Luk 12:48-57

⁴⁸Mewö qememö, nup meme azi kunŋan Kembuŋaŋgö jitsihitŋi qahö möt yaköba yuai aka meiga likepŋi ölöp jiget ihileknöŋ qemeaŋgö dop akzawi, Kembunöŋ miaŋgö likepŋi jiiga amqeqeŋi qeme. Anutunöŋ kungöra yuai gwötpuk waŋgiyöhi, yaŋön mönö mi mem sehiiga ölŋi gwötpuk ahumapköra al mambötma. Anutunöŋ kungöra yuaigö warökŋi sehisehiŋi al waŋgiyöhi, yaŋön mönö mi mem sehiiga ölŋi sehisehiŋi ahui meleŋ waŋgimapköra qesima.” Mewö.

⁴⁹“Nöŋön gölmenöŋ könöp ala ubi jemapköra etpiga urusihimni miaŋgö bölamŋan lök jeyöhaŋgöra ahöza.

⁵⁰Ahözapmö, mi ‘Ala umam,’ jibi sihimbölö gwötpuk mi nöŋgö qakne öŋgöba mösölumgöm niŋgimamgö akŋa. Anutunöŋ mewö miaŋön melun murutŋi mem niŋgima. O ni wahöjaliŋ ketaŋi möta malbi mem niŋgii miaŋgöreŋ teköma.

⁵¹Kewö mötmöribepuk: Jisösnöŋ luai qemamgöra aka gölmenöŋ erök. Nöŋön kewö jibi mötket: Nöŋön luai qemamgöra qahöpmö, nöŋgöra aka jula deŋgetka köŋ jabö ahuma.

⁵²“Mi kewögöra jizal: Nöŋgö Buŋa keunan ambazip uruŋini kuŋgui meleŋgeraŋgöra nalö kewöŋeyök könahiba kewö asuhuma: Miri kungö uruŋe ambazip 5 yeŋön sutŋine aŋgururuk aka julme. Likep karöbut yeŋön yahöt yetpuk aŋgururuk aketka likep yahöt yetkön karöbut yembuk jujul aka malme.

⁵³Iwi morö yetkön jula kerök-kerök ahotka nam morö yetkön tötal aŋguyohotka iranŋan iranŋi qetala julmahot.” Mewö.

⁵⁴Jisösnöŋ toroqeba ambazip kambu yeŋgöra kewö jii mötket, “Wehön gegeŋe miri böuleiba kousu töwiiga iŋini mi eka miaŋgöreŋök ‘Kie kama,’ jimakze. Mewö jigetka kama.

⁵⁵Saut görökenök luhut giliga eka möta kewö jimakze, ‘Miri könöpŋambuk akŋa.’ Jigetka miaŋgö dop akŋa.

⁵⁶O urumeleŋgö silesile ambazip, iŋini suep gölmegö tandökŋiri eka kie wehöngö könaŋiri ölöp kewörakzemö, nalö ki maljini, miaŋgö könaŋi qahö kewöta möt kutugetka qahö dop kölja.” Mewö.

⁵⁷“Iŋini ‘Yuai diŋdiŋi mi denöwö akin,’ jiba miaŋgö könaŋi mi denöwögöra aka nanŋinak qahö kewöta jim tekömakze? Mi qahö dop kölja.