Uluka 21:3-27

³Ba magu, “Kadure in boo shi, unee unu zatu nee uruma ugemu ma wuna imum me sa iteki iwe me vat uwe.

⁴Vat anu aginome wa nya anyimo imun igebesa wa wa zini. Me unee ugeme sa ma zome unu rumaba, anyimo udira umeme ma nya vat imum igebesa ma ma zini u ciki umeme”.

⁵Kasi aye sa wa boo abanga udenge Asere, kasi sa abara uni inu yaba ina po ahuma mi ikirfa sa a nyiza, Magu,

⁶Ahira imumu iginome sa Ihira, uwui u eze sa nipo nizomi ni inde sa nidi cukuno Aseseri uroni sada tuburko mini adezi ba.

⁷Ba wa iki me, agi, “Unudungara, unu maya uni adi wuzi imumu iginome? Nyanini tidi iri ubata uya uni aku tubi.

⁸Yeso makabirka, “Wuzani Seki kati uye ma rangishi. Anu gbardang wadi ē anyimo niza num wagusi, 'mimani mē, 'anime', uganiya wa aye mamu kati itarsi we.

⁹Ingi ya kunna abanga ani kono nan tikara, kati i wu zabut ba, doli ni imumu iginome i wuzi ani, ibinani ida ayeme debe-debe anime ba”.

¹⁰Ma gun we, “Anu wadi yeze anu, Tigomo tidi yeze a tigomo.

¹¹Adi wuzi tiwiri ta dizi, ati hira sassas adi kuri awuzi ikomo nan imum iburi ani weme.

¹²Ingi imum igino vat adi wuzi, wadi mekishi, wa nya shi tetene, wa nya shi ati denge ta Asere nan ti hira ti ukursoso anu, wade ēn shi aje a gomo na magumna barki nizanum.

¹³Idi cukuno shi unaa u bezizi.

¹⁴Barki anime barkani iriba ishi me barkani unā sa idi kabirka.

¹⁵Mi, indi nya shi teze nan ugamirka, sa vat anu ishina ishi me wada ke wa tunno wa gun shi izin macicu ba.

¹⁶Nan anu yoza, nan ni henu, nan nikura nan a roni wadi gā shi wa huzi ayeshime.

¹⁷Konda avi madi game shi barki niza num.

¹⁸Ko nice ni nide nishi ni da wonoba.

¹⁹Anyimo iriba ishew idi uri muriba mushi.

²⁰Ingi ya ira Urishalima ana nikara mini kono wa kete uni, i rusa urizo unini wa aye.

²¹An desa wazi mayahudawa wa sumi uhana uzalan, m an desa wa rā ati anipin wa dusa, kati a ceki adesa wa rā amupin mu cincin wa ribe.

²²Ti wui tiginome ti ugarziza tini, barki vat imum be sa aye Heke i myinca.

²³Shi be shi ana ti puro nan adesa wa hamza ahana a ti yē tiginome,

²⁴Wadi rizi ufenfan uni gbinang adi ha inwe anyimo ni rere vat ama-nyanga anu zatu tarsa Asere wadi mari Urishalima, u hana uganiya uweme u mynica.

²⁵Idi iri U iso abanga anyimo uwui nan upe nan iwirang. U nē anu zatu tarsa Asere wadi si nirere, wadi wu hu barki ugumuzo u raba udang nan ibarka imei.

²⁶Anu wadi wi wa zumi barki biyau nan u gamara abanga imum igesa idi kem unē, adi zuruko ubari Aseseri.

²⁷Idi ku iri vana unu ma eze anyimo amagaji mari unu bari ninonzo gbardang.