Lucas 8:22-46

²²Tub mbizh Jesús mzeeb leen tub kano kwaan re xaa mseed lo xaa, nu nzhé xaa lo re xaa: —Ya be stub ta roo nistoo. Zee nzhaze xaa nzha xaa leen nistoo.

²³Nu gorna nzhaze re xaa leen nistoo, ta ngot Jesús. Nu lee tub mbi dox doo mroo leen nistoo, nu mzelo nis nguzhe leen kano, nu nzho reyez la kano naz xan nistoo, nu kaded doo xaa bid.

²⁴Kwaanzee mloo xaa mkaal lo Jesús nu nzhé xaa: —¡Maestr! ¡Maestr! ¡Nzhalaw be leen nistoo! Jesús nguxche nu mgalno nistoo nu mbi, nu gorzee lee nistoo nu mbi zheta ngok.

²⁵Gwluzh nzhé xaa lo re xaa mseed lo xaa: —¿Chozhiin nzheb re gu? ¿Ma kwaan ngwii gu lo Dios? Per lee re xaa mzheb doo nu mdedyall xaa, nu mnabdizh xaa lo wechxinn xaa: —¿Cho nak xaabyi ne, nu axta nistoo nu mbi nzhon xtizh xaa?

²⁶Mzhin xaa stub ta roo nistoo cheen Galilea yizhyo kwaan le Gadara.

²⁷Nu gorna mla Jesús leen kano zee mroo tub xaa yezh, mbii gax lo Jesús. Xaa ne nzho mbi mal lextoo. Nzha zyen doo mbizh nanzhaktra xaa xab xaa, nixa nanzhotra xaa li xaa, sinka lee xaa nyu duzna leen yeer pa nyu re xaa ngut.

²⁸Gorna ngune xaa lo Jesús, nu mkichxub xaa lo Jesús nu mbazhe xaa nzhé xaa: —¿Chozhiin nze lu lo nu, Jesús Xgann Dios, xaa nzob naz yiba? ¡Naab na lo lu nateedt lu nu bid!

²⁹Nzhé xaa kwaane, nel Jesús mgalno re mbi mal kwaan nzho lextoo xaa, zee mrooya lextoo xaa. (Zyen welt nzen nye mbi mal xaa. Nu nixa nkado re myet yaa xaa nu nii xaa kwaan kaden, per nle xaa gan nchoog xaaya nu nzhe mbi mal xaa naz wen.)

³⁰Jesús mnabdizh lo xaa: —¿Cho le lu? Nu lee xaa mkeb nzhé: —Na le Zyen Doo. Nzhé xaa kwaane, nel zyen doo mbi mal nzho lextoo xaa.

³¹Nu lee re mbi mal ngunaab lo Jesús: —Nagubit lu re nu leen yerdoo.

³²Nel gax zee nzhi zyen doo kuch kayaw, zee lee re mbi mal nzhé lo Jesús: —Laa zeeb re nu lextoo re kuch ba. Nu zee lee Jesús mzeyal.

³³Nu lee re mbi mal mroo lextoo xaa nu nya ngu lextoo re kuch. Nu leeka gorzee mzelo re kuch mrexonn nkato naz yat nu mla axta leen nistoo. Nu ngwep re ma nis nu tira ngut re ma.

³⁴Per gorna mzeen re xaa nkanap re kuch kwaane, gorzee mrexonn xaa nu nya xaa mzaa xaa kwenta lo re xaa nzo wen nu lo re xaa yezh.

³⁵Gorzee nzhasewii re myet nen cho kwaan ngok. Nu gorna mzhin xaa pa nzo Jesús, zee mlu xaabyi, xaa mroo re mbi mal lextoo, nzob lo Jesús, nakla xaa ler nu ngokwenla xaa, zee mzheb doo re xaa.

³⁶Nu lee re xaa ngune ngok kwaane mzaa kwent lo re xaa nen xomod ngokwen xaa ngu mbi mal lextoo.

³⁷Rese myet, xaa yizhyo Gadara, nzhé lo Jesús zee nya Jesús, nel nzheb doo re xaa. Kwaanzee lee Jesús mzeeb leen kano nu nya.

³⁸Lee xaabyi kwaan mroo re mbi mal lextoo nzhé lo Jesús: —Laa reke na tich lu. Per Jesús mnabeyy xaa, zee lake xaa zee zaa xaa kwent lo re xaa:

³⁹—Zyaa garli lu, nu guzh re kwaan mle Dios lo lu. Lee xaabyi zee nya, nu mzaa xaa kwent kwaan mle Jesús lo rese xaa dub yezh.

⁴⁰Gorna mbare Jesús stub ta roo nistoo, nyakdoola re myet mkayaa xaa xaa, nel rese xaa nkambaz xaa.

⁴¹Nu gorzee mzhin tub xaa le Jairo, xaa nak tub xaa nabeyy pa nkasa re xaa Israel nseed xaa xtizh Dios. Xaabyi ne mkichxub lo Jesús nu ngunaab xaa zee ya Jesús garli xaa,

⁴²nel nkano xaa tubka xchap xaa, mad nzho kan tub chiibchop liin, mer yet. Nu gorna nzha Jesús zyen doo myet nzhake tich xaa nu ntaaw doo re myet xaa.

⁴³Lo re myet zee nzha tub ngwnaa, me nzhala chiibchop liin ne nzak. Tubka nded ren lextoo me. Nu mlux me rese kwaan nzhap me ngwa me lo re doktor, nu nik tub xaa namlet gan sekwen me.

⁴⁴Ngwnaa ne mbii naz tich Jesús, nu mgal me cho xab xaa. Nu leeka gorzee lee ren kwaan ded lextoo me mlaz.

⁴⁵Zee lee Jesús mnabdizh: —¿Cho mgal cho na? Nu rese xaa nzhé: —Namgalt na cho lu. Per lee Pér nzhé: —Maestr, rese xaa ntaaw lu nu nzobya lu.

⁴⁶Kwaanzee Jesús mbare nzhé: —Nzho tub myet mgal cho na, nel mzeen na mroo yalngezh cho na.