Leviticus 2:1-11

¹Emun duen ebpemuhat te pemuhat he para gasa te Nengazen, ne ǥemita zin is kineupiyahan he kelasi te herina, ne sehuǥi zin heini te lana wey veyewà.

²Uwita zin heini ziyà te menge memumuhat he menge kevuwazan ni Aaron. Ne edterinan te memumuhat haazà te sengekemkem he herina he midsehuǥan te lana, wey ragkes is langun he veyewà he insahug kayi he midtarin din, ne edtutungen din diyà te pemuhatà. Edtutungen din heini he paaǥi te kedtentenuzi te Nengazen. Is kehemut kayi he pemuhat te pinaaǥi te hapuy ne ebpekepenunuat te Nengazen.

³Is egkesamà dutun te herina, ne ǥaked ni Aaron wey te menge kevuwazan din, ne utew heini segradu su zuma heini zuen te pemuhat pinaaǥi te hapuy he impemuhat diyà te Nengazen.

⁴Emun duen ebpemuhat te supas he midhilutù diyà te evuwan he pemuhat he para gasa, kinahanglan he iyan egemiten din is kineupiyahan he kelasi te herina he wazà tepayi. Egkehimu he ibpemuhat is mekepal he supas he midsehuǥan te lana etawa menipis he supas he midezasan te lana.

⁵Emun is ibpemuhat he supas ne ziyà hilutua te mevavew he hilutuey, kinahanglan he iyan egemiten is kineupiyahan he kelasi te herina he edsehuǥan te lana, piru kenà edtepayan.

⁶Ebpenevien heini ne ed-itisan te lana. Pemuhat heini he para gasa.

⁷Emun diyà edhilutua te karà is supas he ibpemuhat, kinahanglan daan he iyan egemiten is kineupiyahan he kelasi te herina ne edsehuǥan daan heini te lana.

⁸Uwita heini he menge pemuhat diyà te memumuhat su wey zin ikepemuhat diyà te Nengazen duen te pemuhatà.

⁹Edterinan heini te memumuhat, ne haazà is tinarin din edtutungen din diyà te pemuhatà he paaǥi te kedtentenuzi te Nengazen. Is kehemut kayi he pemuhat te pinaaǥi te hapuy ne ebpekepenunuat te Nengazen.

¹⁰Ne is samà dutun te pemuhat, ne ǥaked en ni Aaron wey te menge kevuwazan din, ne utew heini segradu su zuma heini zuen te pemuhat pinaaǥi te hapuy he impemuhat diyà te Nengazen.

¹¹Is langun he pemuhat he para gasa he ibpemuhat diyà te Nengazen kinahanglan he wazè din tapey, su kenè kew engayan he edtutung te tapey etawa teneb dutun te kebpemuhata niw te Nengazen te pemuhat pinaaǥi te hapuy.