San Lucas 2:29-46

²⁹Miya Diosi, la nube penenato, amana pansi puyaniiyanae tinue.

³⁰Nu tenhisa carica jun tsa patinae. Lachi cacachinan nu ereca jun se larimin tsachica quiranayoe tinue.

³¹Nu in náca piyanlelachi tenchi eree.

³²Israelítala nuchi tsachila joto in nabe tsara se inola jochunae tinue. Yari uyanlachi tenchi tseno cuwenta jochunae. Junni Simeonni ya Jesús na nacaca tsanque cuenta quinue.

³³Junni tsanque panunca meráto, yachi ayanbe Josebe wepanato meralaquinue.

³⁴Junni Simeón yalacanan seque pato, ya nachi ayan Maríabe itsantinue: —Meráde! tinue. In na tenchi duque israelítala epe tsachi ilaichunae. Uyanla ya tenchi fécari sen ilaichunae tinue. Layanla yabe miituchi tito, duque seitonque palaquichunae tinue.

³⁵In nabe duque tsachilachi tencaca miintsan jochunae tinue. Seque tenca camin jonunca, o seitonque tenca camin jonunca miintsan jochunae tinue. Junsi nuchi tencabinan duque laquiichunae tinue espada polarica cuwenta.

³⁶Simeón tsanque pánasa, Diosichi mantate pamin sona manca janue Ana mumun. Yari Fanuélichi nama joto, Aser bolon israelita sona jominue. Junni aman ya Ana duque sinuca jominue. Moso jono mate casalaica jomin joto, aman siete watate yachi unila puyaca jominue.

³⁷Junni ya sonari biuda chuminue ochu chunca junpalu wata tano fecári. Diosichi yabi nechi lotuto, quepen, malon Diosichi tenchi ticatiya quito chuminue. Ano fitunca ito, Diosibe rocaito chumin jominue.

³⁸Junni ya Ana Jesúlachica jato, Diosibe acradeseinue. Aman junni Jerusalenbi weyanlari méraminlanue se larimin tsachi Diosi ereca jun jasa. Junni Ana jerale yalabe Jesuca cuenta quinue.

³⁹Junni Miya Diosi mantacaca jera quetobi, Jesula Galilea toca manjilainue. Yalachi puebloca manjilainue Nasaret tinun puebloca.

⁴⁰Junni na uwainato, tenca tan sonban uwainue. Diosi yaca laquirato ayudainaminue.

⁴¹Junni wata cura Jesuchi ayanbe Josebe Jerusalenca lomin jominlanue casá ma fiesta quirabi.

⁴²Junni Jesús chunca palu wata tasa, tsanque lolainue casá ma fiesta quirabi.

⁴³Junni fiesta jerainunbi, Jesuchi ayanbe Josebe manjilainue. Junni Jesús nalalan jotonan manjitunue. Jerusalenbi purainue. Junni yachi ayanbe Josebe man wa bolonbi nenato, tenhitulajonue Jesús itonunca. Yalari amicolabe manjanhinae tito, man malon quiratuto jinilainue. Aman quebi inasa Jesuca neyalaquinanue. Familialachibinan, quiranunlachibinan neyalaquinue.

⁴⁵Junto Jesuca manfetuto, Jerusaléncanan manjilainue. Jesuca neyade neyade jilainue.

⁴⁶Junto aman peman mate ya náca Diosichi yabi manfelainue. Diosichi fiquica micariminlabe chuto, yala pánaminca meráto, yalabenan manpanhanaminue.