Luka 21:3-27

³Ia i ene, “Mamohoi ea heribamiu ta, teina sine wabuwabuna ta nige ena gogo, enana i toredobedi i sae ariri, gamagaridi enadi wa i hemuridi.

⁴Paana teina tatao gamagaridi edi gogo gamagaridi wa arinai edi ainauia se usadobedi begadi mo Eaubada se ainauiai: wabuwabu wa, ia gogogesagesa, ena moni maudoina i usadobei‐esegaidi.”

⁵Tatao headi numa uura ribana se oioiribaei, si ene, “We’u lolodi eai eo ainauia lolodi eai numa wa se hepasa,” ia i ene,

⁶“Teina ginauridi ta omi au itadi, asubenadi abo se lagema nige we’u esau i ota we’u esau potana eai, gamagaridi abo se heboloheohidi.”

⁷Isi ia se oimurini si ene, “Tanuagamai e, auiana teina ginauridi ta abo se tubu? Eo heiheinoidi saha abo se tubu hanahanaui?”

⁸Ia i ene, “Au komakomanimiu ata se boraimiu: paana gamagaridi abo se laoma esagu eai, si ene, ‘Eau Keriso ede’: ‘Huiana i hanahanauma!’ omi tabu au lauwataidi.

⁹Omi iala eo heasiworewore wasadi au ataiedi, tabu au matausi: paana teina ginauridi abo se tubu baguna: na sigasigana sora.”

¹⁰Ia abo i ribalau aridi eai i ene, “Eanua abo eanua esau se ialaidi: eo basileia abo basileia esau se ialaidi:

¹¹hari teha, hari teha eai moniinii lailaidi abo se tubu; eo guriam hinage: eo laumatemate: eo nuamatamatausi, eo heiheinoidi lailaidi galewa eai se laoma.

¹²Ina ginauri sora nige se tubu, omi abo se toabagunaimiu, eo se heamamnamiu, se moselaemiu sunago eo numa tutugudu eai, eo se niurilaemiu wasawasa eo gavana matadi eai, eau esagu debana eai.

¹³Omi emi abaribahemasaraha huiana ede meta.

¹⁴Nuamiu au headidiriesegaidi, emi riba saha saha tabu au nuatunonohaidi:

¹⁵paana awamiu sonogana abo ea lediwa, ami waiunu gamagaridi taba nige se heuio, eo taba nige se ribaheboso.

¹⁶Omi tamamiu, sinamiu, eo emi dodogayao, eo ami bogao, eo ehamiuyao abo se moruimiu: omi headi hinage abo se unuhematemiu.

¹⁷Tatao gamagamagari abo se ouyalayalaemiu eau esagu debana eai.

¹⁸Na urumiu maiawadi taba nige esega se hebaaea.

¹⁹Emi miatahitahi debana eai nuamiu abo se mauri.

²⁰“Omi Ierusalema au ita tauiala gamagamagari se hetaiiri, au nuatui sabom abo i hanahanau ede.

²¹Nei huiana ne isi Iudea taumiaidi abo se dago oea tupidi eai: isi hinage oea wa boeana eai abo se dago murimuri eai: eo ealeba tataodi tabu se sae arinai.

²²Paana teina maisa baaea asubenadi, bena riba gamagaridi se uridio abo se hemamohoiedi.

²³Nei asubenadi ne kapore sisine bogabogadi, eo isi hinage nanatudiyao se hemadodi! Paana oea eai wa abo baaea lailai se hearodi, eo ouialaiala hinage teina tatao ta potadi eai i taru.

²⁴Isi elepa matana eai abo se mate, eo se auauidi se niurilaedi eanua gamagamagaridi eai: Murimuri tataodi Ierusalema abo se utuututawatawai, i lau e Murimuri tataodi edi huia i lautom.

²⁵“Heiheinoidi abo se tubu mahana boeana eai, eo nawalai boeana eai, eo ipora boeadi eai; eo tanoubu eai ta eanua tataodi baaea se hearodi; eo aruadi se loi; hinage gabogabo eo butubutu se dagugu lailai;

²⁶tatao nuadi abo se beruberu paana se matausi, eo paana ginauri wa se itadi se tubu tanoubu eai ta: galewa ginauridi abo se moimoiu.

²⁷Tau Natuna abo se ita eada boeana eai i laoma ma gigiborina ma ana tepo, ma ana bela.