa ka.

⁴³Lelo-leol Paska las mana le hidis kon, Yusuf nol Maria pait lakos el Nasaret, leo-leo nol atuil hut mamo man in pait lakos Galilea ngas. Mo oen taan lo, molota Yesus dada bii ne Yerusalem. Oen bali le Un laok leo-leo nol Un tapan nas. Mo didiin lelo-maun kon, oen net Un lo. Tiata oen lako-pait le nuting Un se oen nenan nas nol oen tapan nas.

⁴⁵Undeng tutnalan lo, tiata oen pait lakos Yerusalem le nuting Un se lua.

⁴⁶Lakos lius se uas kon, oen nuti-nuting Un didiin lelo tilu, halas-sam tutnalan se Um in Kohe-kanas Tene ka dalen. Un daad le keket-ketan nol guru-guru agama Yahudi las.