Lukas 2:29-46

²⁹“Haꞌu ktonu Naꞌi Maromak! Tan Nia nalaꞌok mamenon baa haꞌu tiꞌan. Oras neꞌe, Naꞌi Maromak bele nabusik haꞌu, nebee haꞌu kmate no-nook ona.

³⁰Haꞌu karee tiꞌan Ema mak Naꞌi Maromak solok mai atu sori ita nosi itakaan salan!

³¹Naꞌi Maromak nakara nodi oan neꞌe atu sori ema klubun hotu-hotu.

³²Nia atu dadi hanesan kroman. Nia atu nodi kneter bodik Naꞌi Maromak eman Israꞌel sia. Nia moos atu natudu Naꞌi Maromak dalan loos baa ema seluk sia.”

³³Rona nola nunia, Yusuf no Maria blaar karin tan katuas Simeon nasee nunia.

³⁴Hotu, Simeon nusu matak-malirin bodik sia. Nia moos katak kedan baa Maria naꞌak, “Yesus inan! Ema waꞌin iha Israꞌel neꞌe atu dudu sees oan neꞌe. Mais nosi ikus, siakaan hahalok nia atu nahonu fila sia. Oan neꞌe moos atu nalo ema waꞌin neon boot.

³⁵Hodi nunia, Naꞌi Maromak loke hotu ema neon. Mais rona! Ina atu hetan susar todan, hanesan surik naruk sona borut okaan hirus.”

³⁶Iha Uma Hamulak Huun nia moos, noo ferik ida naran Hana. Niakaan otas tinan walu nulu resin haat tiꞌan. Aman, naran Fanuel, nosi ema hunun Aser. Ferik nia foin noo laꞌen tinan hitu, laꞌen mate nela tiꞌan. Ferik nia moos Maromak makoꞌan ida mak namulak no nalirin aan loron-kalan iha Uma Hamulak Huun.

³⁸Baa oras Simeon dale baa Yusuf no Maria, ferik nia mai kre-reꞌis nanono sia. Nia rona Simeon dale nunia, nia tonu-naboot Naꞌi Maromak. Nia moos dale kedan lia Yesus bodik ema hotu-hotu mak sei noꞌi nei-nein siakaan Naꞌin mak Naꞌi Maromak nameno atu solok mai sori ema Israꞌel.

³⁹Yusuf no Maria nalaꞌok mohu Bei Musa Ukun-badu sia iha kota Yerusalem tiꞌan, sia moos fila baa siakaan leo Nasaret iha rai Galilea.

⁴⁰Hotu Yesus hetak boot, hetak biit, hetak matenek toꞌo natene lia waꞌin. Naꞌi Maromak moos natudu laran diꞌak baa Nia.

⁴¹Sura tinan, Yusuf no Maria baa kota Yerusalem atu tuir nadahur Paska.

⁴²Dala ida, baa oras Yesus otas tinan sanulu resin rua, sia baa kota Yerusalem bele-bele atu tuir dahur nia.

⁴³Dahur Paska nia hotu tiꞌan, Yusuf no Maria fila baa Nasaret no ema lear mak fila bele-bele baa rai Galilea. Sia la natene naꞌak, Yesus sei nein iha Yerusalem. Sia naneo naꞌak, Nia laꞌo namutuk no Niakaan mamaluk sia. Mais toꞌo loro malirin, sia sei la naree Nia dauk. Hotu sia buka baa-mai iha siakaan familin no mamaluk sia.

⁴⁵Mais sia la netan, sia fila nikar baa buka Nia iha Yerusalem.

⁴⁶Toꞌo nebaa, sia buka Nia loron tolu laran, foin netan iha Uma Hamulak Huun. Nia noꞌi taruka lia fuan no ema manorik ukun Yahudi sia.