Luka 21:3-27

³Yesu ikamata garup tap tani, le taun imadit le iwete nen, “Awete pang moolmool nen, garup tap i ballingana tiap, bong itar pat mai san le illos pat yo di tooltool kapala titar nga,

⁴yesoo, di ngan tooltool ballingadi le pat kidi alunu san, bong titar mai tiap. Ngan garup i ballingana tiap, bong ya in iraia lono be itar pat ki tina le imot yo be iyimi kaningi panga ye nga, ngan le imot a ilo ye depe ke tarungu pat.”

⁵Yesu di galiunu pattu tiparwetewete ye bareme mai ke sungunu yo tikamata, ngan dook mata san ye pat yo tire ye nga, inbe ye so dook mata kapala yo di tooltool tikap a man timoromoro bareme tani ye nga. Bong ngan Yesu iwete pang di nen,

⁶“Awete pang nen, pat le so tina yo nookoot kakamata ngan iken dook mata ye bareme mai ke sungunu i, bong lal atu yo be pang dama ni ngan pombe i, ngan ole pat tina ngan atu sa yo be iloko lo ene pono dawa ben nookoot nga, ngan tiap. Bong ole tiraukedekede di le imot a timol du tana le tiken kidi kidi.”

⁷Le nga di tooltool tina ngan titoro Yesu nen, “Pannoongoo, ole soo lal be so tina ngan pombe ye i? Inbe soo tarkilanga be amkamata muku, ngan lomam galanga ben so tina ngan ole pombe moolmool ye i.”

⁸Motong la Yesu iyei ne, “Kin kakamatang dook leu, le kin tool sa ikap lungunu yang be. Yesoo, di tooltool alunu ole timan pang yang man tipootoo ek, inbe tiyei ne, ‘Au tool tani naii!’ Inbe ole tiyei ne, ‘Lal tani in iman potai oo.’ Bong kin kalongo betanga kidi a katoo di be.

⁹Kumata ye kene yo be kalongo bingi ke patokongo mai, inbe talngamim rau be di tooltool ke tana mai atu be tiparsu ye betanga sa le be tiye di diedi tipatoko nga, ngan kin katattadai be! So tina yo nen nga ole pombe moolmool muku, bong so yo awete pang ye nga, ngan lal ki o pombe tiao.”

¹⁰Motong la Yesu iwete pang di mulu nen, “Ngan di tooltool ke tana mai atu ole timadit a tiye di tooltool ke tana mai san tipatoko. Inbe di tooltool ke tool kuto mai atu ole timadit a tiye di tooltool ke tool kuto mai san tipatoko.

¹¹Inbe nauningi mai ole itak ye tana i, inbe pitolo mai ole pombe, inbe matamatenge maimai ole pombe ye malala kapala a igarung di tooltool lapau. Inbe matamim pang lang katene nga, ngan ole kakamata mos matana matana pombe, a be nen ngan iyei di tooltool a titattadai le dook tiap yege.

¹²“Bong so tina ngan le imot ole pombe tiao, inbe di koi kiau ole tikamatang yo katoo au nga, ngan ole tikau ang a tiparamang a tigarungang. Inbe ole tikau ang sa lo kakodo ye ni ke karatanga betanga ye rumu kidi Yuda ke gaongo in lono, inbe titarang lo kayepe rumu dook tiap kidi talnga dikidiki lono. Inbe ole tikau ang sa lapau lo kakodo dama kidi tooltool kuto maimai yo matadi kala tana mai kiang nga, inbe di tooltool maimai yo matadi kala malala kiang nga, ngan matadi, yesoo ye yo ang ngan katoo au nga.

¹³Ngan dada tina yo tiyei pang nen nga, ngan be nen a tiso dada pang be kawetewete bingi dook mata kiau pang di.

¹⁴Le kin lomim modoko ye betanga yo be kawete a karau betanga kidi ye, ngan be,

¹⁵yesoo bong au tauk ole atar betanga dook mata yo be kawete ngan lo lomim, inbe akaua lo galanga dook mata yo be karau betanga kidi ye i, in pang. Ngan nen le di koi kiang tina ngan o ke be tiwete be nga kallungu, a be nen ngan tirautoo betanga kiang tina yo kawete nga, ngan tiap.

¹⁶Inbe ye kene tani in, ole di tamamim le tinamim, tiye di toomim le taimim, inbe di sokamim le di tooltool kiang ole katedi malmal pang a titarang la di koi kiang baedi, inbe tiraumatamatang kapala a kammata.

¹⁷Ngan di tooltool le imot ole tiyei koi pang a be tigarungang, yesoo ang ngan katara lomim medana ye betanga kiau inbe katoo au.

¹⁸Bong kutomim raunu tina le imot nga, ngan o ke be atu sa ilene tiap.

¹⁹Ngan nen le kakodo le kamede dook ye betanga ke Maro, ngan la be ole kakaua yepongo dook mata yo taukan motingi in nga.”

²⁰Motong la Yesu iwete pang di mulu nen, “Ye kene yo be kakamata di tooltool ke patokongo nga be man tikodo le tiwakaia malala mai Yerusalem nga, ngan ole lomim galanga nen, lal yo be man tigarungu malala mai tani in ye i, in o potai oo.

²¹Le be kakamata so nen pombe nga, ngan ang tooltool yo kayepe ye tana mai Yudia nga, ngan kakoo tarai a kalo pang kawal. Inbe ang tooltool yo kayepe malala mai tani in lono nga, ngan kapas a kadu ke diki. Inbe ang tooltool yo kayepe ke diki nga, ngan kin kalo pang malala mai tani, in lono be.

²²Awete pang nen, yesoo ye kene tani in lal ke Maro be iyemenai di tooltool ke Isrel tina yo tiwala muridi panga nga. Ngan so tina ngan ole kanono pombe moolmool ben tina yo muku ngan di Maro koonoo tiwodo betanga ki ilo ye rau nga.

²³Ye kene tani in di garup yo kapodi nga, inbe di garup yo tiyei borrenge ye di natudi a tipayinin di nga, ngan barau, ole imoo pang di yo be tikoo nga. Ngan awete nen, yesoo urata dook tiap ki taunu la be pombe ye tana i, inbe Maro ole ipaposo kate malmal ki yo be igarung di tooltool tina yo tiwala muridi panga nga.

²⁴Ngan di koi kidi Yuda tina, ole timan man tirau di a titaramatamata di kapala ye pul ke patokongo. Inbe di Yuda tina ngan kapala ole tikap di a tiparama di a la titar di ye tana maimai kapala. Inbe di tooltool yo tipa ye rara kidi Yuda tiap nga, ngan ole timan man tidada di tooltool tina yo ke Yerusalem nga, ngan podi le lo ye lal yo Maro itaru pang di be urata kidi tani yo tiyeii i, in imot ye i.”

²⁵Motong la Yesu iwete pang di mulu nen, “Ye kene tani in nga, ngan ole tarkilanga matana matana la be pombe ye ke le taudu inbe ye di kanpitiki nga. Inbe ye tana mai i nga, ngan di tooltool ke ni mai i le imot ngan ole titattadai inbe lodi gurrungu dook tiap ye yo tilongo mununu ke dugu yo iyit le ilo ete ni a popobe nga.

²⁶Ngan Maro ole itak so yo ke lang katene nga, a be nen ngan di tooltool tikamata ngan ole lodi galanga ye so dook tiap tina yo be pombe ye tana i nga. Ngan nen le di tooltool tina kapala ole titattadai ye yo tikamata so nen nga, ngan ole matadi taltalai a timol du tiken tana.

²⁷Inbe ye kene tani in nga, ngan di tooltool ole tikamata Tool Moolmool ke Maro iyepe ye eng tene, inbe ipa ye gurana ke Maro inbe nunngana maiyoko a isi.