Luku 9:33-54

³³Anante tare netremoke atrene nevakeno, Pita'a anage Jisasinku hu'ne. Kva'nimoka, amare'ma manunana knare hie. Tatregeta tagufa tona nona kimneno, magora Kagriki, magora Mosesenki, magora Ilaijane. Anama hu'nea kemofo agafa'a antahini' osu'neno hu'ne.

³⁴Pitama anagema nehigeno, hampomo tamino refite nezmentegeno, ana hampompi mani'ne'za koro hu'naze.

³⁵Anante mago agerumo hampopinti eno anage hu'ne. Ama'i Nagri Mofavre, Nagra huhampri ante'nomo'e. Hanki ke'amofona antahimiho.

³⁶Ana agerumo'ma kea huvgama retegeno, Jisasi'a Agrake mani'nege'za amagema nentaza disaipol nagamo'za ke'naze. Ana hiazanku zamagra kea eri tagane'za mani'ne'za, ana knafina mago vahere hu'za ke'naza'zana ozmasamitfa hu'naze.

³⁷Nanterana agonaregati eneramizageno, hakare veamo'za eri hantage'za kantega tutagiha hunte'naze.

³⁸Anante ana vahe amu'nompinti mago nemo ranke huno, Rempi hurami ne'moka, keke hugantoanki, magoke ne'mofavre'niagi ko. Na'ankure agra mago mofavre'ni'e!

³⁹Havi avamumo azeri haviza higeno krafa nehigeno, azeri traka hunetregeno, kentu kentu nehigeno, agremo zuzu nehigeno, azeri haviza hutere mago'agnafina hu'ne.

⁴⁰Nagra kamagema nentaza disaipol nagaku keke huzmante'na, havi avamura humegi atreho huanagi, zamagra humegi atregara osu'naze.

⁴¹Jisasi'a kenona huno, tamentinti osutma fatgo osu vahe ama knafina mani'naze. Nama'a knafi tamagranena mani'nena tmagri knazana erigahue? Avrenka negamofona amare eno.

⁴²Ana mofavrema avreno ne-egeno'a havi avamumo azeri traka hutregeno, mopafi maseno kentu kentu hu'ne. Hianagi Jisasi'a ana havi avamu ke nesuno, azeri so'e huno nefa ami'ne.

⁴³Anama hige'za Anumzamofo tusi'a hihamuma nege'za, antri hu'za zmagogogu hu'naze. Anama hu'za mika'mo'za antrima nehu'za zmagogogu nehazageno, Jisasi'a amage'ma nentaza naga'a zmasamine.

⁴⁴Ama tmasamisua nanekea eritma tamaguafi anteho. Vahe'mofo Mofavrea komoru hu'za ha' vahe'mofo zmazampi avre'za antegahaze.

⁴⁵Hianagi ana nanekea zamagritera frakino me'nege'za ana kea antahi amara osazageno, zamagra ana nanekemofo agu'agesa'a antahi ama osu'za, azeri akona osu'naze. Ana nehu'za ana kegura koro hu'za antahi onke'naze.

⁴⁶Jisasima amage nentaza disaipol nagamo'za, agafa hu'za iza rana manigahie hu'za zamagra zamagra hu'naze.

⁴⁷Hianagi Jisasi'a zamagu'afi nezmageno, osi mofavre avazu huno eme azeri o'netino,

⁴⁸anage huno zmasami'ne, Iza'o ama mofavrema Nagri Nagifi avreno azeri so'ema huntesimo'a, Nagri navreno nazeri so'e hunantegahie. Iza'o Nagrima naveresimo'a, hunantegena e'nomofo avaregahie. Na'ankure iza'o amuno tamifi anteramino manisimo'a, maka'motma tmagatereno ra vahe manigahie.

⁴⁹Joni'a kenona anage hu'ne, Kva nemoka, negonkeno Kagri kagifi, mago ne'mo havi avamura hunetregeta anara osuo huta i'o hunte'none. Na'ankure agra kamagera anteno tagranena vano nosigu hu'none.

⁵⁰Hianagi Jisasi'a anage huno zmasami'ne, tamagra i'o huonteho. Na'ankure tamagrima ha'ma reormantesamo'za, tamagri vahe mani'naze.

⁵¹Agrama monafima marerisia knamo tva'oma nehigeno, Jisasi'a Jerusale kumate vunaku hanave agesa antahi'ne.

⁵²Agra mago'a ke eriza vugotahu vahe huzmante'ne. Zamagra Samaria kumate nevnu'za, mago'azana ko ome retro hu'nenageno vunaku huzmante'ne.

⁵³Hianagi anampi vahe'mo'za ozamavre'naze. Na'ankure Agra Jerusale vunaku hu'negeze.

⁵⁴Ozamavre'nage'ne amagema nentaza disaipol naga'afinti Jemisike Jonike nentahike amanage hu'ne Jisasi antahige'na'e, Ramoka tagra ha'manena monafinti tevemo eramino zamaresniegu nehano?