Luk 15:16-23

¹⁶Miaŋgöreŋ mali bau yeŋön sokop kötŋi neget eka ‘Ölöp mi nembi gölömni dop kölbawak,’ jiyökmö, mi mewöyök kunŋan qahö waŋgiyök.

¹⁷“Mewö mala uruŋi ahuiga kewö jiyök, ‘Iwinaŋgö nup ambazip wanat awamŋi yeŋön nup megetka söŋgöröŋi eŋgii nene nem timbireŋ aka maljemö, nöŋön kiaŋgöreŋ uzukörörap aka bödi mala kömumamgö akzal.

¹⁸Ni mönö wahöta iwinaŋgöreŋ liliŋgöba anda kewö jibi mötma, ‘Iwini, ni siŋgisöndok memba miaŋön gi aka Suep Toŋi qetal etkiba qetki mem bölial.

¹⁹Miaŋgöra göŋön kunbuk nöŋgöra ‘Nahöni,’ jimanaŋgö dop qahö akzal. Gi ölöp jinöŋga welenqeqega kun akŋam.’

²⁰“Mewö jiba wahöta iwiŋaŋgöreŋ anök. Anda mala miri dopdowii iwiŋan tikep endu kinda ehi kaiga wösöŋi pöröraköiga ehoriba ösumŋan diŋdiŋgöba anda imbiŋe gili geiga numbuŋi yöhötim nemba ‘Nahöni, owe owe!’ jiyök.

²¹Mewö ahökmö, nahönŋan jiyök, ‘Iwini, ni siŋgisöndok memba miaŋön gi aka Suep Toŋi qetal etkiba qetki mem bölial. Miaŋgöra göŋön kunbuk nöŋgöra ‘Nahöni,’ jimanaŋgö dop qahö akzal.’

²²“Mewö jii iwiŋan miaŋgöreŋök welenqeqeurupŋi kewö jii mötket, ‘Iŋini mönö ösumok maluku aködamunŋambuk kun memba kaba löŋgöt waŋgiget. Ila jalö imbiŋe köla meŋölöm waŋgiba köna esu könaŋe löŋgöt waŋgiget.

²³Mewöyök selnöŋ anda bulmakau dömŋi kelökŋambuk kun memba kaba qeba ohogetka nemba sösöŋgai albin.