Luka 9:33-54

³³I ked lelje o Mojsije hem o Ilija te ciden pe e Isusestar, o Petar phenđa e Isusese: “Gospodarona, šukari amenđe akate so injam. Te ćera trin šatorja: jekh tuće, jekh e Mojsijase hem jekh e Ilijase.” Na džanđa so vaćeri.

³⁴Sar ine vaćeri adava, iklilo jekh oblako savo učharđa len. A o učenici darandile ked učharđa len o oblako.

³⁵I šundilo glaso taro oblako savo vaćerđa: “Akavai mlo Čhavo, o Pomazime! Ole šunen!”

³⁶I palo adava so šundilo o glaso, o učenici dikhle samo e Isuse korkore. I trainde, tegani nikase na vaćerde adalestar so dikhle.

³⁷Tejsato dive, ked o Isus hem o trin učenici huljile tari gora, baro narodo alo te dikhel e Isuse.

³⁸I dikh, nesavo manuš tari gužva lelja te vičini: “Učitelju, molinava tut te pomožine mle čhavese, adalese soi maje jekhoro!

³⁹O bišukar duho but puti napadini le i otojekhvar vrištini; frdela le ano grčevija hem ikljola lestar pena taro muj; uništini le hem skoro nisar na ačhaj le.

⁴⁰I molinđum te učenikonen te ikalen e bišukare duho, ali on našti ine te ikalen le.”

⁴¹A o Isus phenđa: “O, biverakere hem rumime manušalen! Sa edobor vreme injum tumencar, a palem na verujinena. Pučav man pana kobor valjani te trpinav tumen. Ana te čhave akari!”

⁴²I sar o čhavoro avela ine đi o Isus, o bišukar duho frdinđa le ki phuv ano grčevija. A o Isus naredinđa e bišukare duhose te cidel pe e čhavorestar, sasljarđa e čhavore hem phenđa lesere dadese: “Ače to čhavo”.

⁴³Tegani sare inele začudime so dikhle e Devlesoro baro zoralipe. Sar sare čudinena pe ine zako adava so ćerđa o Isus, ov phenđa ple učenikonenđe:

⁴⁴“Šunen šukar akala lafija: Me, o Čhavo e Manušesoro, valjani te ovav predime ano vasta e bišukare manušengere.”

⁴⁵Ali o učenici na xalile so o Isus manglja te vaćeri adaleja. Adava inele olendar garavdo sar te na xaljoven le, a darandile te pučen le so adaleja manglja te vaćeri lenđe.

⁴⁶A o učenici lelje maškara pumende te raspravinen ko šaj olendar te ovel najbaro.

⁴⁷A o Isus džanđa soi lenđe ki godi, lelja jekhe čhavore, čhivđa le uzala peste

⁴⁸i phenđa lenđe: “Đijekh kova primini akale čhavore zbog maje, man primini. A đijekh kova man primini, primini e Devle kova bičhalđa man. Kova maškara tumende pes dikhela sar najtikore, ole o Devel dikhela sar najbare.”

⁴⁹A o Jovan phenđa e Isusese: “Gospodarona, dikhljam nesave manuše sar ano klo anav ikali e demonen e manušendar. Amen o učenici na mukljam lese te ćerel adava, adalese so na džala amencar pala tute.”

⁵⁰A o Isus phenđa lese: “muken le te ćerel adava, adalese so okova kova nane protiv tumende, ovi tumencar!”

⁵¹A ked inele paše o dive e Isusesere te ovel vazdime ko nebo, ov zorale odlučinđa te džal ko Jerusalim.

⁵²I bičhalđa nesave manušen angla peste. I on džele i đerdinde ko nesavo gav e Samarijakoro te pripreminen le e Isusese.

⁵³Ali o gavutne na mangle e Isuse adalese so džande da džala ko Jerusalim.

⁵⁴A dikhindoj adava o učenici o Jakov hem o Jovan, pučle e Isuse: “Gospode, mangeja li te phena te huljel taro nebo i jag hem sa te tharel len?”