Luk 21:3-27

³Eme Jises anya, “Jo katiye tado handru en! Iy badih nyau tan lakou bwe kede-eh, akeh luk solo-an labai ja ta lau mari.

⁴Tasah, iri lau mari kede-eh akahei rayah le badu bolo luk tiri solo-an, arile iy badih nyau tan lakou bwe badeh, atehei luk mari ta sukunyan ndrala.”

⁵Eme oro lau tan rayah atou asiu tinan ta Kindrei amekes na bek badeh, konen konen labai; ma lakou moroyan adeu i ta Kindrei, eme oro asehek nyala aliy. Arile, Jises eme tiye i toro,

⁶“Ado ndratou lakou mari kede-eh, na len eme kameh ado winiyan batou ari ndruwi asiu bek winiyan bales, bareu loken bwe. Iri marakon kameh ato-oh iu i andri.”

⁷Eme oro ndremenya iy anya, “Ndramak ta leheya, na saba len handru kameh lakou doh kasahan? Ya saba kalem kameh kasahan bwena ta leheya lakou doh eme bakep ai?”

⁸Eme Jises tiye i buku doh, “Ado kanyolom kamwenen, ya ari ndramak sawendreyani ado, ndri-iy. Iri lau solo-an kameh ame anya iri asehek sahou tek ma anya, ‘Jo dah Krais,’ ma, ‘Len ndra bakep ai, ta Kindrei eme akohok taha ame hamon.’ Arile, ado sa-en hamon toro.

⁹Ya, i buku none ado anuhun kurutuwe bahun, hawe lakou maha-an asahan, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh kahis le.”

¹⁰Ano iy tiye i toro ja anya: “Kon munyak tinan ari kameh amekes bahun i ta kon tinan ari; ya kabin badu kon rakon kameh amekes bahun i ta kabin badu kon rakon ja.

¹¹Ma idah kameh kon ari ari kameh ndroi asahan aliy, ya son kameh asahan bolo kon, hawe sik asahan aliy. Ma idah kameh kalem ta nohowa lau kameh asahan bada kandrah.

¹²“Arile, lakou mari doh kahis le kameh iri ateu ado. Ma iri kameh adai ado, ano seheyani ado ala asiu ta atukum tiri Juwis ales are mada sahou. Ano ja kameh iri seheyani ado ala hawe iri kabin hawe iri lau ta atondrok. Iri amekes doh tasah, idoh len ta ado katiye sahou tek mwasin ki tiri.

¹³Ma idoh kameh atehe san mwasin i tado kasehek nyala sahou tek ki toro.

¹⁴Arile, ado badeh, kalomondra bohon ki bwena ta ado sabwerei ta sasah kameh ado kasehek.

¹⁵Jo le kameh edeu sahou hawe budon mwasin ewek tado, ya iri lau kameh winiyan bandres ma tebelese budon nane jo edeu ewek tado ta atiye bwe. Ma winiyan babisini sahou tado bwe.

¹⁶Ya tama ado oro, hawe tine ado oro, hawe nadu tine ado oro, hawe lowa ado oro, ma hawe kawas tado oro kameh adeu sa-oh tado, ma eme iri kameh adai ado rayah kameh amak.

¹⁷Ya iri lau mari kameh baseken ado bwe, tasah ado an hamon tek.

¹⁸Arile, ari lami batu ado winiyan ba-au bwe, ma koha ado kameh udu le buku doh.

¹⁹Arile, i buku none ado le kabadok ado, idah kameh, ado le winiyan sebenei koha ado handru.

²⁰“Ya, i buku none ado katou iri lau ta bahun kawudi Jerusalem, badeh, ado tanan ai, mirihik kameh Jerusalem atokos ai.

²¹Eme ya, are lau oro are kon Judiya badeh, katobwak kala bolo mandrei. Ya are lau oro are bolo kon tinan badeh, katobwak kame len. Ma hawe are lau oro are len badeh, sala bolo kon tinan, ndri-iy.

²²Tasah, idoh badeh, len ta adeu maha-an i hamon, amwenen le ta sahou ta Kindrei mene ndratorowenei.

²³Len doh kameh len ndra-in labai tiri badih ale nah ereu tiri, ma badih nah ma nyandren! Tasah, Kindrei kameh ibolosen i tiri lau badu munyak dah, ma iri kameh bwese maha-an laba tinan labai.

²⁴Ya idah kameh, iri amundroh lau rayah na samen, ya iri rayah kameh kuhi iri a bonyo-ou a kon munyak tinan mari. Ma iri lau badu leheleh kameh atondrok lakou mari badu Jerusalem, winiya le tondrok tiri barano.

²⁵“Idah kameh kalem asahan ta an, kalem asahan ta bun hawe iri ndrau. Ya iri kon munyak tinan kameh bwese maha-an laba tinan labai, hawe iri anoh ma anyon ala ame ta kurutuwe bayau badu ndras.

²⁶Lau mari kameh anoh ma mada iri abuluw ta lakou kameh asahan la-u kon munyak, ma boto-on mari badu kandrah kameh nyukunyok.

²⁷Ano amwenen ta lakou doh, asahan kameh, iri lau kameh anyolom Nadu Ndramak Awas asahan ereu bwele-e asi kandrah, ma boto-on tan ma lomadan tinan labai.