Luke 12:48-57

⁴⁸Ikwerew-arteyel renh mwanty iley-angenh apek, alakenh ileyew. Warrkenh ra apmwelhelenty, ikwerew-arteyel renh alyepelant irrwampenh-anthem. Kel alakenhaym Akngeyelan anthem warrk akely ingwerenty anyentew. Akngey ilkelhem, ikwer arraty warrkerreyew. Rap renh ayerney-angenh warrk ingwerewan. Akngeyel apek warrk ilkwarl ingwerentyak anyentew anthem-anem. Akngey ilkelhem, ra ikwer arraty warrkerreyew arrpemarl. Nthekwern ra alakenh angkey-angenh, ‘Warrk nhayman ilkwarl, nthekwern atha arnwarney-angenh.’”

⁴⁹Jesus-elan kwertengerl ikwerenh-rnem akalty-anthenh-antey, rap ikwer-rnem angkew, “Ayeng apetyew ahern nhenh-warl, angka Akngey-wenh ilaynteyew. Ingwer-rnemelan iylparethel awey-angenh. Akngeyel renh-rnem rwewarl iweyenh, aletharl ampeyel-warl. Ayengan iterreyel, ‘Akngey alakenh anamerl irremer!’

⁵⁰Ingwer-rnemel-tangkwel ayenh atweyenh, artewentyel irrwampenh-anthemel. Akngeyel ilew awank-akerr, alakenharl irreyenh. Ayengan artewenty iterreyel-anem mpwelheyel, ayenh rernem ywerrelhelemel ipmew atweyew-atety.

⁵¹Arrantherr apmwel-ayeth iterreyel alakenh, ‘Jesus-ang apetyew ahern nhenh-warl, ingwer-rnem ileyew, akeleyt anaynteyew?’ Arrangkwarl! Akngerr ilterrerl-aneyenh arnerant-arey atyeng-they.

⁵²Ingwer-rnem altyernem anerl-aneyenh warl anyentel. Ingwer-rnemel ayenh apenteyenh, ingwer-rnemelan arrangkw apek.

⁵³Rernemap ingkerrenh ilterrerl-aneyenh, akeleyt aney-angenh, arrangkw. Aynenheng-rnem ilterrerl-aneyenh. Amenheng-rnem ilterrerl-aneyenh arrpemarl. Anherrenheng-rnem ilterrerl-aneyenh arrpemarl. Alakenhaym akngerran ilterrerl-aneyenh atyeng-they.”

⁵⁴Jesus angkew akngerrarl rtnenherrenhew, “Arrantherrarl akwerrkel-akwerrkel arem, alker-itwewarl artenhey-alpem, arrantherrap alakenh angkem, ‘Ya, rlengkan kwatyarl rntwem.’ Raw inngarl rntweman.

⁵⁵Arepal pwenty, arrantherr alakenh angkem, ‘Ya, aherrety-anem irrenhey-alpeyenh alerl-antey.’ Rap inngarl aherrety irreman.

⁵⁶Arrantherran arraty iterrey-angenh! Arrantherr arem akwerrkel-akwerrkel-then arepal-then, arrantherrap arem, nthakenh irreyenh. Arratyip! Arrantherr iterl-aremer, ran aynteyenh, ayengarl angkeyel-angkwarr. Rlengkan arrantherr anngel ilek-ilek areyel. Arrantherrap iterl-arey-angenh, nthakenh irreyenh arrwekel.

⁵⁷Arrantherr iterl-aremer, arraty aneyew. Kel arrantherr arraty anayntenh-arey!