SAN LUCAS 22:54-66

⁵⁴Condom quiaj ndeaad Teat Jesús, taquiüraab mamb andüy aniüng minatang miteaats. Teat Pedro tandüüb nej mamb, miünquiájan ajngot.

⁵⁵Ajcüwa nipilan ajalüw biümb quiaj tiül püjchiün mbeay ombiüm minatang miteaats metsantsayej; alchetemoj ayeyiw tiüt biümb. At a Pedro aton tamb tsotom quiaj maquiüjpüw.

⁵⁶Alquiaj nop nüx nerang najiüt quiaj, wüx tajaw altsotom mbeay biümb a Pedro, tajaw majneaj, quiaj tapiüng: ―At aaga naxey quiaj aton taquiiüb aaga Jesús ―aw.

⁵⁷Aaga Pedro ngo mandiüm mapiüng naleaing, quiaj tapiüng: ―Ngwüy müm, ngo najaw jane aag ipiüng quiaj ―aw.

⁵⁸Ajóyan quiripite ores, quiaj tajaw nej alinop, tasaj nej: ―Ique aton nop tiül aquiüjpüw nejiw ―aj nej. Quiaj tapiüng a Pedro: ―Naxey, ngwüy ngome xique ―aw.

⁵⁹Ǘüchan ores tatow ndoj masaj nej aaga nop, quiaj tapiüng alinop: ―Naleaing, aaga naxey quiaj aton aquiiüb nej, cos naw Galilea ―aw.

⁶⁰Aaga Pedro tandüy wüx mapiüng: ―Naxey, ngo najaw cuane ipiüng quiaj ―aw. Tenguialeámban mandeac aag ayaj a Pedro, quiaj tepaj a gallo.

⁶¹Teat Jesús ndiliteay majaw a Pedro. Quiaj leaad omeaats aaga tapiüng Teat Jesús: “Sasaj ic Pedro, aaga gallo apmepaj nganüy leaw ndoj mepiüng arojmbüw ipiüng ngo mejaw jane xic”, maj nej.

⁶²Wüx leaad omeaats aag ayaj a Pedro, taw quiaj, tapots müüch ajiünts.

⁶³Ajcüwa monxey monjiür Teat Jesús itsojayéjan nej, tatoliw nej.

⁶⁴Quiaj taoeliw oniiüg nej, cas tapots maleambüw mitey. Tasajüw: ―¡Isüet jane neleamb ic! ―ajüw.

⁶⁵At tasajüw nej cuajantanej ngo majneaj.

⁶⁶Wüx larraw tiüt, quiaj canchiütoj montangtang monajiüt tiül judíos, montangtang miteaats, átan mondüy wüx aaga poch tüünd Moisés. Taquiüjpüw mamb Teat Jesús andüy niüng alcanchiümoj altegüy montang monajiüt. Quiaj tatüniw nej manguiayiw: