Lukas 24:13-42

¹³A kilang ni ran ota riamen re ’rail momaitelang kisin kanim eu ad a Emaus; a doo sang Ierusalem mail wonu de isu.

¹⁴Ira ari kasokasoi penaer duen mepukat karos.

¹⁵Kadekadeo ni ara kasokasoi o idedok pena, pein Iesus ap kotin pwara dong ira o iang ira kotila.

¹⁶A mas ara me atiat, pwe re de asa i.

¹⁷I ari kotin masani ong ira: Da me koma kasokasoi pena ni oma alialu, o da me koma insensued kila?

¹⁸Amen ira, me ad a Kleopas, ap sapeng indang i: Koe men wai ta men nan Ierusalem, me sasa, me wiauier wasa o ni ran pukat?

¹⁹A kotin masani ong ira: Pwe dakot? Ira ap indang i: Duen Iesus en Nasaret, me saukop manaman amen ni a wiawia o masan akan mon Kot o aramas karos.

²⁰O duen samero lapalap o atail saumas akan ar pangala i pwen pakadeikada ong matala o kalopuela i.

²¹A se kiki ong, me a pan kotin kamaioda wein Israel. Ari ran wet pong sili pong murin mepukat wiauier.

²²O pil kis at li akai kamasak kin kit ar pwaralang sousou o sangkonai.

²³Ni ar sota diar kalep a, rap puredo indada, me re diaradar sansal en tounlang kai, me katitiki, me a iasadar,

²⁴O kis at kai kolang sousou o, ap diaradar, duen li oko kasokasoida, a i me re sota diarada.

²⁵A kotin masani ong ira: O koma meid lolepon o pwand nan mongiong omail, en kamelele meakan, me saukop akan kopadar.

²⁶Kaidin i, me udan Kristus en kalokolok ap kodalang a lingan?

²⁷A ap kotin kawewe ong ira kisin likau kan duen pein i, tapiada ni Moses kokodo lel saukop akan.

²⁸Irail ap koren iong kanim, me irail koko ong. I ari kasongesong ira, dene a pan kotin daulul.

²⁹Ira ap ngidingidiki i potoan ong: Kom kotikoteta re at, pwe a pan wasa pongier o ran wet koren iong imwisokela. A ap kotilong ong nan im o, pwen mimieta re ra.

³⁰Kadekadeo ni a kotin iang ira ni tepel o, a kotin limada prot, laolaoki, a lao pilitiki pena, a kotiki ong ira.

³¹Mas ara ap pad pasanger, ira ap asa i. A ap kotin soredi sang mo ’ra.

³²Ira ap inda nan pung ara: Mongiong ata sota mokimokid ni a kotin mamasani ong kita pon al o, ni a kotin kawewe ong kita kisin likau kan?

³³Ira ari uda ni auer ota o purelang Ierusalem, o diarada ekamen ko, o me iang ir, kot pena wasa takis,

³⁴Katitiki: Nan melel Kaun o kotin iasadar o pwara dong Simon,

³⁵Ira ap kasokasoi, me wiauier nani al o, o duen ara asaki i a pilitiki pasang prot.

³⁶A ni ar masan pena mepukat, pein Iesus ap kotin pwara dong nan pung arail masani ong ir: Komail popol!

³⁷Irail ari masapwekadar o wapondar, o re kiki ong, me ani men, me re udial.

³⁸A kotin masani ong irail: Da me komail masak ki? O menda lamelam pukat mi nan mongiong omail?

³⁹Komail kilang pa i kat o na i kat, pwe pein ngai ta. Doke ia o kilang, pwe ani sota kin uduk o ti, duen omail kilang ia.

⁴⁰A lao masani mepukat, ap kasale ong irail lim a o aluwilu a kan.

⁴¹A ni ar sota non kamelele pweki ar peren o puriamuiki, ap kotin masani ong irail: Sota kan omail met?

⁴²Rap ki ong i kisan mam inin o onik.