SAN LUCAS 24:13-42

¹³Ipan inon tonali oyahtayahque ome tetlamachticahuan ipan in altepetl itoca Emaús, cana ome hora ic huehca den Jerusalén.

¹⁴Huan omononotztayahque yehhuan ica nochin tlen opanoc ica in Jesús.

¹⁵Ihcuac omononotztayahque, san tlama in Jesús omahsitohque huan inuan onehnemohuac.

¹⁶Masque oteitaque, yehhuan omixpatlahque. Ahmo oteixmatque aquin Yehhuatzin.

¹⁷Oncan Jesús oquintlahtlaniloc: ―Tel ¿tlenon nanmononotztihuitzen ic nannehnentihuitzen huan nantlocoya? Yehhuan omoquetzque quen tlocoyahque.

¹⁸Huan se de yehhuan, itoca Cleofas, otenanquilic: ―Nochin tlacatl quimatihque tlen opanoc Jerusalén inin tonalten. Tel, ¿san tehhuatzin ahmo momati masque ompa motepaluilohtoc?

¹⁹Oncan Yehhuatzin oquintlahtlaniloc: ―Tel, ¿tlen opanoc? Huan oteiluihque: ―Ica in Jesús den altepetl Nazaret, inon se tlayolchicauqui hueyixtoc ica in tlen oquichiu huan ica itlahtol teixpa in Dios, huan noyojqui inixpa in tlacamen.

²⁰Huan quen in achtohque den tiopixcamen huan totequihuahhuan otetemactihque matetlahtlacoltican ica temiquilis ipan in cruz.

²¹Tehhuanten oticnehnehuilihque quen Yehhuatzin momaquixtinihque in tochantlacahuan den Israel. Huan axan yipanotoc yiyi tonali ic otemictihque.

²²Huan axan quen tel oticmatque ica tlen otechiluihque sequin sihuamen de tehhuanten. Tleca yehhuan oyahque huehca sancuel ipan in tlaltecochtli.

²³Huan quen ahmo ocahsique in tetlacayo, ohualahque techiluiyahque yehhuan omixcahcayauque ica in ángeles quen oquiniluihque quen in Jesús yolihuahtoc.

²⁴Niman oyahque sequin de tehhuanten ipan in tlaltecochtli huan oquitaque ijcon quen oquihtohque inon sihuamen, huan ahmo oteitaque in Jesús.

²⁵Oncan Jesús oquiniluiloc inon inehuan: ―Tel, ¿tlemach ahhuel onanquinehnehuilihque? Huan ¿quemach nanuehcahuisque ic nanquineltocasque nochin in tlen oquihcuilohque in tlayolchicaucamen?

²⁶Tel, ¿ahmo ijcon tlapanoloni in Cristo achto ic mohueyililos?

²⁷Oncan opehualoc quinnonotzalo ica in Tlahcuilolten tlen oquihtohque ica Yehhuatzin. Omopehualtic ica in iamahuan in Moisés huan ijcon omochiu ica nochin inon tlayolchicaucamen.

²⁸Ihcuac oahsitayahque ipan in altepetl canin oyahyaya, in Jesús omochiu quen san opanolotaya.

²⁹Huan yehhuan otetlatlautihque: ―Mamocahualo tohuan, tleca yitiotlac. Yitlapoyaucan. Oncan in Jesús inuan ocalacohuac huan omocahualoc.

³⁰Huan ihcuac omotlaliloc iixpa in mesa inuan, Yehhuatzin omoan in pantzin huan omotiochiu huan omoxehxeluihque.

³¹Ic inon tlen omochiu inixpa, ijcon oteixmatque Yehhuatzin in Jesús. Oncan Yehhuatzin san tlama oteixpolohque.

³²Huan yehhuan omoluihque se huan oc seya: ―Tel, ¿ahmo nele hasta otechyolpacti ihcuac otechualnonotzalotaya in Itlahcuiloltzin ipan in ohtli?

³³Oncan yehhuan ahmo ocachi omochixque. Niman omocuepque Jerusalén. Huan oquinahsitohque canin omosentlalihtoyahque in mahtlactli huan se tetiotlatitlaniluan ihuan oc sequinten.

³⁴In tetiotlatitlaniluan oquiniluihque in inehuan: ―Ic nele in Totecohtzin oihxohuac den mijcamen, huan Simón oteitac.

³⁵Oncan inon inehuan oquinnonotzque quen opanoc ipan in ohtli, huan quen oteixmatque in Jesús ihcuac omoxehxelo in pantzin.

³⁶Huan ihcuac teca otlahtohticatcahque in Jesús, Yehhuatzin omonextiloc inepanco yehhuan. Oquintlahpaloloc huan oquiniluiloc: ―Xiyetocan cuali namehhuan.

³⁷Yehhuan tequin omomoutihque huan oquinehnehuilihque oquitzticatcahque se yehyecatl.

³⁸Huan Jesús oquiniluiloc: ―Tel, ¿tleca nanmomoutiyahque, huan tleca ijcon nanquiyolnehnehuiliyahque?

³⁹Xiquitacan nomahuan huan nocxihuan. Yiyeh nehhuatl. Xinechmachilican huan xinechitacan. Se yehyecatl ahmo quipiya itlacayo quen namehhuan nanquitahque nicpiya.

⁴⁰Huan ic oquiniluiloc inin, oquinnextililoc in teman huan tecxihuan.

⁴¹Huan quen opactoyahque, ayamo oquineltocaque huan quen tel oquimatque. In Jesús oquiniluiloc: ―Tel, ¿nanquipiyahque tlen nanquicuasque?

⁴²Oncan otemacaque se pedazo michi tlapohpoxoli ihuan chihton nectli.