LEVITIKO 2:1-11

¹Ma Dirava ese Mose ia oda henia, Israela taudia dekenai do ia gwau: “Bema tau ta ese paraoa boubouna Lohiabada dekenai ia henia gwauraia neganai, ia be paraoa namo herea momokani do ia mailaia. Ia ese paraoa ena latanai olive dehoro do ia bubua, bonana namona muramura ena pauda danu paraoa dekenai do ia atoa.

²Vadaeni Arona ena natuna tau dekenai do ia mailaia. Unai neganai unai hahelagaia tauna ta ese iena imana dekenai paraoa mai ena olive dehoro sisina, bona bonana namona muramura ena pauda ibounai do ia abia, bona unai gau toi be boubou patana ena latanai do ia gabua ore. Unai be Lohiabada dekenai henia ena toana. Unai boubou idia gabua ena bonana be namo herea Lohiabada dekenai.

³“To paraoa ena orena, idia gabua lasi gaudia be Arona mai ena natuna tau edia, do idia ania. Ia be helaga momokani, badina be Lohiabada dekenai henia boubou dekena amo idia abia.

⁴“Bema boubou gauna be beredi, amu dekenai gabua gauna, mai hatubua gauna lasi dekenai do umui gabua. Keke, paraoa bona olive dehoro idia mikisi dekena amo karaia gauna, o bisikesi, olive dehoro dekena amo idia dahua gaudia umui henia diba.

⁵“Bema emui paraoa boubouna be auri palaka ena latanai gabua gauna neganai, ia be paraoa namona bona olive dehoro umui mikisi dekena amo umui karaia gauna. To mai hatubua muramura gauna be lasi.

⁶Do umui makohia maragimaragi, bona ena latanai olive dehoro do umui bubua. Inai be paraoa ena boubou ta.

⁷“Bema emui paraoa boubouna be paraipani dekenai gabua gauna neganai, paraoa namona bona olive dehoro umui mikisi dekena amo do umui karaia.

⁸Inai paraoa bouboudia, Lohiabada dekenai umui henia gaudia be hahelagaia tauna dekenai do umui mailaia. Ia ese boubou patana dekenai do ia abia lao.

⁹Hahelagaia tauna ese inai boubou ena kahana do ia abia, Lohiabada dekenai henia boubou ena toana, bona boubou patana dekenai do ia gabua. Inai aniani ia gabua ena bonana be namo herea Lohiabada dekenai.

¹⁰Unai boubou ena orena, idia gabua lasi gauna, be hahelagaia taudia edia. Ia be helaga momokani, badina be Lohiabada dekenai henia boubou dekena amo idia abia.

¹¹“Paraoa boubou mai hatubua muramura danu be Lohiabada dekenai do umui mailaia lasi. Hatubua muramura o hani be boubou gauna danu do umui atoa lasi. Lohiabada ena boubou patana dekenai inai bamona gaudia do umui gabua lasi.