Luk 2:29-46

²⁹“Labino, uniri un ulangolango ru iau, anum a tultul, sur an nan nama malmal, elar ut nama num a liliman torom iau.

³⁰A sa tama tar a Tene Ulaun namin matang, a Tene Ulaun ra u tulu ru i.

³¹U sa waninar tari umatan a kum kabotaro rop.

³²I a talapor sur in utalapor anum a kisapi torom det ra awu sur a taro Israel, ma sur a minamar torom anum a taro Israel.”

³³O tamano ma o nano der kisin doko una kum wasiso ra o Simion i watungi un o Iesu.

³⁴O Simion i watung udan detul, ra i watungi tan o Maria, o nan o Iesu, lena, “Tama i, a nat ri, o God i pilok pasi sur a susut na te Israel det in iru uni, ma a susut kai det in laun uni, ma sur a ukinalong ra a susut na taro det in rosumur gusuni.

³⁵Ra det in rosumur gusuni, in upuaso a kum nuknuk tagun a balandet. Ma ui, a tupunuk ra un taramo i in elar namin totok na inaim ra in so anum a nilaun.”

³⁶Ara ino bulung, a poropet, a risano o Ana, a nutun o Panuel, tagun a kabotaro Aser. I sa takano laulau, i sa tiwal na noino ma wat na kilalo anunu ma i ula mukut. Der nolin pas kut a wonom mawit na kilalo, ra numur anun a musano i mat. A ino ri ke wan taru gusun a rumu na etabor, i ser lotu una kum mirum ma a waspi, i ser wewel ma i ser wararing.

³⁸Una du bung utra, i wanpat torom detul, i watung wakak pas torom o God, ra i wasiso puaso una nat torom det rop ra det ser kis langlang sur o God in ulangolango pas a taro Jerusalem.

³⁹O Josep ma o Maria der sa pam sot pas a kum utna rop elar nama Warkurai anun a Labino, ra numur detul milet melet utong o Galili, sur anundetul a tamon, o Nasaret.

⁴⁰Ra a nat i labo pat nanan, ma i dekdek nanan, ma i bukus nama mananos, ma a marmaris anun o God i kis uni.

⁴¹Una kum kilalo rop o taman o Iesu ma o nano der ser wan usapat o Jerusalem una labino bung na lotu na Wanlakai.

⁴²Ra i sa noino ma aru kilalo anun o Iesu, detul wan usapat o Jerusalem sur a labino bung na lotu na Wanlakai, elar ut nami ra det ser pami.

⁴³Ra a labino bung na lotu na Wanlakai i sa rop, det turpas a inawan sur det in milet melet, ma o Iesu i kis sikot kut sapat o Jerusalem, ikut o tamano ma o nano ka der tasmani.

⁴⁴Der nuki lena, det wan tomo nama taro. Ra det sa wan ara bung una nundet a milmilet, der turpasi sur der in sisio sur o Iesu nisan a kum kukundetul, ma a kum paspasan detul.

⁴⁵Ra der lagano sisio taru suri, der milet melet usapat o Jerusalem, ra der sisio mo suri sapat.

⁴⁶Ra der sa sisio pas a tulu bung, der tama torom pasi ubalan in noworo ina rumu na etabor. I kis tomo nama kum tene ususer tagun a Warkurai, i longoro det, ma i ting det.