Kölfel 90:3-10

³Ka awili aramas ngeni pwül o üra, “Ämi nöün aramas, oupwe liwinsefäliti pwül.”

⁴Pun engeröü ier ra usun chök eu rän me reöm, ra usun chök ewe rän näneu a fen la, ika usun chök eu leülüngatin eu pwin.

⁵En ka angekaiela manauen aramas usun müttirin puun eu chanpupu. Ra usun chök eu tan mi müttir manlüküla, ra pwal usun chök fetil mi märifötä lesosor.

⁶Lesosor ewe fetil a aümanau o märifötä, nge lekuniol a aümämä o pwasala.

⁷Pun äm aia rosola ren om song, äm aia fokun niuokus ren om lingeringer.

⁸Ka anomu äm pwüngingau me mwom, äm tipis mi monola ka särifätä pwe ka tongeni küneer.

⁹Pun ränin manauem meinisin ra la senikem ren om lingeringer, nge ierin manauem kewe ra müchüla usun eu ngasangas.

¹⁰Iwe, ierin manauem ra tori fik, nge are eman a pöchökül, a tori walik ier. Nge lon ekewe ier a chök masou ren angang me weires. Ra müttir wesila usun chök aia ässila.