LAASUNDE 2:1-14

¹Ma ò ma zĩdanɛ: Ǹ futɛ ǹ pↄnnakɛna yↄ̃ ǹ gwa ǹ nnamana dↄ̃, akũ ma è abirekũ pãmɛ dↄ.

²Ma è kũ yáadↄna bi yↄ̃nkↄyãmɛ. Pↄnnakɛna sↄ̃, bↄ́n òdi leaa?

³Ma pↄnna wɛ̀tɛ wɛ̃minaa gũn ma ↄ lìka yↄ̃nkↄyãi, ama ma swɛ̃̀ tɛn domɛnɛ arɛ ↄ̃ndↄ̃ gũn de mà dↄ̃ yã kũ à mana bisãsirinɛ à kɛ andunia gũn a wɛ̃̀ndi zaka lɛ́n.

⁴Ma zĩ zↄ̃kↄ̃nↄ ↄ kpà, ma kpɛ́nↄ bò ma zĩdanɛ ma geepi línↄ pɛ̀pɛ dasidasi.

⁵Ma karanↄ kpàkpa ma swa dàkonↄ kɛ̀kɛ ma lí kũ òdi a nɛ́ ble buri sĩnda pínki bàban.

⁶Ma íkakinↄ kɛ̀kɛ ògↄ̃ mↄtↄ pisi líkpɛ pìnↄa.

⁷Ma zↄ̀nↄ lùlu gↄ̃gbɛ̃nↄ kũ nↄgbɛ̃nↄ, ò a kenↄ ì ma bɛa. Má zùnↄ kũ pↄ́kãde ketenↄ vĩ dasidasi de gbɛ̃ kũ ò kú Yurusalɛmu ma ãnↄla ń pínki.

⁸Ma andurufu kũ wuraao kàkaramai kũ kínanↄ aruzɛkɛnↄ kũ ń bùsu pↄ́nↄ. Ma lɛ̀sirinↄ sɛ̀ gↄ̃gbɛ̃ kũ nↄgbɛ̃nↄ, ma nↄgbɛ̃ kũ gↄ̃gbɛ̃ dì lukańyĩnↄ sɛ̀ dasi.

⁹Ma tↄ́ bò, má zↄ̃kↄ̃ de gbɛ̃ kũ ò kú Yurusalɛmu ma ãnↄla ń pínki, akũ má kpɛ́ ↄ̃ndↄ̃ vĩ a pínki gũn.

¹⁰Mádi gí ma zĩdanɛ kũ pↄ́ kũ à ma wɛ́ blèeoro. Mádi pↄ́ kũ à ma pↄ gbà ke tóro. Ma pↄ kɛ̀ nna ma zĩkɛna sĩnda pínkia, àkũmɛ ma ísimmawarana pínki láada ũ.

¹¹Kũ ma wɛ́ pɛ̀ yã kũ ma kɛ̀nↄi pínki kũ ísimma kũ ma wàraao a musu, ma è a pínki bi pãmɛ, pɛna gukoriamɛ, à àre vĩ andunia gũnlo.

¹²Akũ ma laasun lɛ̀ gɛna ↄ̃ndↄ̃ kũ yↄ̃nkↄkɛo kũ mìsarikɛo kpa. Yã kũ ò kɛ̀ zaa zĩ baasiro, a kpaten kína gɛ̃nɛ ni kɛ dↄↄ?

¹³Ma è ↄ̃ndↄ̃ àre vĩ de yↄ̃nkↄkɛla lákũ gupura dìgↄ̃ àre vĩ de gusirala nà.

¹⁴Ɔ̃ndↄ̃ri wɛ́ dìgↄ̃ kú a arɛ, yↄ̃nkↄ dìgↄ̃ kure gusiran. Akũ ma è gó dokↄ̃nↄ mɛ́ ani ń bikũ ń pínki.