Luka 22:54-66

⁵⁴Nba, alu ka Isa mira, ka wa a ri sarakalasela kuntiiba wara. Piyɛri bilara ie kɔfɛ, kɔni a ma imadon ie la.

⁵⁵Mɔɔilu ka ta ladan lu ba ma ye, ka isii ta da la. Piyɛri fanan nara ka isii ie tɛma.

⁵⁶Baaraden muso do nara ka Piyɛri siini tɛrɛn ta da la. A ka Piyɛri lakɔrɔsi kosɛbɛ, ka a fɔ mɔɔilu yɛ ko: «Cɛ ɲin fanan tɛrɛ ye Isa kɔfɛ jɔ.»

⁵⁷Piyɛri ma sɔn ka ilɔ wo la. A ka muso jabi: «Muso, n ma a lɔn.»

⁵⁸Wo kɔfɛ dooni, mɔɔ gbɛrɛ nara Piyɛri sɔrɔn ye. Wo ka a fɔ a yɛ ko: «I fanan ye Isa la dɛkuru rɔ jɔ.» Piyɛri ka wo jabi: «Ɛɛn dɛ! Nde sa a rɔ!»

⁵⁹A ma mɛn bakɛ, dɔgbɛrɛ nara Piyɛri yɛ. Wo ka a fɔ fanka la ko: «Sika tɛ a rɔ fewu, cɛ ɲin tɛrɛ ye Isa kɔfɛ. I ma a yen, Kalileka le.»

⁶⁰Kɔni Piyɛri kan ko: «Cɛ, n ma i la kuma ɲa yen.» Piyɛri banni wo fɔla, dondon kasira ikɔrɔ ye.

⁶¹Wo waati kelen na, Maari Isa ka iyɛlɛman ka a ɲa lɔ Piyɛri rɔ. Piyɛri hankili bilara Maari la kuma rɔ kelendi, ka a masɔrɔn Maari tun da a fɔ a yɛ ko: «Yani dondon ye kasi bi, i ri a fɔ mɔɔilu yɛ haan siɲa sawa ko i ma n lɔn.»

⁶²Piyɛri bɔra lu ma ka wa kasi kojuuya.

⁶³Nba, wo tuma Isa marabailu ka a lafɛya, ka a gbasi damira.

⁶⁴Alu ka a ɲa lasidi ka a maɲininka ko: «Yon ka i gbasi? A tii tɔɔ fɔ an yɛ.»

⁶⁵Alu ka a nani ka kuma juu siyaman fɔ a ma.

⁶⁶Banda ka nin, sɔɔma da la, Yahudiyailu la mɔɔbailu ka ladɛn kɛ, sarakalasela kuntiilu ni sariya karanmɔɔilu kɔnin. Isa marabailu nara a ri kiti diya.