Kereninua 9

1

2

3

4

5

6

7

8

9

10

11

12

13

14

15

16

17

18

19

20

21

22

¹Are angelo namba 5 meni so pisenu na iri niro kuna zo utura ena tekero osero mu zebura niro itinua awa gina awa. Nu degara so be piaise ki numore potiwa awa.

²Are nu degara so be pienu ibosi bamu erinua awa. Bua awawi ibosi eritinowia amira te ibosi eriro witiro waikore uture gogo wero tepo wenua awa.

³Ibosira mokara ena ariri babezinoma di nusokare mai wekimaira ine ami kei awero zebura osewa awa.

⁴Ata nukare zebura yekere nenare ni gomire awa iwo warise sai oko aewa. Ema Anutura owe mewa nusokarera tepo awa gege iwo warise sai.

⁵Ata dara betarise oko aewa. Tepo gamara inua 5 ago yaya tapinoise nuarise amira daba sai awa. Yaya tamai meni awa guye meni mai gayawi yaya tapinowera ago ine.

⁶Are be amira ana ema nukare betamu samunora, ata oko betamunora. Betai zumamunora, ata betai meni nukare doro azu bayamunoya.

⁷Ariri babezinoma awa gina wo osira noise zuzuna wamu sero nena durerenawera pupinowera ago ine wewa awa. Giti kopi nusokarera nena zo itinua awa gina giti simaira nena gol meni wai ago ine wenua awa. Ota giti benau nusokare meni awa emara ine.

⁸Giti tu nusokare awa bama kapawaira giti tu ine iboi-tatana. Di nusokare awa wo layonra ine.

⁹Zazana nusokarera beri kapa meni wai ine ami itinua awa. Wabu nusokarera awi duruka meni awa wo osi dainiro ami iwora bayamu sero kares zumuro puro sumawera awi towia ago ine.

¹⁰Awa-zimi nusokare meni awa gugumi meni mai uwinowia ago ine awa. Di nusokare awa awa-zimi amira itia, ami inua 5 amira mokara ema gapinoise yaya potitinoise nuamunora awa.

¹¹Ata ema tua nusokare noya. Nu degara angelo awa. Zazo nuso Yuda gera Abadon, ota Grik emara gera meni awa Apolion. (Ge nasokaira awa nena sisero tepo wai ema.)

¹²Ni bouga meni be etorobara ago Yei asenua, awa zo tepo weti eto iterato.

¹³Are angelo namba 6 meni so pisenua. Alta gol meni wai Anutu nana giti mokara itia dumu nuso zoeto-zoeto

¹⁴amira ana ge zo kei awero angelo namba 6 so puro dopero itinua amire ge ego tugata wenu ninina awa, “Ou Yufretis bamu amira paora ena angelo 4 mui wai itewera, nukare awa bese bayare.”

¹⁵Nukare ami zepa awa, o inua awa, o waiko awa, o aua awa zora awai zebu sero ema agewa 1/3 dara betarise amira be mai gamu sia inoise itisowa, nukare awa besenua awa.

¹⁶Are goroba ema nusokare wo osi tame itai amira namba nusokare 200 milion asewa ninina.

¹⁷Na atua wago inoise ema ata wo osi amira benau nusokare awa ego ine gina awa. Ema nukare tama woi nusokare kapa meni wai ata izaire uwiwaire nozawaire awa wosuniro noiwa awa. Ota wo osira giti kopi meni awa wo layonra giti kopi ine. Be so nusokarera ena niaore ibosire zebu awero beriberi wai zazo sopa dai kei awenua awa.

¹⁸Are nena mena-mana etorobara ami zebura ema agewa 1/3 gera-gaira wero tepo wewa awa. Wo osira nana be sora ena niaore ibosire zebu awero beriberi waire kei awenua ami ago wenua awa.

¹⁹Wo osira putou nusokare awa be nusokarera ata awa-zimi nusokarera itinua awa. Awa-zimi nusokare awa zi ine giti kopire ami yaya eramare potitinoise noisowa awa.

²⁰Are ema agewa sisero tepo wewa ema agewa meni dago noise nuai nusokare waya awa kaka duba kapeteniro duamu wewa. Tepo awa. Nukare saineba bi puro noisowa awa. Ago wero tua opi — gol meni waita silva meni waita kapa meni waita omata meni waita ni meni wai — nena amira sou bua awa kaka duamu wewa. Nena ami gai ine tepo, ge ninai ine tepo, ata izima sauma wai ine tepo.

²¹Awa daba kota, ema ami tani nusokare waya eni — mai dai betai, o kayota goe wai, o bama bewana wai, o nena bewana wai — tani waya awa oko dowa.