Lakbogogi Wene 2:8-38

⁸nit nenane vaga dombok yagalagwi hulisagwi yi, nggarogonggan wokbaluk yagalagwi embetep?

⁹Nit Paratiya menda inim, Mediya menda inim, Elam menda inim, Mesopotamiya agarwik menda inim, o Yudeya en, Kapadokiya en, Pondus en, Asia en,

¹⁰Virigiya en, Pambiliya en, Mesir en, o Libiya kota Kirene avilis ambot andoma en, it Oroma menda wagao inim,

¹¹nit Yakuri menda inim, it Yakuri menda dek ovara, Yakuri enawene wokbaluk it ogasagwi menda inim ogarit lagagwa inim, Kereta menda inim, Arap menda inim, nit ovok erogo Ala nggarogo ogarubuk menda ombok dombok ogaga ako nenane adik-adik vaga mbilinogo yuknirugwi ovok hulisagwi o,” yiluk, yagagwa.

¹²It enalon en, “Yi nggarogo ogarup yiluk yagalagwi?” yiluk, at ambi yugigik ogagu lagagwama,

¹³it nin en, “Dek o. Is anggur amburup nunggu lagarwik, nenek-nenek hak yagan nagwis yi hinil bigisenes,” yiluk enaganda yagagwa.

¹⁴Enaganda yagu lagagwama, at Peterus aswi 11 inim mondok iri lagagirik, ane ombok vaga yugirigya dugwit, “Hit nowa-nasin Yakuri menda inim, hit o Yerusalem agipik menda ovok erogo inim, wene ambi yukherayogon yiluk, henaruk hunggu dugwit, dibagu dogwes.”

¹⁵Yugirigya lagagirik, “Hutun mo ao daga wagya hegek, jam 9 vaga at yiluk, it yi, anggur amburup nelok nenek-nenek hak yagan nagwis embetep andi dek o.

¹⁶Nit nenane adik-adik yagalagwi yi, at Navi Yoel Ala en yugugu hegek yagagi ako atma asiga yi aro:

¹⁷‘Ala en iri dugwit, O hivis ogarup hudi yi ap akwa ndi ap akwa ovok erogo Averiniki enovaga wombabisa warisogon. Henaburi ap inim akwa inim enendawima yugirigya neyagek, an iris ako yugeregek nagwis, Henaburi apsawe en yugirigya neyagek nogo heda enabi heda hugwi, Henasini enanggok en yugirigya neyagek enabi vaga hugwi, Ogarusogon o.

¹⁸Hivis andi hudi vaga, it an nayeloman muni akwa inim, ap inim, it ogo ovok erogo Averiniki enovaga wombabisa warisogonma, an nane yugeregek nagu dogosogon.

¹⁹Mbogot-vaga eloma en elose adik-adik menda ogagya, yagamu wen vaga en nggarogo ogarubuk menda ogagya, Ogagya dugwit, Enamuya inim, yivuk aveta inim, hali abya inim, ogarisogon o.

²⁰An Henasin Ninis Ombok warup ako vanggo yi wagya neyagek, mo il hup agya, saut andi muya ovagak agya, ogarimindikmu, An niris novangge dikduk ogakluk wagya neyalok, Wi! yiluk, siyabanusogon o.

²¹Andi ogagya dogomima, ap ambi sa en, Nenasin Inis Ombok o, yiluk, an neyanggup iri dogomima, agap wendarisogon, yiluk, at Navi Yoel en yugeragagi ako ari wagya yi arat o.

²²Hit ap Iserali menda yi, wai. An yukheraliga yi, des erogo hunggu dogones. Ala en At Yesus Nasaret menda denogo lakba wagagi hit dibavovok yiluk, Ala en anye okbagya hegek, at hinim dugwit nggarogo ogarubuk menda ogagya, enalon werek menda ogagya, elose adik menda ogagya, ogagya lagagi ako henelup.

²³At Ala en hivis ogarup hologo bagagi musek Yesus ako vagogo hit Iserali menda wokhurugu lagagwama, hambupwak yiluk, it ap weyak ogasagwi menda hinim eyave yo vaga lobalogo bagagup ovara,

²⁴at hambisagwima andoma mondok sovalek dogop meyan atma, hambuluk lendagwima andoma yagan watya lagagi ako agap wendarogo Ala en iluk erogo mondok okbagagi,” yiluk, Peterus en yugeragagi.

²⁵Yugirigya lagagirik, it Yesus hambisagwima en iluk erogo mondok yagagi avyarat ombarupwak yiluk, Ndawi Wene ambi yugirigya dugwit, “O endak erogo at inis ombok Daut en Yesus vivis ogarup wene iri dugwit, ‘An Nasin Ala mondok-mondok nelosema agarik higi o. Nenasin ninim atma, an mondok wadok dek at agirik o.

²⁶Anderogo atma, an nendawi vaga adenggen imbitya, Nane vaga siyabagagya, Ogasiga o. An hambisagwima lagiluk hetbaninggya, Habut Endawi Sek Adigat Denek ako ogo, hambuluk, vidis agya neyagek, hetbaninggya, Ogarisogon dekma, An neyave hambisogon halok, nendawi dulik dugwit, nendawi seyalek at dogosogon o.

²⁸Niluk dogogiluk, sup yi o, yuknogogin, Hat ninim werekma nadenggen ombok dombok okbanugun o,’ yiluk, yagagi wene ako andi, eyave Yesus en ogarup yiluk avok vagalogo yagagi.

²⁹Nowa-nasin. Nit nenombao Daut ogagagi wene an vagalogo yukheraliga. At Daut ako hambigya lagagimu, wimu mabagagwarikmu akoma ninil helagwi o.

³⁰At Daut ako andi, Ala en yugugu hegek yugeraliga menda navi atma, Ala en wene hanum mbalogo Daut yugugu dugwit, ‘Daut wai. Hat hombawi ambi wene yugeraligama havoloma dogopwak yiluk anen mondok okbayogon o’, yiluk, yugogogi. Yugogogi wene ako elup dugwit,

³¹At Ala denogo bagagi Keretus ako hambimima iluk erogo mondok okbayogon, Daut elup atma iri dugwit, An hambisagwima lagiluk hetbaninggya, An hambuluk, vidis agya neyagek, hetbaninggya, Ogarisogon dek o, yiluk, yagagi o.

³²Yesus warogo bagagup ako andi, Ala en iluk erogo mondok okbagagi nit ovok ninil hagagup atma, vagalogo yukherelagwi o.

³³Ala en iluk erogo mondok okbagya lagagirik, inggis amotkan dogopwak yiluk, siyabagagirikmu, Asin en, Averiniki wokherayogon o, yiluk, yagagi ako wigya lagagirik, woknera wagagi vaga nit ogasagwi hinil ninugwis, yugwi henaruk hunggwis, ogasagwi o.

³⁴At Daut ako mbogot-vaga enggetek ovara, aren iri dugwit, ‘At Nenasin Inis Ombok Ala en, an Nasin Inis Ombok yugugu dugwit, It ap ombok-ombok hinim ndup ogorek agindik menda, An havema sovalogo bigitek neyagek, ninggis amot vikit hora yima’ yiluk, yagagi.

³⁶Daut en anderogo yagagi atma, at yo winik vaga hit lobalogo bagagup Yesus ako andi, Ala en hit Henasin Inis Ombok dogopwak yiluk, okbagya, eke, An denogo bagagis Keretus yi aro, yiluk, yukhirigya, ogagagi ako, hit Iserali menda ovok en, Yi avyarat, henelup arovovok yiluk yukheraliga o,” yiluk, yugeragagi.

³⁷Yugirigya ako hobaluk, “Yesus watugup andi, nit weyak ogagagup atma,” yiluk, enendawi wakidugu lagagwarik, Peterus inim, it lakbogogi nin inim, hemerinigu dugwit, “Ayai, nenaswei. Nit weyak ogagagurikmu, nit nggarogo ogaruk o?”

³⁸Yugurugu lagagwama, at Peterus ako en, “Henomaluk dek erogo bigigapwak yiluk, hit henadik-henadik weyak ogasagwi ako henendawi wenggebaluk mbo bagu dogomundik, Yesus ambetaga lagu dogwes. Mbo bagwi hiniselok, Yesus Keretus inis vaga ima wombabigigaup. Eke, andi ogagu hiniselok, Ala en Averiniki ako un onggo dek wokherayogon o.