1Motong la bangabangana ke Maro tina ngan limi ki, in imaia tauru ki, ngan le akamata kanpitiki atu yo imol ke lang katene a idu tana koot i. Ya in tikaua so ke pamedenge dada panga be matan kala dada ke tana gumono yo yooringi pang lopo a idu le taukan launu i.
2Motong la ye kene yo kanpitiki tani, in iso dada ke tana gumono tani nga, ngan le so kutana ikut a pombe ke gomo lono a ise dawa ben ei somai kutana nga. Bong so kutana tani, in ikolomuk le ikut a ilo ngan le iwonokala ke le lang le ni ikolomuk ye.
3Inbe sis maimai tipas ye so kutana tani a tidu tana. Motong la Maro ikap gurana pang di a be nen ngan tikanen di tooltool dawa ben dongo tinana ke tana i.
4Inbe Maro iwete pang di be tigarung dingding le kai le so kapala yo isupsup a iken tana pono ngan be, bong be tikanen di tooltool yo tarkilanga ke Maro iken ye damodi tiap nga.
5Ngan gurana yo tikap nga, ngan ke be tiraumata di tooltool tina a timmata, ngan tiap, bong be tikap masngana pang di leu ye taudu limi. Ngan masngana tina yo be tikap nga, ngan ole dawa ben tool yo dongo tinana ikani ngan le ikanamaia masngana mai mata i.
6Nen le ye kene tani yo be di sis tina ngan tikanen di ye in nga, ngan di tooltool tina ngan ole lodi be le timmata, bong ngan tiap, matenge ole ikoo ye di. Inbe ole tikapye be timmata lapau, bong o ke be timmata tiap.
7Motong la akamata di sis maimai tina ngan dawa ben oos yo tikarata di a be tila pang ye patokongo nga. Ngan so yo tikur ye kutodi nga, ngan dawa ben koomoo ke kutodo yo tikarata ye gol nga. Inbe matadi nga, ngan dawa ben di tooltool.
8Inbe kutodi raunu, ngan mooloo mooloo dawa ben ke di garup nga. Inbe dongadi, ngan mooloo mooloo inbe matana dawa ben ke asara gok yo ene laion i.
9Inbe so yo tisousou ye a iyakala katedi nga, ngan so medana yo tikarata pang patokongo nga. Inbe balidi, ngan rutunu dawa ben di oos budanga yo tidada a tiyolo koror kidi a tiparsuk be tila ye patokongo mai ngan le ni rutunu ye di nga.
10Inbe idi yo iken ke laudi matana nga, ngan matana dawa ben ke dongo tinana, inbe gurana iken ye ke be tikap masngana pang di tooltool ye taudu limi.
11Inbe bangabangana ke tana gumono yo taukan launu in ya la iyei tool kuto mai pang di sis maimai tina i. Ngan ye Ibru koodi ngan tiwete ene ye Abadon, inbe ye Girik koodi ngan tiwete ene ye Apolion. Le betanga tina yo tiwete ye Ibru le Girik koodi nga, ngan punu ben Tool Ke Garungunu So.
12Ngan so tina yo be pombe nga, ngan akamata a imot le urata moonoo masngana dook tiap tina ngan atu la iman a ila koot i, inbe ru mulu la be ole pombe mur nga.
13Motong la bangabangana ke Maro tina ngan limi be atu ki, in imaia tauru ki, ngan le alongo tool kalngana pombe kataunu ke sipi pai tina yo ke kookoowoo ke paroranga so pang Maro nga. Ngan kookoowoo tani in tikarata ye gol, inbe ikodo dama ke Maro.
14Inbe tool kalngana tani in iwete pang bangabangana ke Maro tani yo itoko tauru in nen, “Ai, kupolo di bangabangana pai yo tipau di a tiyepe potai pang ye ran somai yo ene Yupritis ni a tila.”
15Motong la bangabangana ke Maro tani in ipolo di bangabangana pai tina a iyege di a tila. Ngan di bangabangana pai tina ngan muku ngan tipanat nen a tiyepe, inbe tinam le lo tigoro lal ke ke le taudu le rai tani yo Maro itaru be ole tiruwu di ye i. Le tina timadit a tila be la tiraumata di tooltool ke tana i a timmata. Ngan di tooltool yo be tiraumata di nga, ngan alunu san le dawa ben tipoto di tooltool nga le imot ke tana i le tiyepe ye budanga tol, ngan le budanga atu in tiraumata di le imot.
16Inbe alongo tiwete kinkatingi ke di tooltool ke patokongo kidi yo tiwur oos pono nga, ngan kinkatingi kidi ilo ete san.
17Inbe di oos tipa ye di tooltool yo akamata di ye mianga kiau ngan nen: So medana yo tisousou ye a iyakala katedi, ngan kooroonoo inbe yoongoonoo ben lama koossoonoo, inbe yoongoonoo lapau dawa ben pat yo ene salpa i. Inbe di oos tina, ngan kutodi dawa ben asara gok malmalini yo ene laion i, inbe ei ipa ye so kutana inbe pat salpa yo ikini biana nga, ngan tipas ye koodi a isi pang tana.
18Ngan so dook tiap tol tina yo tipas ye di oos koodi nga, ngan le tiraumata di tooltool a timmata. Nen le di tooltool tina yo tiraumata di nga, ngan alunu san dawa ben tipoto di tooltool nga le imot ke tana i le tiyepe ye budanga tol nga, ngan le budanga atu in ei ipa ye so kutana inbe pat salpa yo ipas ye koodi, in iraumata di le imot.
19Ngan di oos tina, ngan gurana kidi ke raumatenge di tooltool iken ye koodi inbe ye idi lapau, yesoo idi matana ngan dawa ben moto kutono le gurana kidi ke be tikan di tooltool a tigarung di ye lapau.
20Bong di tooltool kapala yo so dook tiap tol tina ngan tiraumata di tiap nga, ngan tiportak lodi a be nen ngan tiwala muridi pang dada dook tiap kidi yo tiyei ngan tiap. Di ngan titu ye sungunu pang di so sadi inbe kai padodo yo di tapdi tikarata di ye baedi nga. Ngan nen le so tina yo tisung pang di nga, ngan tikarata di ye gol le silba le baras le pat le kai leu, le ke be tikamata ni, too tilongo betanga, too tipa tana, ngan tiap.
21Inbe di tooltool tina, ngan tiportak lodi ye dada dook tiap kidi ke raumatenge di tooltool, le dada ke pidipidi, inbe dada ke bauk, le dada ke pinnau, ngan tiap lapau.
