Luka 8:22-46

²²Ʒoaŋ mocko Jesu â motecfâcne wokeo fembiŋ. Wokeo ferâ ʒiŋuc jazawec: “Nâŋâc riqic fotâcnerâ ocniŋuc raʒinaŋ.” Mume manapie rambiŋ.

²³Rahuc Jesu guŋte ecneme waha fowec. Fohame mâŋâŋ hâhâwicne qame riqic sâqoreme sirizi wokemaŋko hume riqicko huzo embiŋ.

²⁴Eme Jesu wiwickerâ ʒiŋuc âzâcnembiŋ: “Qaqazu, qaqazu, nâŋe riqicko huzo eŋgopeneŋ.” Mupie fahare mâŋâŋ â siri dâŋ mujacteme niniŋkepire benoŋ bawec.

²⁵Eme ʒiŋuc jazawec: “Ŋoŋe mamanasiŋ‐ŋeŋic weni.” Motec jaŋe ine wiac i honerâ tuc ŋeŋe farac erâ mumbiŋ: “Opo, e mo ŋic mo, irec mâŋâŋ â siri dâŋ jasame reŋkekopirec.”

²⁶Eme raku riqic fotâcnerâ Galilaia mâreŋ ŋifecnao Gerasene ŋic jaŋerao fisimbiŋ.

²⁷Ira fisirâ tiŋko feme haeonec ŋic moc warewec. Ŋic ere maŋko demoŋ bocjaha jupie dameŋ ʒora ŋaqi mi rojuwec â ficko mi fojujec. E mâc ʒâŋeruŋ gieo sasawa qac qâsoric juwec.

²⁸Eme Jesu honerâ owackerâ mâreŋko rândiŋke qa erâ dâŋ hahaŋne bahuc ʒiŋuc muwec: “Jesu, go Anutu femicne sâkore Ŋokâzi wemocte norao warekomec? Go ʒâic gie mi mac narezemec.”

²⁹Jesuzi “demoŋ go ŋickonec wefu rac” mume iŋuc hâcne âzâcnewec. Demoŋ e dameŋ ʒora ŋic maŋne bâpuriŋkeme momori eme ŋic jaŋe me kikene qarâ soŋaŋ‐ticne jumbiŋ. Eme demoŋzi ecneme repa hetâc qâtâcnerâ tuhuo wiserâ rajujec.

³⁰Eme Jesuzi wiocnerâ muwec: “Ʒâŋege mo?” Wiocneme muwec: “No ʒâŋe‐nane Gurusâko.” Demoŋ bocjahazi ŋicmaŋko jumbiŋ irec.

³¹Eme jaŋe Jesuzi hârâcko sorec‐jopame hunʒipiŋte mu wâwâsic ecnembiŋ.

³²Eme mâreŋ ira bec guru sâko qondaŋ gieo jumbiŋ. Irec demoŋ jaŋe mana‐jareme becmaŋko huniŋte âzâcnembiŋ.

³³Eme mana‐jareme ŋickonec wefurâ becmaŋko humbiŋ. Iŋuc epie bec jaŋe heâŋkonec suackerâ ra duŋ riqic ŋewec ira hurâ hâmo‐fârembiŋ.

³⁴Eme soŋaŋ jaŋe i honerâ gasacke rarâ ŋic hae gie sâc jurambiŋ dâŋ binaŋ ejarembiŋ.

³⁵Jazapie jaŋe ŋic demoŋ guru jâpecnekicne e honeniŋte fisi‐fârembiŋ. Jesurao fisirâ honembiŋ: Ŋic demoŋ guruhec juweczi ŋaqihec â mamanahec Jesure maŋfuŋko ŋewec. Honerâ su bipic tatara ejareme domambiŋ.

³⁶Domahapie wiac hone manac embiŋ jaŋe ŋic demoŋhec juweczi biaŋkewec irec dâŋ binaŋ ejarembiŋ.

³⁷Eme Gerasene mâreŋ irec ŋic jaŋe boc hâwic‐jopame Jesu e mâreŋ‐jeŋic beherâ raocte âzâcnembiŋ. Âzâcnepie risieocte wokeo feme

³⁸ŋic demoŋ jâpecnekicne eki bâjâpeocte numucnewec. Numucneme Jesuzi ʒiŋuc muhuc qataracnewec:

³⁹“Go wiacfâcge jaŋehec juhuc Anutuzi gorao mâsi sâko bakac irec biŋe ŋic jazazemec.” Mume ŋic e risierâ Jesuzi bâpiaŋkewec irec biŋe haefâc‐ticne jaza‐fârewec.

⁴⁰Ŋic jaŋe Jesure woŋec juhapie fisime honerâ ofac hecnembiŋ.

⁴¹Ehame mitific soŋaŋ moc, ʒâŋene Jairo, e warerâ Jesure maŋfuŋko fodaperâ mu wâsic ecnewec.

⁴²Otâ‐ticne mocjaha jara‐ticne 12 eha hâmozo ehuc fowecte Jesu hefârewec. Eme Jesuzi manarâ rahame ŋic jaŋe roʒâc bâʒâŋiŋ ecnembiŋ.

⁴³Eme ŋondeŋ‐jeŋicko ŋokac moc juwec, e soc rohuc juhame jara 12 ewec. Eme dokta jaŋe bafickeniŋte bâipieku behembiŋ.

⁴⁴Eme ŋokac eki hâcne Jesure râpefuŋko rârâ ŋaqi‐ticne bâuawec. Bâuame izia socticne ʒickewec.

⁴⁵Eme Jesuzi wiorâ muwec: “Mozi bâuacnukac?” Mume ŋic jaŋe micke‐fârepie Petorozi ʒiŋuc muwec: “Qaqazu, ŋic jaŋe roʒâc bâʒâŋiŋ egarehuc heuacguŋgopieŋ.”

⁴⁶Mume Jesuzi ʒiŋuc muwec: “Aricne, moczi bâuacnuhame tâpiri‐nane rame manapac.”