ᤗᤢᤁᤠ 12:48-57

⁴⁸ᤁᤖ ᤜᤠ᤺ᤳᤗᤧ ᤁᤢᤴᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤔᤧᤏᤡ᤺ᤛᤢᤴᤏᤠᤱ ᤋᤧ᤺ᤶᤓᤢᤰ ᤆᤠᤔᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤸᤗᤧ ᤔᤡᤛᤠᤰᤗᤰ ᤋᤧ᤺ᤶᤓᤢᤰ ᤆᤖᤥ॥ ᤜᤠ᤺ᤳᤗᤧ ᤕᤖᤡᤰ ᤂᤥ᤺ᤛᤢ᤹. ᤂᤧᤸᤗᤥᤗᤠᤶ ᤕᤖᤡᤰᤁᤣ ᤏᤠ᤺ᤰᤗᤥ. ᤜᤧᤰᤁᤩᤠᤱ ᤜᤠ᤺ᤳᤗᤧ ᤕᤖᤡᤰ ᤗᤰᤐᤧᤴ ᤂᤥ᤺ᤛᤢ᤹ ᤂᤧᤸᤗᤥᤗᤠᤶᤔᤠᤱ ᤕᤖᤡᤰᤁᤣ ᤏᤠ᤺ᤰᤗᤥ॥”

⁴⁹“ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤡ ᤁᤣ᤺ᤳᤇᤧ ᤋᤩᤠᤱᤒᤠᤖᤥ. ᤁᤖ ᤋᤃᤡᤛᤠ ᤔᤡ ᤗᤠ᤺ᤛᤧᤸᤗᤧ ᤏᤢ᤺ᤒᤠ ᤐᤥ᤺ᤰᤂᤧᤒᤠᤖᤥ॥

⁵⁰ᤀᤡᤱᤃᤠ᤹ᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧᤴ ᤒᤵᤋᤡᤛ᤻ᤔᤠ ᤐᤥ᤺ᤱᤔᤠ ᤁᤳᤋᤢᤱᤗᤥ॥ ᤂᤧᤴ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤀᤠᤛᤰᤔᤠ ᤜᤢ᤹ᤛᤡᤱᤅᤠᤱ ᤘᤠ᤹ᤖᤥ॥

⁵¹ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤏᤠᤖᤢᤱ ᤋᤠ᤺ᤳᤇᤧ ᤋᤩᤠᤱᤒᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤡ᥅ ᤔᤧ᤺ᤴᤗᤥ᥄ ᤀᤡᤱᤃᤠ᤹ᤃ ᤔᤏᤠᤜᤠ᤹ ᤛᤧᤶᤔᤠᤛᤡ ᤑᤠ᤹ᤀᤠᤱ ᤋᤩᤠᤱᤒᤠᤖᤥ॥

⁵²ᤀᤠᤸᤗᤀᤠᤱᤎᤥ ᤅᤠᤛᤡ ᤔᤏᤠ ᤁᤧᤘᤠ᤹ᤒᤠ ᤜᤡᤶᤛᤕᤱᤅᤥ ᤛᤢᤶᤓᤢᤖᤧ ᤋᤰᤗᤧᤱᤘᤠᤀᤥ ᤏᤧᤵᤑᤢ. ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤛᤢᤶᤓᤢ ᤔᤧᤒᤥ᤺ᤰᤁᤠᤱ ᤂᤧᤱᤜᤠ᤹ ᤔᤧᤛᤧᤖᤥ॥

⁵³ᤁᤢᤶᤒᤠ᤺ᤴ ᤁᤢᤛ᤻ᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰ. ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛ᤻ᤛᤠ᤺ᤴ ᤁᤢᤶᤒᤠᤖᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤁᤢᤶᤔᤠ᤺ᤴ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤴ ᤁᤢᤶᤔᤠᤖᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥ ᤜᤧᤰᤁᤩᤠᤱ ᤏᤥ᤺ᤵᤔᤧᤴ ᤁᤢᤶᤒᤠᤱᤗᤡ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤐᤠᤱᤗᤡᤔᤧᤴ ᤁᤢᤴᤏᤥ᤺ᤵᤔᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥”

⁵⁴ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤶᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤏᤠᤶᤎᤠ ᤐᤡᤛᤠᤱ ᤂᤠᤵᤔᤡ᤺ᤵᤐᤠᤴ ᤁᤧᤏᤡ᤺ᤛᤢᤶᤔᤡᤸᤗᤧ ᤀᤠᤸᤗᤥᤛᤠ ᤘᤠᤜᤡᤳ ᤌᤠ᤹᤺ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤶ. ᤜᤧᤰᤁᤩᤠᤱ ᤜᤧᤰᤁᤣᤗ᤹ᤖᤡᤰ ᤘᤠᤜᤡᤳ ᤌᤠ᤹᤺॥

⁵⁵ᤗᤠᤱᤃᤧᤴᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤸᤗᤧ ᤀᤠᤸᤗ ᤛᤠ᤹ᤖᤡᤰ ᤜᤠᤱᤘᤠ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ. ᤜᤧᤰᤁᤩᤠᤱ ᤜᤧᤰᤁᤣᤀᤣ ᤐᤥ᤺ᤱ॥

⁵⁶ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤀᤰᤂᤣᤗ᤹ᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤢ ᤋᤖ᤺ᤱᤍᤡᤱ ᤋᤠᤱᤛᤠᤱᤅᤥᤒᤠ ᤐᤠ᤺ᤴᤏᤡᤴ ᤀᤥᤃᤧᤔᤧᤳᤋᤢᤶᤔᤠᤱ ᤋᤠ᤺ᤴᤍᤡᤰ ᤁᤧᤒᤥ᤺ᤱᤒᤠ ᤐᤠ᤺ᤴᤏᤡᤴ ᤁᤧᤒᤠ᤺ᤳᤋᤢᤶ. ᤁᤖ ᤁᤴ ᤕᤧᤶᤔᤥ ᤁᤧᤍᤠ᤺ᤒᤠ ᤔᤡᤰᤛᤣ᤺ᤴᤜᤠ᤹ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠᤒᤣ᥅”

⁵⁷“ᤂᤡᤏᤡ᤹ ᤀᤡᤱᤃᤠ᤹ ᤆᤥᤃᤢᤱᤒᤠ ᤕᤠ᤺ᤶᤒᤰᤁᤡᤴ ᤏᤢ᤺ᤒᤠ ᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤌᤣᤀᤠᤱ ᤀᤠᤒᤠᤅᤣ ᤁᤧᤴᤇᤧᤴᤍᤢᤶᤔᤡᤴᤒᤠᤒᤣ᥅