Lucas 24:13-42

¹³Leeka mbizh ba mroo chop xaa mseed lo Jesús naz Jerusalén nu nzha xaa yezh kwaan le Emaús, kwaan nzhi kan chiibtub kilómetro.

¹⁴Nzhaze rop xaa nu nzhayadizh rop xaa re kwaan ngok.

¹⁵Nu gorna nzhayadizh rop xaa nu leeka gorzee lee Jesús nzhaze kwaan rop xaa,

¹⁶per nzho tub kwaan mleya zee namzeent rop xaa cho xaa nak xaa.

¹⁷Zee lee Jesús nzhé lo rop xaa ba: —¿Cho xaa kazet gu? Zee lee rop xaa mlaz chep nu nales doo nzhak lextoo rop xaa.

¹⁸Tub xaa le Cleofas nzhé lo xaa: —¿Che naleet naz Jerusalén mroo lu? ¿Che zer gon lu re kwaan ngok re mbizh ne?

¹⁹Lee xaa mnabdizh lo rop xaa: —¿Cho kwaan ngok? Lee rop xaa mkeb nzhé: —Kawdizhno nu kwent cheen Jesús xaa yezh Nazaret. Lee xaa ne ngok tub xaa non doo nu mzaa xaa kwent kwaan nzhé Dios lo lee xaa. Dios mxaal xaa zee mle xaa re kwaan gro doo nu mdiizh xaa duzna kwaan yalnabeyy zee mdedyall doo re myet mwii lo xaa.

²⁰Nu lee re ngwleyy non nu re xaa gol mzaa xaa lo re xaa mbit xaa, zee mkee re xaa xaa lo krus.

²¹Nu mle nu xgab lee xaa zelo nabeyy re sawlazh be, nu texonn xaa re xaa Roma, per lee nal nzhala chon mbizh ngut xaa.

²²¡Per nal garziil lak ngwnaa mle zee mdedyall doo nu, nel ngwa me roo baa cheen Jesús,

²³per nanguzhalt xkwerp Jesús lo re me! Nu gorna mbare re me lo re nu, ngune me lo re nu, lee me ngune lo chop mandad cheen Dios, xaa nzhé lo re me lee Jesús mbanla.

²⁴Zee lee zlak xaa nzo lo nu ngwa roo baa, zee ngune xaa leeka kwaan ngune re ngwnaa, per nanguzhalt xaa xkwerp Jesús.

²⁵Zee lee Jesús nzhé lo rop xaa: —¡Xaa ned! ¿Chozhiin tant nen doo nle gu krer kwaan mkee re xaa kwaan mzaa kwent kwaan nzhé Dios lo lee xaa yilo?

²⁶Nkin ded Crist bid, Xaa Xaal Dios Nabeyy, nu zeera bare xaa nya xaa pa nzho xni gro doo cheen xaa.

²⁷Zee lee Jesús mzaa kwent xomod mbarlo re kwaan nkee lo Xkyech Dios cheen lee xaa, re kwaan mzaa Ches kwent nu re kwaan nzhé re xaa mzaa kwent kwaan nzhé Dios lo lee xaa yilo.

²⁸Nu gorna mzhin rop xaa yezh pa nzha xaa, zee lee Jesús mle mod tub xaa ya mas zit,

²⁹zee lee rop xaa nzhé lo xaa: —Blaz lo rop nu, nel mzhela yizhyo. Zee mlaz Jesús lo rop xaa.

³⁰Gorna mzelo re xaa gaw, zee mzen Jesús cha pan nu mzaa xaa dixkix lo Dios nu mlerol xaaya, nu mzaa xaaya lo rop xaa.

³¹Zeera mxal lo rop xaa, nu mlabeyy xaa Jesús. Zee ta namlutra Jesús lo xaa.

³²Nu zee nzhé xaa lo wechxinn xaa: —¡Nyak doo lextoo be gorna nyaad wdizh be naz, gorna mzaa xaa kwent kwaan nkee lo Xkyech Dios lo be!

³³Nu leeka gorzee mzoli rop xaa nu zoza mbare rop xaa naz Jerusalén. Nu gorna mzhin rop xaa zee nzhé xaaya lo chiibtub xaa Jesús, nu lo stub naz re xaa nzo lo re xaa.

³⁴Nu nzhé re xaa lo rop xaa: —Telisa mban Xaa Nabeyy, ngunela Pér lo xaa.

³⁵Zee mzaa rop xaa re kwent ne xomod ngune xaa lo Jesús gorna nzhaze xaa naz, nu xomod mlabeyy xaa Jesús gorna mlerol Jesús pan.

³⁶Gorna lee re xaa seetaka kawdizh re kwaane, lee Jesús ta mreke xsaww lo re xaa nu nzhé: —Wen kwi re gu.

³⁷Per lee re xaa mzheb doo, nu mle re xaa xgab nu nzhé xaa: —Tub bes mzhin lo be.

³⁸Jesús nzhé lo re xaa: —¿Chozhiin tant nzheb re gu? ¿Chozhiin seetaka ned doo lextoo gu?

³⁹Wii gu yaa na nu wii gu nii na. ¡Leeka naya! Gal gu cho na zee ne gu mer naya. Tub bes nankanot baal nixa zhit, kwentaxa nkano naya, modxa nlu na lo gu.

⁴⁰Gorna ngulo nzhé Jesús kwaane, zee mlu xaa yaa xaa nu nii xaa lo re xaa.

⁴¹Nu nixa sbaa mlu Jesús yaa xaa nu nii xaa lo re xaa, per seesa nanlet xaa krera. Nagan doo le re xaa krera, nu noka nyakdoola re xaa. Zeera nzhé Jesús lo re xaa: —¿Che nkano gu kwaan gaw gu?

⁴²Zee mzaa xaa tik mbal nguy lo Jesús.