Luka 9:33-54

³³Eme jahe razo epire Petorozi Jezu ʒiŋuc âzâcnewec: “Qaqazu, sowine ʒira juŋgopeneŋ. Irec manatec boze jahec â moc banaŋ, gore moc, Mosere moc â Eliare moc.” E dâŋ mi mana tarahuc iŋuc muwec.

³⁴Muhame karorac moczi waharâ sâoc‐jopawec. Sâoc‐joparâ foŋjopame motec jaŋe me kike fâfâc ehuc domambiŋ.

³⁵Eme karorac maŋko dâŋ ʒiŋuc fuawec: “Keci joroc Ŋokâ‐nane, ŋoŋe dâŋticne mananʒepieŋ.”

³⁶Eme dâŋ mana manahuc ʒâŋe firâ Jesu buc domame honembiŋ. Eme motec jaŋe wiac honembiŋ i dameŋ ira ŋic mi jajaza mâc maŋkerâ jumbiŋ.

³⁷Hae fureme tikionec wahapie ŋic guru sâkozi ehec bâbâfuac embiŋ.

³⁸Eme izia ŋic jaŋere ŋondeŋkonec moczi ʒiŋuc muhuc Jesu wâsickewec: “Qaqazu, go dâŋnane manarâ ŋokâ‐nane bafickec, e mocjaha mae.

³⁹Manakic, demoŋ moczi hâpome ɋeŋfâfâc jaha owackeekac. Erâ ro fârec ecneme mic tâferu‐ticne wefuekac. Eme demoŋzi motec jâpec mi bebehe ba âkejac ecneku mâretec bâdockeekac.

⁴⁰Eme motecfâcge jaŋe jâpecneniŋte numu‐jarepe eipiembieŋ.”

⁴¹Mume Jesuzi ʒiŋuc muwec: “O ŋicguru mamanasiŋ tâmiric â maŋsanaŋ, no ŋoŋehec hati jurâ ju ehuc âsi qataŋ eŋarepemu me? Ŋokâge bawarec.”

⁴²Eme motec Jesurao barahame demoŋzi fâreme mi kikene miŋgeŋkewec. Eme Jesuzi demoŋ dâŋ mucneme wiseme motec biaŋkeme mamac‐ticne râcnewec.

⁴³Eme ŋic jaŋe Anutu tâpiri sâko‐ticnere fuŋne honerâ warecke sâqorembiŋ. Eme ŋic jaŋe Jesuzi wiac ewec bawec irec wareckehuc juhapie Jesuzi motecfâcne bucko ʒiŋuc jazawec:

⁴⁴“Dâŋ ʒi ŋazape manapaŋkeniŋ, Ŋic Fâri Wâtuŋne e ŋic jaŋere meo feocte dameŋ bembeŋkezo ekac.”

⁴⁵Iŋuc muhuc jazame motec jaŋe dâŋ i manapie qeŋ bipinehec eme fuŋne kâuc bambiŋ. Erâ wiocneniŋte hâwic‐jopame behembiŋ.

⁴⁶Motec jaŋe nâŋâcnaonec mozi micne sâko jukac muhuc hehefaric embiŋ.

⁴⁷Iŋuc epie Jesuzi maŋjeŋicte fuŋne manarâ motec piticne moc rorâ maŋfuŋnao râerâ

⁴⁸ʒiŋuc jazawec: “Moczi motec piticne kecʒiŋucne moc nore erâ mamac rau ecneocmu, e no mamac rau enareocmu. Â no mamac rau enareocmuzi sorecnuwec e mâmâc mamac rau ecneocmu. Erâ ŋoŋeraonec moczi wahakicne jâmbâŋ juocmu, ere fekicne muzo.”

⁴⁹Eme Johanezi ʒiŋuc âzâcnewec: “Qaqazu, nâŋe ŋic moc gore ʒâŋe muhuc demoŋ jâpec‐jopame honembeneŋ, erâ e nâŋerao ʒuhuckerâ go mi bâjâpecguekacte qataracnembeneŋ.”

⁵⁰Mume Jesuzi ʒiŋuc âzâcnewec: “Mi qataracnezo. Gie‐ŋeŋic mi hetâtiecmuzi âgo babafic‐ŋeŋic eocmu.”

⁵¹Jesu e sambâŋko risiocte dameŋ bembeŋkezo ehame Jerusalem haeo raocte mupaŋkewec.

⁵²Mupaŋkerâ kiŋaŋ sorec‐jopame bâniembiŋ. Bânierâ raku Samaria ŋic jaŋere hae mocko fisirâ Jesure biŋe fic moc bâfuaniŋte jazambiŋ.

⁵³Eme Jesu e Jerusalem haeo raocmu, iŋuc manarâ fic sakarembiŋ.

⁵⁴Fic sakarepie motec jahec‐ticne Jakobo â Johane jahe i manarâ Jesu wiocnerâ mupic: “Wofuŋ, go manatec mupere sambâŋkonec ʒoc waharâ ʒacjopazejec me?”