Luka 21:3-27

³Tegani phenđa: “Čače vaćerava tumenđe, akaja čorori udovica čhivđa više sarijendar.

⁴Adalese so sare akala dinde oto buderi so isi len, a oj, kojai čorori, dinđa sa so inola.”

⁵I sar nesave učenici vaćerena ine adalestar sari o Hram šukar ukrasime šuže barencar hem e manušengere daronencar, o Isus phenđa:

⁶“Ka avel o dive ked oto sa akava so dikhena na ka ačhol ni bar upro bar. Đijekh ka ovel peravdo.”

⁷I on pučle e Isuse: “Učitelju, ked adava ka ovel? So ka mothoj amenđe da alo adava dive?”

⁸A o Isus phenđa: “Dikhen te na oven prevarime. Adalese so but džene ka aven ano mlo anav vaćerindoj: 'Me injum o Hrist' hem: 'Alo paše o vreme.' Ma džan palo lende!

⁹A ked šunena zako mariba hem zako pobune, ma te daran. Adalese so prvo adava valjani te ovel, ali nane otojekhvar kraj.”

¹⁰Tegani phenđa lenđe: “O manuša ka maren pe e manušencar hem o carstvo e carstvoja.

¹¹Ko but thana ka oven bare zemljotresija, bokhalipe hem nambormipa. Ka mothoven pe čudesna znakija ko nebo savendar o manuša darana.

¹²Ali angleder sa adava, tumen ka oven dolime hem jurime, ka oven legarde ko sudo ano sinagoge hem ko phandlipe. Ka legaren tumen anglo carija hem anglo vladarija adalese so injen mle učenici.

¹³Adava ka ovel tumenđe te šaj svedočinen lenđe mandar.

¹⁴Adalese pana akana odlučinen te na planirinen save lafonencar te braninen tumen.

¹⁵Adalese so me ka dav tumen mudra lafija savenđe nijekh tumaro protivniko na ka šaj suprotstavini pe.

¹⁶Ka izdajinen tumen hem tumare dada, tumare daja, tumare phralja, tumaro jeri hem tumare amala; hem nesaven tumendar ka mudaren.

¹⁷I sare ka mrzinen tumen adalese so injen mle učenici,

¹⁸ali niko na ka šaj te uništini tumen, čak ni jekh bal tumare šerestar na ka ovel uništime.

¹⁹Adaleja so ka ačhoven maje verna, ka dobinen večno dživdipe.”

²⁰“I ked ka dikhen sar o Jerusalim opkolime e vojskendar, te džanen da alo lesoro vreme te ovel uništime.

²¹Tegani okola kola živinena ani e judejakiri regija nek našen ko gore. Okola kola živinena ano Jerusalim nek ikljon avri, a kolai avri, te na đerdinen ani diz.

²²Adalese so adala ka oven o dive ked o Devel ka kaznini e manušen. Ađahar ka ovel te šaj pherđol sa so o proroci pisinde ko Sveto Lil.

²³Jao e khamnjenđe hem okolenđe kola dena čuči ko adala dive! Adalese so baro bišukaripe ka ovel upri phuv hem o Devel ka ovel but xoljame hem ka kaznini akale narodo.

²⁴Nesave olendar ka oven mudarde, a avera ka oven legarde ko phandlipe maškaro sa o nacije. O Jerusalim ka ovel gazime e manušendar kola nane Jevreja sa đikote na nakhela lengoro vreme.”

²⁵I ka oven čudna znakija ano kham, ano masek hem ano čerenja, a ki phuv o nacije na ka džanen so te ćeren oti dar zbog adava so o more ka ćerel glasna zvukija hem bare talasija.

²⁶O manuša ka meren oti dar hem oto adžićeriba o bišukaripe so avela ki phuv, adalese so o zoralipa e nebosere ka oven potresime.

²⁷Tegani sare ka dikhen, man, e Čhave e Manušesere, sar avava upro oblako ano baro zoralipe hem ani slava.