Bararuŋ Dâŋ 9

1

2

3

4

5

6

7

8

9

10

11

12

13

14

15

16

17

18

19

20

21

22

¹Eme aŋelo namba 5 eki qeŋ qawec. Eme noni bâpiŋ moc sambâŋkonec tararâ mâreŋko wahame honepo. E hârâcte tapa roocte irec ki râcnekicne.

²Eme hârâcte tapa rome hosâc sâko wefuwec, gie ʒame hosâc feekac, irec sâc hosâc wefu ferâ ʒoaŋ â sawa sâocke‐fârewec.

³Hosâc maŋkonec ine ɋirikiŋ wefurâ mâreŋko wahambiŋ. Micjeŋic ine omeqaqare sâc.

⁴Erâ jaŋe mâreŋko sopâc nânâ kise me jâcrehac wiac râsi ecneniŋte mi mukicne, ŋic Anuture maqâreŋ mai‐jeŋicko mi fowec, jaŋe sawa râsi ejareniŋte mukicne.

⁵Erâ jopapie hâmoniŋte mâcne, mâc mosa 5 kiʒâic‐jopahuc juniŋte mukicne. Ʒâic ine omeqaqare micte sâc iŋuc manazo.

⁶Eme dameŋ ira ŋic jaŋe hâmoniŋte biŋe muniŋmu erâ mi hâmoniŋmu, hâmoc hefâre‐bipiepie sifu mi maic‐jopaocmu.

⁷Ɋirikiŋ jaŋe ine becâsic hawari, momori jaŋe ʒikao raniŋte becâsic wiac bâmocke‐jareeŋgopieŋ hawari iŋucne hâcne. Qizec‐jeŋicko du golzi bakicne tinac ŋewec, ʒâŋe mai‐jeŋic ŋic ʒâŋe mai tinac.

⁸Kanʒaŋ‐jeŋic ʒoricne, ŋokac qizec gere‐jeŋicte sâc. Micjeŋic laioŋte mic iŋucne.

⁹Amec‐jeŋicko maro wapazi bakicne tinac fowec. Fakec fânâŋ‐jeŋic ine keretac fânâŋ iŋucne, becâsic bocjaha jaŋe ʒikao raniŋte keretac gagasac jaha fâre rapie fânâŋkeekac, iŋucne tinac hâcne.

¹⁰Gecjeŋic omeqaqare gec iŋucne. Micjeŋic i gecjeŋicko hâcne fokac, izi ŋic mosa 5 kiʒâic‐jopahuc juniŋmu.

¹¹Erâ hârâckonec aŋelo e ŋicwofuŋ jujarekac, ʒâŋene Judaŋic jaŋere dâŋko Abadoŋ â Grikŋic jaŋere dâŋko Apolioŋ.

¹²Tucwipezi jei jahec â moc wirawec, moc omaekac, ʒi jajahec fokopirec.

¹³Eme aŋelo namba 6 eki qeŋ qawec. Eme alata golzi bakicne, Anuture maio ŋekac, masune 4,

¹⁴irecnec dâŋ wefurâ aŋelo namba 6 qeŋ badomawec e ʒiŋuc âzâcnewec: “Eufrata opâ sâkoo aŋelo 4 niŋgiŋ‐jopakicne jaŋe bâŋgoroŋ‐jopac.”

¹⁵Eme aŋelo 4 jaŋe jara, mosa, ʒoaŋ, aua maickeme mâreŋ sâc ŋic tucne qâmiziec‐jopaniŋte woŋec jumbiŋ, jaŋe hâcne firuec‐jopawec.

¹⁶Eme momorifâc‐jeŋic becâsicko ŋeŋe jaŋere ʒare 200 million, iŋuc mupie manapo.

¹⁷Ŋic â becâsic jaŋere hawari ine maŋ ʒâŋe‐nanezi kecʒiŋuc honepo: Ŋic jaŋe maruku bâbâroŋ â keda â bâbâŋeŋ iŋuc rojumbiŋ, â becâsic jaŋere qizec laioŋ qizecne iŋucne, micjeŋickonec ine ʒoc â hosâc â tepe ʒocne wahawec.

¹⁸Eme wiac fârone jahec â moc izi ŋic gâcne sipiric‐jopa‐fârewec, becâsic mickonec ʒoc â hosâc â tepe ʒocne wahawec izi hâcne.

¹⁹Becâsic tâpiri‐jeŋic ine micjeŋicko â gecjeŋicko fowec. Gecjeŋic homa iŋucne, qizecnehec, izi hâcne ŋic sipiric‐jopaeŋgopieŋ.

²⁰Eme ŋic tucne hâmo sipiric ehapie tucne akic‐jopakicne jaŋe maŋjeŋic mi bârisiembiŋ â juju bapa‐jeŋicte manapie mi sâqorewec. Aricne, jaŋe sifu demoŋ wiac bajumbiŋ. Â nemuɋâŋ golzi â siliwazi â aeŋzi â qânâzi â jâczi bakicne, hone manac eene tâmiric â rarac wawarecne tâmiric, i numu‐jarehuc jumbiŋ.

²¹Ehuc ʒika â qaŋgec â sasec â fiuc i mi behembiŋ.