Luukaṉu 9:33-54

³³Muutjanya an Yilaatjanya maḻaku yankukitjarringanyingka Piitalu Yiitjunya watjaṉu, “Mayutju. Nyuntu palya nganaṉanya ngaakutu ngalya katingu. Nyuntu yunytjurringanyingka purilatju maṉkurrpa palyalku nyurrangarrimpa, kutju nyuntupanta, kutjupara Muutjaku, kutjupara Yilaatjaku.” Piitalu wangka panyapa ngarruṯatjarrangku parrpaṯu wangkangu. Muutjanya, Yilaatjanya yaṉangu winkipula yutirringutja nyakula paluru nguḻurringu.

³⁴Wangka panyapa Piitanya wangkanyingka, yutuwaringku tjananya tjutuṉu. Paluru tjana nguḻurringu.

³⁵Palulanguru Katutjalu yutuwaringuru watjaṉu, “Ngaatjanya katja ngayuku. Ngayulu palunya paṉakutu wantirriyaṉu. Rawangkunyurra palumpa wangka kulintjaku.”

³⁶Panyapa wangkarra wiyarringutjangka Yiitjunya kutju ngarangi. Palulanguru palumpa kutunguḻu maṉkurrpa wangkawiya nyinangi, wiyaya wangkangi puḻingka nyangutjatjanu.

³⁷Mungawinki pakaraya puḻinguru tjarukatirra nyangu tjananya, yaṉangu tjuṯalingku ngalya yananyingka.

³⁸Tjungurrirraya ngaranyingka wati kutjungku ngalya mirrarra Yiitjunya tjapiṉu, “Nintilpayi. Ngayukutju katja kutju mamungku kuyara kanyiṉi. Ngalya yankulatju palyala!

³⁹Mamungku patjantjala paluru mirrapayi. Mirrarra punkara nyunypa yintirra kaṯiṯingkungku patjara yaṉangu parralayitjirrirra ngarripayi, pakantjawiya.

⁴⁰Nyuntupa kutunguḻu tjuṯangkaṉa tjananya ngayulu puṯu tjapiṉu mamu payira wantirriyantjaku. Puṯuya payira wantirriyaṉu.”

⁴¹Yiitjulu tjananya yaṉangu tjuṯangka watjaṉu, “Nyurrangarri ngayuku wangka kulira wantipayi, puṯu kulilpayi tjuṯanyurra nyinanyi. Rawaṉa nyurrangarrinya nintiṉingi. Kuliranyurra ninti nyinamara. Yaalytjingaranyurra pina alytjurarringkula kulilku?” Yiitjulu wati palula watjaṉu, “Uḻa palatja ngalya kati!”

⁴²Uḻa palunya Yiitjulakutuya ngalya katinyingka mamu paluru uḻa palula yunngu nyinarra yaṉangu palumpanguru patjara parralayitjimilaṉingi. Mantakutu punkara ruularringkula tjaanguru nyunypa tjutirra ngarringi. Yiitjulu palula watjaṉu, “Mamu, uḻa ngaatja wantikatirra yarra!” Yalatji Yiitjulu mamu palunya payira wantirriyara uḻa palunya palyaṉu. Palyara mara witira katingu palumpa paapakutu.

⁴³Yaṉangu tjuṯangkuya watjaṉu, “Yiitjunya yilta Katutjakuṉu ngangkari tiṉatjarra nyinanyi.” Yaṉangu tjuṯangku yalatji Yiitjunya puḻkapunganyingka, Yiitjulu tjananya palumpa kutunguḻu tjuṯangka watjaṉu,

⁴⁴“Wangka ngaatjaya purinytju kulila Wati kutjungkuṉi yaṉanguku katja tjakultjunku tjananya kutjupa tjuṯangkuṉiya witira katinytjaku, iluntankukitjangku.”

⁴⁵Wangka palunya palumpa kutunguḻu tjuṯangku puṯu kulira yalatji wangkangu, “Ngaatjanya mayutju tiṉalampa, wiya paluru mirrirriku.” Wiyaya Yiitjunya tjapiṉu ninti nyinakitjangku, kuṉṯarringkulaya wantingu. Yalatjiya pina pati nguwanpa nyinangi.

⁴⁶Palulanguru palumpa kutunguḻu tjuṯangkuyanku wangkarra waṉingi, “Ngananya mayutju tiṉalampa nyinaku?, Yiitjula tjungu?”

⁴⁷Yalatjiya wangkanyingka Yiitjunya ninti nyinangi. Pipirri yila ngaranytjala ampura katirra tjanala ngaratjunu.

⁴⁸Pipirri palula Yiitjunya yilarringkula palumpa kutunguḻu tjuṯangka tjananya paluru watjaṉu, “Pipirri ngaa nguwanpa ngayulu tjananya yunyparringkula yaṉṯayaṉṯaṉi. Tjingurunyurra pipirri tjuṯaku yunyparringkula, ngayukuṯarranyurra yunyparriku. Tjingurunyurra ngayuku yunyparringkula ngayuku paapakuṯarranyurra yunyparriku. Paluruṉi mantakutu iyaṉu. Pipirri tjuṯa mayutjuwiya nyinanyi, palunya tjananya nguwanpa nyurrangarri nyinanytjaku mayutju mayutjurrinytjaku wiya. Waarrkana nguwanpa kutju nyurrangarri nyinanytjaku. Yalatjinyurra nyinanyingka yalatji Katutjanyalpi nyurrampa yunypa nyinaku.”

⁴⁹Tjaanalu Yiitjula watjaṉu, “Nintilpayi. Wati kutjupalatju nyangu mamu payintjala. Paluru watjalpayi yalatji, ‘Ngayuku walytja Yiitju Kurayitjanya ngangkari tiṉatjarra nyinanytjala, ngayulu mamu ngaatjanya payira iyaṉi, yaṉangu ngaatjanya wantirra yankunytjaku.’ Wati palunya mamu payilpayinyalatju marrkuṉu, payira wantirriyalwiyangku wantinytjaku, tjungula parra yankunytjawiyangka.”

⁵⁰Yiitjulu Tjaananya watjaṉu, “Wati palunya nyurrangarri marrkulwiyangku wantimara. Palya paluru ngayunya yini watjara mamu payira iyalpayi. Yaṉangu kutjupalampa yunypa nyinanytjala, walytja nguwanpalampa nyinanyi.”

⁵¹Palulanguru Yiitjulu kuliṉu, “Tayimi yilarringu, Tjarutjalumanya ngurrara tjuṯangkuṉi pungkunytjala, ngayulu Paapalakutu maḻaku yanku. Ngayulu kuwarri Tjarutjalumalakutu tjukarurru yanku.”

⁵²Ruutuwana yankula tjananya paluru wikarru tjuṯa wantirriyaṉu tawunukutu, “Yankulanyurra ngurra mantjira mangarri palula tjunkunytjaku.” Tawunu palula Tjamiriyanya ngurrara tjuṯaya nyinangi.

⁵³Palunya ngurrara tjuṯangkuya Yiitjunya kanginypungu, yalatjiya kuliṉingi, “Yiitjunya tawunu Tjarutjalumalakutu wiya yankunytjaku, Katutjanya waḻkulkitja, paluru ngaangka waḻkuntjaku.”

⁵⁴Tjamiriyanya ngurrara tjuṯangkuya Yiitjunya kanginypungutjangka, Tjaanalu Tjayimitjalupula kulira Yiitjula tjapiṉu, “Mayutju. Palyala tjapilku Katutjalu tjananya ilkaringurungku warutjarrangku mirrintankunytjaku?”