Luka 15:11-29

¹¹I o Isus phenđa: “Jekhe manuše ine duj čhave.

¹²I o tikneder čhavo phenđa ple dadese: 'Dade, de man akana o kotor oto barvalipe klo so preperela maje.' I ađahar o dad ulavđa lenđe plo barvalipe.

¹³I palo nekobor dive o tikneder čhavo čedinđa sa so inole, dželo ki durutni phuv hem adari xalja sa plo barvalipe ađahar so živinđa dilikane.

¹⁴Ked xalja sa o love, ulo baro bokhalipe ani adaja phuv i tegani na inole so te xal.

¹⁵I dželo te ćerel buti koro jekh manuš kova živinđa adari. Adava manuš bičhalđa le pese ko polje te arakhi balen.

¹⁶O čhavo edobor inele bokhalo da manglja te xal adava so xana o bale, ali niko na dinđa le xajbnase.

¹⁷A ked lelja te razmislini šukar, phenđa: 'Mle dadesere bućarnen isi da buderi xajbnase, a me akate merava bokhatar!

¹⁸Ka irinav man koro mlo dad hem ka phenav lese: 'Dade, grešinđum anglo Devel hem angla tute!

¹⁹Na injum dostojno akana te vaćerav da injum klo čhavo. Molinava tut, le man sar jekhe bućarne te ćerav buti kora tute.'

²⁰I lelja te džal koro plo dad. Pana sar inele dur ple dadesere čherestar, lesoro dad dikhlja le sar avela. Pelo e dadese žal, prastandilo đi leste, zagrlinđa le hem čumudinđa le.

²¹Tegani o čhavo phenđa: 'Dade, grešinđum anglo Devel hem angla tute! Na injum dostojno akana te vaćerav da injum klo čhavo.'

²²A o dad phenđa ple slugenđe: 'Sig anen o najšužo fostani hem hurjaven le! Čhiven lese i angrustik ko naj hem o sandale ko pre!

²³Anen okole thuljarde telco te čhinen, te xa hem te slavina,

²⁴adalese so akava mlo čhavo inele mulo, a akana dživdilo, inele našaldo, a akanai arakhlo.' I lelje te veselinen pe.

²⁵A o phureder čhavo ćerela ine buti ki njiva. I ko iriba, alo paše uzalo čher i šunđa bašaliba hem čheliba.

²⁶Tegani vičinđa jekhe sluga te pučel le so ulo adava.

²⁷O sluga phenđa lese: 'To phral irinđa pe čhere. To dad čhinđa e thuljarde telco adalese so dikhlja le dživde hem saste.'

²⁸I o phureder čhavo xoljanđa i na manglja te đerdini ko čher. Tegani lesoro dad iklilo hem molinđa le te đerdini.

²⁹A ov phenđa ple dadese: 'Ače, sa edobor berša kandava tut sar robo hem niked na phagljum to lafi, a nijekhvar na dinđan man ni buzore te šaj mle amalencar te veselinav man.