Kölfel 39:2-13

²Üa mosonoson o fanafanala, üsap mwo nge apasa och mi mürina. Nge ai riaföü a chök wattela.

³Üa fokun lolilen. Iwe, lupwen üa ekinlon, ai riaföü a chök lapala. Mürin, üa kapas.

⁴“Ai Samol mi Lapalap, kopwe asile ngeniei sopolan manauei, pwal ükükün langatamen ränin manauei. Kopwe asile ngeniei müttirin än manauei sü seniei.

⁵Nengeni, ka föri pwe tamen ränin manauei ra chök usun tamen ekoch chöchön lon pau. Fansoun manauei a usun chök nge esor me fän mesom. Ellet, iteiten aramas mi nom won ei fanüfan ra usun chök eu enienin asepwäl.

⁶Ellet, aramas ra usun chök ngünüen mettoch. Meinisin mine ra anganga esap wor lomotan. Aramas ra achukuchukätä wöür, nge resap silei iö epwe angei me mürin.

⁷Ai Samol, met üpwe tongeni ösüküsükü iei? Ai apilükülük a nom womw.

⁸Kopwe amanauaei seni ai tipis meinisin. Kosap mwüt ngeni ekewe chon umwes pwe repwe turunufaseei.

⁹Üa fanafanala, üsap tongeni kapas, pun en ewe mi atolongaei lon ei riaföü.

¹⁰Kose mochen kosap chüen ninniei. Üa arap ngeni mäla ren om wichiei.

¹¹Lupwen ka apwüngü eman aramas ren om fönöü pokiten an tipis, ka ataela mettochun meinisin mi aüchea ngeni, usun pwötür ra enala mettoch. Ellet, iteiten aramas ra usun chök eu enienin asepwäl.

¹²Ai Samol mi Lapalap, kopwe aüselinga ai iotek, kopwe aü selingom ngeni ai siö. Kosap fanafanala, lupwen üa kechü. Pun ngang üa chök eman wasöla reöm, üa eman chon siamü usun ai kewe lewo meinisin.

¹³Kopwe nenne seniei pwe üpwe tongeni pwapwa me mwen ai üpwe mäla, nge üsap chüen nom.”