Luk 12:48-57

⁴⁸En wen eni wekinmen nomo sabi wanim im bos wandim im blanga dum, en im nomo dum wanim im wandim, wal nomeda im nomo bin sabi, bat stil im garra gedim haiding du. Bat oni lilwan haiding im garra gedim, dumaji im nomo bin sabi. “Yumob irrim mi na. If dei meigim yumob haiwan, wal yumob garra duwit. En if dei meigim yumob brabli haiwan, wal stil yumob garra duwit, dumaji wen yumob sabi mowa en mowa, yumob garra duwit mowa en mowa.

⁴⁹“Wal aibin kaman blanga meigim ebribodi jinggabat wujei dei garra go. En dijan ting garra meigim trabul langa ebri kantri jis laiga faiya. En ai reken mobeda dijan ting bin go ebriweya olredi.

⁵⁰Bat ai garra abum main trabul langa det kros basdam. En mi nogud na, dumaji det trabul main nomo bin binij yet.

⁵¹“Wal maitbi yumob reken aibin kaman blanga meigim ebribodi jidan gudwei. Nomo. Aibin kaman blanga meigim ebribodi kadimat miselp.

⁵²Brom tudei na wen yu faindim faibala pipul langa wanbala haus, dei garra kadimat miselp, dumaji sambala bulurrum mi en sambala nomo bulurrum mi. Thribala garra fait langa dubala, en det dubala garra fait langa det thribala.

⁵³Det dedi garra fait langa im san, en det san garra fait langa im dedi. En det mami garra fait langa im doda, en det doda garra fait langa im mami. En det mamiwan garra fait langa im gajin du.” Lagijat na Jisas bin tok langa im wekinmen olabat.

⁵⁴Afta na Jisas bin tok langa ol detlot pipul deya, “Wen yumob luk det klaud kaman brom sangodanwei, streidawei yumob tok, ‘Im garra rein.’ En im rein.

⁵⁵En wen yumob luk det win kaman brom sauthwei, yumob tok, ‘Im garra hot.’ En im go hot.

⁵⁶“Yumob granggibala! Yumob gin luk dijan kantri en det skai en sabi wanim det win en rein garra dum. Wal wotfo yumob kaan irrim wanim God bin tok en sabi wanim im garra dum?

⁵⁷Yumob wandi jinggabat yumob ronselp wanim det raitwei.