1Tũpa rembiguai ɨmbopoyandeposa omoñehese güemimbɨ, ahese asepia yasɨtata ovɨapi vahe ɨva sui ou ɨvɨve. Ipare chupe imondosa ɨvɨcuar pɨcucu pɨ̃tumimbi vahe mboisa.
2Ipare omboise ɨvɨcuar rovapɨsa, ichui opũha tãtachi, inungar acoi horno guasu pɨpe sui osẽ vahe. Evocoiyase evocoi tãtachi ndosesape uca iri arɨ upe, niporẽhɨ iri eté mbahe.
3Iyavei evocoi tãtachi sui opa yuvɨnose tucru guasu rehɨi oñemosai opacatu ɨvɨ rupi; chupe avei imondosa seco pĩrata ãgua inungar acoi mbaherumbɨquɨãpe.
4Icuaisa rumo opacatu capihi mbahe rocrɨ iyavei ɨvɨra momaraẽhɨ ãgua, ẽgüe ehi rumo acoi ava nomboyecuai vahe osɨva rese Tũpa rer, chupe nara ité.
5Nimondosai rumo mborocuaita chupe ava yuca ãgua. Ẽgüe ehi rumo ‘tomombaraɨsu pucu rane poyandepo yasɨ rupi sereco’ oyapave tẽi, inungar tuprɨ acoi mbaherumbɨquɨãpe rasɨcuer.
6Evocoi arɨ rupi ava oipota tẽira omano ãgua yuvɨreco viña. Imanosa rumo que vɨtera yuvɨreco ichui.
7Tucru guasu rehɨi inungar cavayu imoingatuprɨ vavasave nara yepi; oãca rese evocoiyase vɨreco ndoyavɨi yeguaca oro apoprɨ, iyavei sova avɨye tuprɨ ité ava repiaca.
8Iha ndoyavɨi cuña ha, sãi evocoiyase ndoyavɨi tuprɨ yagua pɨ̃ta rãi.
9Setecuer evocoiyase oyopia tuprɨ guarepochi apoprɨ, iyavei ipepo rɨapugüer avɨye tuprɨ ité acoi cãreto rɨapugüer cavayu vɨnoña vahe vavasave.
10Vɨreco vuguai rese opopiar avɨye mbaherumbɨquɨãpe popiar. Ahe niha vɨreco opĩratasa poyandepo yasɨ rupi ava momara ãgua tẽi.
11Evocoi tucru guasu rerecuar, ahe icuaiprɨ ɨvɨcuar ipɨcucu vahe mboi ãgua. Ahe serer hebreo ñehe pɨpe Abadón; griego ñehe pɨpe evocoiyase Apolión ehi.
12Opa yɨpɨndar vahe mbahe-mbahe tẽi; oime vɨte rumo co pare ñuvɨrío mbahe tasɨ vahe.
13Imoñepei ovasa Tũpa rembiguai omoñehese güemimbɨ, ahese asendu ñehesa itaɨsɨ rapɨsa renda oro apoprɨ Tũpa rovaindar irungatu sãchi vahe pãhu sui.
14Ahe aipo ehi evocoi imoñepei ovasa Tũpa rembiguai upe: “Eyorapa evocoi irungatu Tũpa rembiguai ñapɨchimbrɨ ɨai guasu Eufrates ɨvɨrindar” ehi.
15Evocoiyase opa yorasa ava mombosapɨsa yahocuer yuca ãgua yuvɨreco. Esepia, evocoi imoingatuprɨ co arɨ rupi tuprɨse nara yuvɨreco.
16Ipare asendu sundao rehɨi cavayu harɨve yuvɨrecoi vahe, ahe setacuer doscientos millones tuprɨ.
17Ẽgüe ehi asepia cavayu rehɨi che quer nungar pɨpe, iharɨ pendar evocoiyase vɨreco opochiha rupi tuprɨ oyoepɨsa guarepochi apoprɨ yuvɨreco, ahe iparagüer pĩra vahe tata nungar, sovɨ vahe, iyu vahe avei no. Cavayu rehɨi ãca evocoiyase avɨye tuprɨ yagua pɨ̃ta ãca, iyuru sui evocoiyase yuvɨnose-nose tata, tãtachi iyavei azufre. Ipɨpe sui ava mombosapɨsa yahocuer opa tuprɨ omano yuvɨreco.
19Esepia niha, cavayu pĩratasa iyuru rese chini, suguai rese avei no; ahe suguai ndoyavɨi tuprɨ ité mboi ãca, ipɨpe avei ava omomara.
20Ava rumbɨrer rumo nomanopa vɨtei vahe co mbahe tẽi sui yuvɨreco, nosecuñaroi eté güecocuerai yuvɨreco. Ndopoi potai eté caruguar mboetei aisa sui, iyavei opacatu mbahe rahanga tẽi oro apoprɨ, guarepochi, bronce, ita, anise ɨvɨra apoprɨ mboeteisa sui avei yuvɨreco. Evocoi mbahe apoprɨ rumo ndosarecoi vahe, ndosendui vahe ité mbahe, ndoguatai vahe avei.
21Iyavei noñecuñaro potai eté oporapichisa sui yuvɨreco, opaye aisa sui, que cuña, que cuimbahe ambuae rese angaipa aposa sui, omonda raisa sui avei.
