Kölfel 90:6-16

⁶Lesosor ewe fetil a aümanau o märifötä, nge lekuniol a aümämä o pwasala.

⁷Pun äm aia rosola ren om song, äm aia fokun niuokus ren om lingeringer.

⁸Ka anomu äm pwüngingau me mwom, äm tipis mi monola ka särifätä pwe ka tongeni küneer.

⁹Pun ränin manauem meinisin ra la senikem ren om lingeringer, nge ierin manauem kewe ra müchüla usun eu ngasangas.

¹⁰Iwe, ierin manauem ra tori fik, nge are eman a pöchökül, a tori walik ier. Nge lon ekewe ier a chök masou ren angang me weires. Ra müttir wesila usun chök aia ässila.

¹¹Nge iö a mefi manamanen om song, nge iö a silei an epwe niuokusiti om lingeringer?

¹²Kopwe aiti ngenikem pwe aipwe eiteita ränin manauem mi mochomoch, pwe aipwe tipachemela.

¹³Ai Samol mi Lapalap, kopwe kul ngenikem. Ifa ükükün fansoun kopwe song ngenikem? Kopwe tongei noum kewe chon angang.

¹⁴Kopwe aurakem ren om tong ellet iteiten lesosor, pwe aipwe köl o pwapwa lon ränin manauem meinisin.

¹⁵Kopwe apwapwakem lon aükükün ekewe rän ka ariaföüükem lon, pwal lon aükükün ekewe ier aia küna weires lon.

¹⁶Kopwe pwäri ngeni noum kewe chon angang om kewe föför, pwal om manaman mi ling ngeni nöür kewe.