Lukas 2:29-46

²⁹“Non Soke lem hekuleileinga ana non koi iau. O longala ke e mete sio ke nek mana ol. Iange lem helenga pete tote

³⁰ke enau tote lem hemasinga ana non nga matak pengpeng.

³¹Pe iong sipom otal hote i ke hulua lochloch te esia nga mataria pule

³²ke pomanga lemenge palaungana nge tualeme hatalia kue nge hana lomona mur ke iong o mene mule iri. Pe lape hulua te esia i pe te heto heke lem hana mur nge Israel.”

³³Iosep iri nai Maria te longe non nem na helenga pe te rura totoia.

³⁴Simion pete iri pe hele lange Maria, “Tum sune nem lape helosio ia hulua halang nge Israel pe pule lape hemaul heke mule hulua halang pule nge Israel. NeHalang henonou hote tum sune nem ke hemallaha hote NeHalang lemene ngana nga ich pe hulua lape lemeria ero ia pe te hele poreke i.

³⁵Pe i lape hemallaha hote hana leteria tuanin ngana mur nenge te talkome nga leteria toto. Pe iong lape o amneia melmelenga palaungana nga letem kolkol ngana mur pe lem tanginga mur ke pomanga io nge mes teu nga singim.”

³⁶Hei pakar e i hetatalonga pule. Ene laka Ana. Pe he neu temene ene laka Panuel. Pe i tu teu nga mata nenge Asa. Hei neu lei mukam ke iri nai ene tetu ke aria hesinga iri rahtele nai ol pe ene mete. La ke la hei pakar neu tu ke i toro kela tuauna toto ke ana hesinga iri ana non kina henel pe henel (84). Pe kokoes mana la ke umume nga NeHalang na pele pe heto hekeke NeHalang. Heo nga ngaunga pe hetalaulau manmana.

³⁸Pe nga etue neu saolia Iosep iri nai Maria nge te laia Iesus nga NeHalang na pele. Saolia iri pe heto heke NeHalang sapele pe heleia kol sune neu lange iri nenge te kulele mene etue nenge lape NeHalang mene mule Israel mur.

³⁹Iosep pe Maria te nanas taua Non Soke nena hotonga ke het pe tela mule sapele nga reria kileng nge Nasaret nge Kalelea.

⁴⁰Pe turia Iesus pupuo ke soke pe letena matana ngana urana toto pe NeHalang pete tote i.

⁴¹Nga hesinga lochloch Iosep iri nai Maria telala nge Ierusalem nga ngaunga matana nenga Ingatoto.

⁴²Iesus ana hesinga iri analoch pe nai pe iri ul ke tela ke pomanga reria poinga nike.

⁴³Iok, etue palaungana neu het pe Iosep iri nai Maria tela mulmule nga reria kileng pe iri nai te teke ma Iesus koi iri ul ke teii. Teii ke sase toto lo, ol pe te rara sapele Iesus pe la te ontei rere i nge aloria mur pe pekngaria mur.

⁴⁵Pe te hottaua i ero toto. Ol pe tela te tango rara mule i nge Ierusalem.

⁴⁶Pe nga etue mol ngana te hottaua i nge are luluch nge hetoronga ana hana mur nga NeHalang na pele palaungana letena. Pe i kila ke longo lala nge hana nemur pe onteiteia iri pule.