Kereninua 15

1

2

3

4

5

6

7

8

9

10

11

12

13

14

15

16

17

18

19

20

21

22

¹Are na utura ena kotumai tamaira etete bamu zo giro di tainina. Awa angelo 7 nukare putou erama dainiro sisaira 7 awa puro dopewa awa. Nena awa Anutura ina gita kei awisia amira agewa nuso awa. Nena awa kei awero tepo wai amire Anutura tini kapai tepo waise sai awa.

²Are na ewa nazi zo gina, awa glas meni wago wai niaore dai siro-siro wai ine itinu gina. Are ema bogira pugeu wero wo goroba bamu ata ititi nuso ata zazo nusora tagi owere awa azu sero puro osewa ami ewa nazi glas ine amira tame dopero gita yere gamaira Anutu meni numorekare potinua awa puro itiwa gina awa.

³Nukare Anutura bua mai Mose amira yere ata Lamara yere ego toise gapinoiwa awa, O Tua Anutu, ni putoura Mama, ni bua witai wawesa gawenakare ewanana inowia. O ema sero amira ema tua, ni opi tepo tani me gege inowesa.

⁴O Tua, ema dapikarago ni samo darise sai awa. Ota ema dapikarogo zazo niso de ike narise sai awa. Ni daimata ami saramai awa. Ema dubu giti ami niso nana muro ni bowi wamunora; nera kota, ni ina potai bua me wetesa susu kei damu nitinoya.

⁵Are na iri niro gosinoina utura ena Anutura seli ibu amira masi sara-kisaramai amira toyai be zaumunua awa.

⁶Zaumunu angelo 7 nukare putou erama dainiro sisaira 7 awa puro noiwa ami masi sara-kisaramai amira du ena kei awewa awa. Nukare tama woi saramai kapawai puro noiwa awa. Ota ipu sapi diai nusokare gol meni wago wai awa zazana nusokarera itinua awa.

⁷Are nena seka itai 4 dopewa amira nana zo meni akou 7 gol meni wai awa angelo 7 amire potinu pumuwa awa. Akou 7 amira mokara Anutu nuai gege nowia amira tini kapai awa be muro kasaba dero itinua awa.

⁸Are ibura masi sara-kisaramai amira ena Anutura zasimaire Anutura putoure amira ibosi kei awero be munua awa. Are zo nu masi sara-kisaramai amira toyai ine tepo wenua. Angelo 7 nukare putou erama dainiro sisaira 7 awa zozara kei awero tepo wai amire toyai ine te wamunoya.