LAASUNDE 5:1-11

¹Tó n gɛ Luda ↄnn, ǹgↄ̃ kú kũ laakariio. Ǹ nai ǹ a yã ma mana de yↄ̃nkↄnↄ sa'ona gwela, zaakũ ń yãdↄ̃nasari mɛ́ àdi tó ò yã vãni kɛ.

²N lɛ́ súngↄ̃ wãnaro, ǹsun wã ǹ yã o Ludanɛro. Lákũ à kú musu ń kú zĩtɛ nà, ǹsun yã o dasiro.

³Lákũ yãbↄkↄtɛ dasi dì su kũ nana'onaao nà, lɛn yã dasi bↄtɛnaa dì su kũ yↄ̃nkↄyão lɛ.

⁴Tó n lɛ́ kɛ̀ Ludaa, ǹsun a fĩnabona gↄrↄ gágaro. Ǹ a fĩna bo, zaakũ yↄ̃nkↄnↄ yã dì kánɛro.

⁵Lɛ́kɛna Ludaa sari mana de n lɛ́ kɛ̀a papanaa sarila.

⁶Ǹsun tó n lɛ́ n da yãnlo. Ǹsun o sa'oriinɛ n pì n sã lɛ́kɛna yãnlo. Ń ye Luda pↄ fɛ̃nyĩ n yã pì yãi à zĩ kũ ntɛn kɛ kakatɛn yá?

⁷Nana dasi ona kũ yã dasi bↄtɛnaao dì su kũ yã pãomɛ. Abire yãi ǹgↄ̃ Luda vĩna vĩ.

⁸Tó n è òtɛn gbãna mↄ takasidenↄnɛ gukea, òtɛn gíńnɛ kũ yãzɛdeo òtɛn yã gↄ̃gↄ̃ńnɛ a zɛ́aro, ǹsun tó yã pì bo n sarɛro, zaakũ bùsuu pì gbãnadenↄ tɛn wɛ́ dↄkↄ̃i, akũ ń gbɛ̃ zↄ̃kↄ̃nↄ tɛn wɛ́ dↄńyĩ dↄ.

⁹Ń pínki dì bùsuu pì baka blemɛ, zaakũ kína mɛ́ à buranↄ vĩ.

¹⁰Gbɛ̃ kũ à ye ↄgↄↄi dì kĩaa, gbɛ̃ kũ à ye aruzɛkɛii àree dì mↄ́aro. Abirekũ pãmɛ dↄ.

¹¹Tó aruzɛkɛ tɛn kara, a blèrinↄ dìgↄ̃ karamɛ. Bↄ́ àreen à vĩ a dikiriinɛɛ? À wɛ́ pitia baasiro.