Luk 24:13-42

¹³Una bung ut ra, aru tagun det ra det ser mur o Iesu, der wan sur a tamon a risano o Emaus. A bakbakino i elar nama noino ma ara kilomita tagisapat o Jerusalem.

¹⁴Ra der wan nanan der wasiso etalai torom der una kum utna rop ri, ra i sa wanpat taru.

¹⁵Ra der wasiso ma der ting etalai der una kum utna ri, o Iesu ut i wanpat torom der, ma detul wan tomo.

¹⁶Ikut ara utna i pulus bat arin matander ra ka der tama lele pasi.

¹⁷O Iesu i ting der lena, “Asau ri mur wasiso nanan uni una numur a inawan?” Der tur taru kut ra der tamtama na tupunuk.

¹⁸Ma ara pasander a risano o Kliopas, i tingi lena, “Ui mukut ara musano ra u kis na usiro sapat o Jerusalem, ma ko tasman a kum utna ri ra i wanpat sapat una kum bung ri?”

¹⁹Ra i ting der lena, “A kum utna na sau?” Ma der balu i lena, “A kum utna un o Iesu a te Nasaret. I ara poropet, ra i ser pam a kum dekdek na pinapam, ma anun a wasiso kai i dekdek, umatan o God ma a taro rop.

²⁰A kum lamlabino tene etabor torom o God ma anundat a kum mugumugu det pitar tari una warkurai sur in mat, ma di sak wati unin nanai kutus.

²¹Ikut, met nurnur uni lena, i ra, in ulangolango a taro Israel. Ma ara utna kai, i sa tulu bung bat tar a kum utna ri det pami.

²²Ma i kai ri, a ramano kum ino tagun met, det ukisin met. Det wan kobot sur a kulam na minat,

²³ikut ka det tama a minatino. Ra det milet melet, det watungi lena, det tama tar aru ensel una tamtama, ra der watungi lena i sa laun.

²⁴Numur ara taro kai tagun met, det wan pas tiro una kulam na minat, ra det tama tar a utna ri, lenkutkai ra a kum wardain det inanos nami, ikut ka det tama o Iesu.”

²⁵Ra o Iesu i watungi tander lena, “Mur longlong kut. Nangisin mur in nurnur una kum wasiso rop ra a kum poropet det sa watung tari?

²⁶Det watungi lena, a Karisito in taramo a kum ngunungut ri, ra numur in ruk una nun a minamar.”

²⁷Turpasi una kum buk anun o Moses ma a kum poropet rop, o Iesu i papalos torom der una kum utna, ra di sa tumus tari uni ut, una Buk Tabu.

²⁸Ra detul wan milau sur a tamon ra der wan suri, o Iesu i lari sur in nan sakit mukut.

²⁹Ma der turbat dekdeki lena, “Un kis tomo nam mir, uni i sa lirop. In matanas i ling na sup mo.” Ra detul ruk ma i kis tomo nam der.

³⁰Ra detul kis sur detul in nangon, o Iesu i los pas a beret, i watung wakak pas uni, i tibik pasi, ma i tabor der nami.

³¹Ra a matander i tapalos, ra der tama lele pasi maragom, ra i rorom pas mut gusun der.

³²Ra der wasiso etalai torom der lena, “I lingmulus ut, in balandar i pirok nama gasgas ra i wasiso torom dar, ra datul wan nanan una kisapi ma i palos tar a wasiso na Buk Tabu torom dar.”

³³Uniutra, der katutur ma der milet melet usapat o Jerusalem, ra der wan torom a noino ma ra nat na ususer ma ara taro kai ra det kis tomo.

³⁴Det watungi lena, “A lingmulus ut! A Labino i sa katutur melet, ma i tur pat torom o Saimon.”

³⁵Ra der inanos un asau ra i wanpat torom der una kisapi, ma una nunder a tamtama lele kai uni, ra i tibik a beret.

³⁶Ra der wasiso utmakai una kum utna ri, o Iesu ut i tur epotor tandet, ma i watungi tandet lena, “A malmal torom mot.”

³⁷A pinindet i sursurin ma det ngara doko, det nuki lena, a nion kut ra det tama i.

³⁸Ma i watungi tandet lena, “Ilai ra mot ngara? Ma ilai ra mot wur nuknuk?

³⁹Mot in tama aru lamang ma aru kiking. Iau mulus ut ri. Mot in tuk iau, ma mot in tama iau. A nion kalako pinino, ma kalako sursur kai. Ikut a pining ut ma a sursur na pining utkai, ra uniri mot tama i.”

⁴⁰Ra i sa watung tari lenri, i ese aru lamano ma aru kikino tandet.

⁴¹Det gas ma det kisin, ikut ka det nurnur utmakai. Ma i ting det lena, “Katu utna kuri sur an nani?”

⁴²Ma det tabori nama lik kiripo ra di sa tun tari.