Lukas 2:29-46

²⁹“Koa-kio kolongara Lamatua! Lamatua tao le madhutu lii pajaji Na mi dedha jaꞌa. De neꞌe ne Lamatua bisa le patabuli jaꞌa, sèna ka jaꞌa madhe dènge mera-milu,

³⁰te jaꞌa kèdhi le Dhèu dhu Lamatua pua mai, ho patabuli jiꞌi nèti koasa sasala-sasigo jiꞌi!

³¹Lamatua neo pake Ana neꞌe, sèna ka hia mamuri mi suku aaꞌi-aaꞌi.

³²Nèngu nuka sèmi saraa, dhu pakabꞌua suku-suku Israꞌel, dhèu Lamatua sèra. Nèngu kahèi èci èèna ka dènge saraa, dhu padꞌelo jꞌara Lamatua, pala mi suku-suku leo kahèi.”

³³Ropa tadèngi sèmi èèna, hèia Yusuf dènge Maria malaa lula lii padhai dhu Simeon peka lula-nèti Ana rèngu ne.

³⁴Èle ka Simeon padhai lii hia si mèngi-nale. Hèia na peka dènge Maria, aku nèngu na, “Ina Yesus! Bèli-camèdꞌa dhèu ae ètu Israꞌel tule eele Ana èu ne. Te ngaa tatao rèngu mi dedha Nèngu ne, èèna na pamanahu hari rèngu. Ana neꞌe, bèli-camèdꞌa pakarejꞌe dꞌara dhèu ae kahèi.

³⁵Dènge jꞌara èèna, Lamatua bhoke patalele dꞌara dhèu. Te ngaa èu, Maria, pe mu paraga dènge jꞌajꞌèra ae-ae, nuka sèmi samala dhu lose adhe-usu èu.”

³⁶Ètu Èmu Kapua Manèngi-Mangajꞌi, abhu kahèi bhèni heka ca dhèu, ngara na Hana. Umur na, aru nguru èpa tèu kèna. Ngara ama na Fanuel, nèti suku Aser. Na leo-èmu pidhu tèu, ka dhèu èmu na madhe. Hana ne, dhèu nèti lii padhai Ama Lamatua. Nèngu loe boe sabajꞌa dènge puasa ètu Èmu Kapua Manèngi-Mangajꞌi, ho pahaha iisi mi Ama Lamatua mèda-mèu.

³⁸Lodꞌo Simeon padhai lii dènge Yusuf dènge Maria era, hèia Hana mai padètu-dètu. Ka nanene si padhai lii, hèia na koa-kio kolongara Ama Lamatua. Ka na padhai lii lula-nèti Yesus mi dhèu aaꞌi-aaꞌi dhu tatae mamai Dhèu Aae dhu Lamatua lii dhu moa tèke neo pua mai, sèna ka patabuli dhèu Israꞌel.

³⁹Ropa Yusuf dènge Maria tao le madhutu atora nèti baki Musa ètu kota Yerusalem, ka ra lèpa asa rae Nasaret, ètu propensi Galilea.

⁴⁰Ka Yesus asa kapai, asa èra, asa dꞌèlu-mèu dènge neꞌa madha jꞌara ae-ae. Aa Ama Lamatua padꞌelo dꞌara hua iia Na mi Yesus kahèi.

⁴¹Yusuf dènge Maria dhu tema le, tèu mai-tèu mai lasi asa kota Yerusalem ho madhutu kalela Paska ètu nèi.

⁴²Ca tèka, ropa umur Yesus canguru dua tèu, hèia laꞌe palere dènge ina-ama Na asa Yerusalem, lasi raꞌa kalela Paska sèmi biasa.

⁴³Lodꞌo èle Paska, Yusuf dènge Maria mulai lèpa lasi asa Nasaret palere-lere dènge dhèu ae dhu lèpa asa Galilea. Te ngaa rèngu reꞌa boe, na, Yesus ètu Yerusalem era. Ra pangee, na, Nèngu palere dènge mone aanga-angalai Na. Te ngaa ropa dꞌai lodꞌo nihia, Yusuf dènge Maria rèdhi boe Ne. Ka dua ra mulai patangi-tenge kèna. Lasi pakarèi mi aꞌari ra, aa mone aanga-angalai ra.

⁴⁵Lula rage boe Ne, hèia dua ra lèpa hari sa Yerusalem, lasi tenge Ne ètu nèi.

⁴⁶Dꞌai nèi, ra patangi-tenge Ne toke tèlu lodꞌo kateme, heka paraga dènge Ne kèna, ètu dꞌara Èmu Kapua Manèngi-Mangajꞌi. Nèngu dhu madhèdi padhue-padhai dènge mese agama Yahudi sèra.